Dizionari de Lenghe Furlane

misurâ  mi|su|râ  [FO]

1. v.tr. rilevâ o calcolâ cuntune cierte precision une grandece:  al rivà il marangon e lu misurà cuntun spali, par fâi la casse (Pieri Menis, Il fi de Rosse); lu dismoveve a cinc a buinore l'infermîr che al vignive a misurâi la fiere (Amedeo Giacomini, Tal ospedâl); tor i agns Cincuante un neurolic todesc, Hans Berger, al à començât a misurâ la ativitât eletriche dal cerviel cuntune machine che e je stade clamade eletroencefalogram (Franc Fari, Il cjâf dai furlans)
   
   1. cirî di valutâ, ancje in maniere aprossimative:  e scomence a gotâ la ploie. O alci el cjâf, par misurâ la fuarce dal timp (Arturo Feruglio, Viaç a Vignesie)
   2. (fig.) fâ une valutazion suntune cualsisei robe, aspiet, persone e v.i.:  la vuardadura ferma di cui che a sa misurâ zent, robi e timp (Novella Cantarutti, Cjasa da la mê zent)
2. v.tr. provâ alc par viodi se al va ben di dimensions:  la strie e fâs fâ un grum di veretis, e vie a vendilis te cjase dai sassins. La frute e vierç e si met a misurâ veretis. A 'nd met une, e li e cole e li e reste (Andreina Nicoloso Ciceri, La sentence de regjine - Racconti popolari friulani I)
3. v.intr. vê une cierte misure, un ciert valôr, une cierte grandece:  i eri rivât a contâ trentedoi zîrs de sale, che a misurave sù par jù deis metris par siet (Stiefin Morat, Kebar krossè)
   Sin. fâ
4. v.tr. (ancje ass.) meti in vore un criteri di moderazion o ancje di sparagn tal fâ alc:  lassant indaûr i siums impussibii, misurant i progjets daûr lis fuarcis e daûr i mieçs che al à (Josef Marchet, Autonomie e moralitât); puar Ricut! Misurâ simpri polente e companadi, … mangjâ brût di fasûi (Maria Forte, Cjase di Dalban); ca ancjemò mieç, Toni! Vuê no si misure! (Dolfo Zorzut, La furlane)
   Sin. rangjâ , regolâ , strenzi , scurtâ , staronzâ

Polirematichis e espressions idiomatichis

• misurâ il centesim loc.v.
• misurâ il pan loc.v.
• misurâ la bocjade loc.v.
• misurâ la strade loc.v.
• misurâ lis peraulis loc.v.

Proverbis:

• a cui che no le misure i vignarà misurade cuntune misure buzarade
• al è miôr misurâsi che no jessi misurâts
• bisugne misurâ il cûl cu la bocje
• bisugne misurâsi par no sei misurâts
• come che si misure si ven misurâts
• cui che no le misure, pôc e dure
• cui che no si misure al ven misurât
• dai cops insù nissun nol à misurât
• ducj misure sul so braçolâr
• i umign no si ju misure a cuartês
• i umign no si ju misure sul braçolâr
• il vin si lu misure, il pan si lu mangje fin che al dure
• l'om si misure dal stomi insù
• miôr misurâ che no vê des mans di chei altris
• miôr misurâ dôs voltis che no falâ une
• miôr misurâle che no fâse misurâ
• misurâ trê voltis prin di taiâ une
• misuriti se no tu vûs sei misurât
• se no si misure, no dure