Dizionari de Lenghe Furlane

ricognossi  /-gnò-/  ri|co|gno|ssi  [FO]

1. v.tr. cjapâ cussience de identitât e des carateristichis di cdn. o di alc, spec. se al jere za stât cognossût o se si veve vût informazions su di lui:  Marcuç cu la muse ancjemò plui spavide parsore il façolet scarlat, al someà ricognossilu, ma i passà denant cence bati voli (Pieri Menis, Sul agâr); un pôc spaurît pal fat che nol veve par nuie ricognossût il lûc, si jere voltât cu la intenzion di tornâ indaûr (Franca Mainardis, La liende dal riûl)
   Sin. cognossi
2. v.tr. ameti che alc al sedi vêr:  se o cjatassin dentri un sôl fregul di sostance positive, o saressin ancje bogn di ricrodisi e di ricognossi il nestri tuart, parcè che nissune mistiche no sta di cjase ca di nô (Josef Marchet, Ce che a vuelin); al è simpri masse dificil ricognossi la pierdite di une persone che tu i âs volût ben par agns e agns (Enrico Martina, Ricuarts e inlusions)
   Sin. acetâ , ameti
3. v.tr. dâ, daûr di un dirit o di une concession:  la autonomie speciâl nus è stade ricognossude: cumò nus tocje a nô viodi ce sostanzie che e varà, fin dulà che e rivarà, cemût che e vignarà imbastide (Josef Marchet, Ancje cheste e je fate)
   
   1. ancje cun predicatîfs, ameti in maniere uficiâl une posizion di autoritât o juridiche o une funzion, une cualifiche e v.i.:  Sigjismont di Lussemburc, re di Ongjarie, nol rivave adore di fâsi ricognossi imperadôr cuintri so fradi Venceslau e so cusin Jost (Josef Marchet, Cuintristorie dal Friûl fin sot la Italie); in chê volte il furlan nol jere ricognossût tant che lenghe ni dal Stât ni de Regjon (Max Mauro, Un Friûl difarent: i 90 mhz di Onde Furlane)
4. v.tr. determinâ dopo di une valutazion, di un judizi:  cualchi an dopo si scuvierç la fotosensibilitât dal seleni che no si saveve cemût interpretâ. Cheste ultime scuvierte e ven ricognossude a Willoughby Smith (Lorenzo Marcolini, Lis celis organichis nanostruturadis); ricognossi l'imputât colpevul di dutis lis acusis
   Sin. declarâ , judicâ
   
   1. tignî cont:  la Regjon […] ur ricognòs ai docents che a insegnin il furlan, dentri dal numar di oris che a previodin i lôr contrats, lis ativitâts funzionâls al insegnament pe preparazion dai materiâi e de progjetazion (Patrizia Pavatti, Il furlan al è rivât tes nestris scuelis. Si met in vore il Regolament pal insegnament de marilenghe in regjon)
5. v.tr. [TS] dir. declarâ la paternitât in maniere uficiâl:  "[il frutin] Al è di mê sûr… lu à vût cuntun lavorent de sartorie indulà che e lave a vore." "Po ben che lu ricognossi lui…" "Nol po, al è maridât… al è scjampât tal Canadà" (Pieri Somede dai Marcs, Anzule)
6. v.tr. [TS] dir. declarâ une organizazion legjitime, ven a stâi sogjet juridic
   
   1. decidi che un servizi, un titul al è valevul pe finalitât di cariere di une persone, o pe pension
7. v.tr. [TS] dir.intern. acetâ de bande di un stât che al esist un stât gnûf o un guvier gnûf:  te Europe ocidentâl, la prime a ricognossi la Slovenie e je stade la Islande (Tjaša Gruden, Slovenie. Si fasin i 25 agns de indipendence: i numars di un gnûf Stât)