Dizionari de Lenghe Furlane

scjaldâ  scjal|dâ  [AF]

1. v.tr. fâ cressi la temperadure di alc:  e sofletave dôs boris, restadis te cinise di misdì, par scjaldâ te cogume di ram une gote di cafè (Pieri Menis, Marum); [il fari] al falà un pâr di voltis tal boli un fier e i de la colpe al garzon, disintji che no lu veve scjaldât ben (Roberto Ongaro, Cretevierte)
   
   1. (ancje ass.) mandâ fûr energjie termiche:  la jarbe e jere alte e verde, e e vignive sù ben parcè che il soreli al scjaldave fuart e nancje la ploie no mancjave (Carlo Sgorlon, Prime di sere)
   2. ancje impersonâl o cun subiet sotintindût, riferît al soreli, fâ che il clime al sedi cjalt:  la int tornade a sentâsi sot i olms o ca vie ta la ombrene sul rivâl dal flum, che al scomençave a scjaldâ, a mirindavin in ligrie (Dino Virgili, La aghe da pît la cleve)
   3. fâ sensazion dal calôr:  mi jemple un bussul di sgnape […]. Lu scoli tun flât e mi scjalde (Alan Brusini, Gian Paolo Linda, I forescj)
2. v.tr. doprâ cun basse potence o cun pôc sfuarç alc, tant che un motôr, un mecanisim o ancje i muscui, di maniere che al rivi tes cundizions miôr di lavorâ cence consecuencis negativis
3. v.tr. (fig.) dâ un cualsisei efiet che si puedi paragonâ cul calôr, cul fûc o sim., tant che vivôr, passion, inamorament, ligrie, contrast e v.i.:  jê, sbassant i voi, e sintive cressi chel sintiment che i scjaldave il cûr (Christian Romanin, Un altri carnevâl); une passion scuindude che ur scjaldave la anime ogni dì di plui (Maria Forte, Cjase di Dalban)
   Sin. saborâ , impiâ , sofletâ , stiçâ , tirâ sù , tirâ sù di suste , tiziâ , infogâ , meti sù , uçâ

Polirematichis e espressions idiomatichis

• scjaldâ cjadreis loc.v.
• scjaldâ il banc loc.v.
• scjaldâ il cjâf loc.v.
• scjaldâ il cûr loc.v.
• scjaldâ il fiât loc.v.
• scjaldâ il lat loc.v.
• scjaldâ la cjadree loc.v.

Proverbis:

• cul cjalt dal jet no si scjalde la cite
• il soreli al scjalde par ducj
• nol è mai fûc che nol scjaldi cualchidun
• pe bocje si scjalde il for