Dizionari de Lenghe Furlane

spacâ  spa|câ  [FO]

1. v.tr. movi cun fuarce e plui voltis:  l'om al spacà la camisole par parâ jù fros di soreâl tacâts intor (Maria Forte, La tiere di Lansing); e sintive un colament di fuarcis… lis gjambis no le tignivin plui sù… la tos i spacave il stomi (Pieri Somede dai Marcs, Nardon e Vigjute di Nani); e à finît di spacâ un tapêt e lu puarte dentri (Pieri Piçul, Vieri e gnûf)
   Sin. movi , sacodâ , sbaciâ , sbalotâ , sbatacolâ , sbati , bati , scjassâ , sclontenâ , scodolâ , sdrondenâ , sgorlâ , spacolâ , trindulâ
   
   1. mandâ vie, fâ colâ movint cun fuarce plui voltis o dant colps:  Checo lu cjape di colp in braç, lu strenç a se, i spache la nêf, lu mene dongje il fûc (Pieri Somede dai Marcs, Gnot di Nadâl); al veve spacade la ultime gote, par no straçâ propit nuie (Riedo Pup, I furlans e la culumie)
2. v.tr. netâ dal cjalin:  al tirave dilunc sbarcjant lunari e cuant che no jerin plui napis di spacâ, nissun i dineave une bocjade di companadi e une fete di polente (Pieri Somede dai Marcs, Spacecjamin)
3. v.tr. (ancje fig.) rompi, ridusi a tocs:  i galiots a vevin la cjadene tal pît e a spacavin pieris cuntun mai (Carlo Sgorlon, Prime di sere); il soreli di Lui, cuasi a plomp, al bateve di spacâ lis breis de scjale (Pieri Menis, Zilugne); a disin che [il referendum] al à spacât il Sindacât, al à dividût il Paîs, al à confusionât il mont dal lavôr, al à intiziât e provocât i parons (Riedo Pup, Il scandul dal Corpus Domini)
   Sin. rompi , crevâ , sclapâ , fruçonâ

Polirematichis e espressions idiomatichis

• spacâ il cjâf loc.v.
• spacâ il minût loc.v.
• spacâ il polvar loc.v.
• spacâ la gjambe loc.v.
• spacâ la piruçarie loc.v.
• spacâ lis spalis loc.v.

Proverbis:

• copâ int, palâ nêf, sbroiâ morârs e spacâ coculis, al è dut timp pierdût