Dizionari de Lenghe Furlane

stiçâ  sti|çâ  [FO]

1. v.tr. movi lis boris par dâ plui fuarce al fûc:  Zuanin al puarte di bevi, e si sente ancje lui cui aventôrs, a stiçâ a planc il fûc cu lis moletis grandis (Dino Virgili, La aghe da pît la cleve); a stissa il fouc, a met a boi / il lat, a distira tai bârs / li intimelis blancjis, i ninsôi (Pier Paolo Pasolini, Viers Pordenon e il mont)
   Sin. saborâ , tiziâ , intiziâ
2. v.tr. (fig.) fâ nassi o cressi une reazion, un sintiment, un fenomen, un pinsîr, un contrast e v.i.:  la trupe un pôc cjaminant un pôc balant e mandave vuicadis matis che a stiçavin ator ator un vosarili e une voie mostre di ridi e bacanâ (Pieri Menis, Mascaris e… maraveis); [il Premi Friûl al è stât] un mût par stiçâ il rignuviment inte culture furlane (Max Mauro, Un Friûl difarent: i 90 mhz di Onde Furlane); chestis concezions nazionalistichis […] a àn stiçât chel odi di raze, chel pangjermanisim, chel panslavisim e chel panitalianisim che nus à metûts in sest cussì ben (Josef Marchet, No si à di judicâ il passât cu la mentalitât di cumò)
   Sin. ecitâ , stuzigâ , tirâ sù , tiziâ , saborâ , sburtâ , instiçâ , movi , dismovi , uçâ , imboreâ , scjaldâ , intiziâ
3. v.tr. (fig.) sburtâ cdn. a pierdi la pôre, a jessi agressîf:  ideis che a àn stiçât i puars a meti lis mans su chel dai siôrs e ur àn fat crodi di jessi libars di fâ chel che a vuelin (Alviero Negro, Int di masnade); no stait a vê pôre che jo o sedi chi a stiçâ la int cuintri dal guvier no, no! Però o dîs che se veramentri nus vûl ben, nol à di dânus bêçs: al à di lassânus chel che o vin (Francesc Placerean, Di ducj i dons dal Spiritussant, cumò al covente il don dal coragjo); a volevin savê par dutis lis viis cui che ju veve stiçâts: se sot al jere cualchi siôr… cualchi predi… cualchi forest… (Riedo Pup, Il prin moto)
   Sin. saborâ , sburtâ , tirâ sù , instiçâ , uçâ , imboreâ , scjaldâ , intiziâ
4. v.tr. (fig.) cirî di fâ pierdi la pazience a cdn., di fâlu rabiâ:  si divertissisi simpri di plui a stiçâ chel che si inrabie (Cristina Noacco, Faliscjis)
   Sin. stuzigâ , provocâ , instiçâ , intiziâ