Dizionari de Lenghe Furlane

sbati  sba|ti  [AF]

1. v.tr. movi alc cun fuarce di mût che al finissi cuintri di alc altri, che al dedi un colp:  cence pierdisi in altris cjacaris si metè il sialet e le fûr sbatint la puarte (Tarcisio Venuti, La cjase di Toni); chel baston, lui lu veve sbatût cun fuarce rabiose suntune des taulis, che la bree e veve cricât (Gianni Gregoricchio, Trê feminis)
   Cfr. parâ , bati
   
   1. dâ colps a alc, ancje plui voltis:  un maneç di feminis a sbati tapêts e materàs e netâ, lustrâ (Alan Brusini, Come tai romançs)
2. v.tr. (ancje fig.) fâ lâ cun fuarce, ancje cun autoritât o prepotence:  Florence e je une localitât masse centrâl par Felix, al pense il Ministeri dal Interni, che, passât un mesut, lu sbat fint a Licata, tal Sud de Sicilie (Donato Toffoli, Felix Marchi, un soversîf te "Grande Vuere"); tal so destin, che le sbateve mo ca mo là, e viodeve un messedot balort di vicendis (Carlo Sgorlon, Ombris tal infinît)
3. v.tr. messedâ cun fuarce:  i veve za parecjât un bon pagnut e sbatût un ûf cu la marsale (Ivano Urli, Storie di Min)
   Sin. bati
4. v.tr. movi plui voltis une part dal cuarp:  la aghe, il pantan mi rivavin za sul stomi, o ciulavi, o sintivi a ciulâ, o pontavi, o sbatevi i braçs ma lavi simpri plui sot (Pieri Somede dai Marcs, Resurezion a Pontinie); i tremà il lavri sot, al sbatè lis ceis, cence peraule (Dino Virgili, La aghe da pît la cleve); una ocja che passa e sbat li alatis tal polvar (Ugo Pellis, Al rusignûl svuarbât)
   Sin. bati
5. v.tr. (volg.) vê rapuarts sessuâi:  si è fate sbati ancje di Meni, chê troie! (Amedeo Giacomini, Tal ospedâl)
   Sin. fotâ , foti , sfotâ , taconâ
6. v.intr. lâ cuintri di alc o di cdn.:  a aghe che e scor sbatint par ogni scoi formant la sbrume (Roberto Ongaro, Cretevierte); al lave [in biciclete] tant che un mat tes rivis jù: al à sbatût cuintri la caserme dai alpins di Tarcint (Alan Brusini, I coridôrs di Tresesin)
   Sin. dâ cuintri , fâ cuintri , pocâ , urtâ , lâ intor , bati , trucâ² , trussâ
7. v.intr. vê moviments, impats o colps o dâ une sensazion di impats o colps in maniere ripetude:  a sveâlu al jere stât chel sbati, chel sdrondenâ continui e fastidiôs dai scûrs dal barcon (Franca Mainardis, Aiar di cjase); il cûr al ti sbat tal cuel (Ugo Pellis, Catinuta)
   Sin. bati , sbatacolâ

Polirematichis e espressions idiomatichis

• lâ a sbati loc.v.
• sbati il cjâf cuintri dal mûr loc.v.
• sbati il cjâf cuintri il mûr loc.v.
• sbati il cjâf cuintri un mûr loc.v.
• sbati tal cuel loc.v.

Proverbis:

• lis feminis a son tant che i gjats che se no sbatin il nâs no muerin