Dizionari de Lenghe Furlane

tirâ fûr    [FO]

1. loc.v. cjapâ e fâ fuarce par che cdn. o alc al vegni fûr:  une spine di Signôr, lungje une cuarte, la Madone la à cjapade tun pît, saltant un agâr suiât. […] La Madone pricure e fâs di dut par tirâle fûr chê spine (Dolfo Zorzut, El sborf); cuant che [il frut colât tal poç] le à viodude bruscje si è metût a sberlâ. E je corude jù agne Vigje, sô none, e lu à tirât fûr pai braçs (Pieri Menis, Tinut di Libro)
   Cfr. gjavâ fûr
   
   1. cjapâ in gjenerâl alc che al jere intun puest sierât o limitât o metût vie, ancje cence specificâ e lassant che si capissi dal contest:  [il vigjil] al tire fûr un notes e mi met la multe (Pieri Somede dai Marcs, Ursule); siôr Turo Lanzin al veve tirade fûr une butilie sigjilade, e Dreine e veve fat un bon cafè neri daûr (Dino Virgili, La aghe da pît la cleve)
   2. gjavâ alc di intor:  i à tirât fûr i stivâi in maniere che el puaret al è lât ator dut el dì pes scuindudis parcè che si vergognave a fâsi viodi in scjapinele (Arturo Feruglio, I stivâi di Zuan Batiste)
2. loc.v. cjatâ:  al si met a voltâju, a zirâju e a messjedâju ducj cuancj [i crucifìs] par tirânt fûr un sence pecjis (Luigi Gortani, Al marcjât di Vile)
   Sin. inventâ , cjatâ , cjatâ fûr , burî , burî fûr
3. loc.v. cjatâ o inventâ e presentâ un argoment, une scuse, une cuistion, un probleme o un truc, une dificoltât e v.i.:  lis argomentazions che a tirin fûr a son vueidis di ogni sostance (Josef Marchet, Sturm und Drang); tancj si son fats indenant, cui proponintsi tant che professôr di talian, cui tirant fûr ideis par gjitis e fiestis, cui cu la voie di cognossiju lant a fâ di mangjâ cun lôr [cui forescj rivâts di pôc] (Igor Londero, Un blanc e un neri)
   
   1. presentâ un argoment, une scuse e v.i., in gjenerâl, ancje cence inventive:  "O no stait a tirà fûr la solite solfe cumò […]" (Anute Fabris, A passe la scalmane)
4. loc.v. rivâ a otignî:  "È vignude une femine a domandâmi cemût che veve di fâ par tirâ fûr la legjitime che i spietave a sô mari su la sostance di so nono e che i siei barbis no volevin dâi" (Pieri Somede dai Marcs, L'avocat e la luianie); dai ramaçs si tirin fûr fibris par fâ cuardis (Silvia Battaglia, Risorse biodiversitât)
   Sin. rigjavâ , gjavâ , gjavâ fûr
5. loc.v. dâ bêçs:  nol veve volût savênt di tirâ fûr nancje une palanche (Gianni Gregoricchio, Îr e doman); par tirâ fûr chei cinc mil francs che nus vevin prometût o vin dovût sudâ cent cjamesis (Pieri Somede dai Marcs, Lis nestris rosis)
   Sin. spiçâ fûr , spudâ , spudâ fûr
6. loc.v. fâ une ecezion, gjavâ di un cont, di une considerazion, di une categorie e v.i.:  che anzit, a fâ il calcul tune anade, une volte tirâts fûr ducj i vinars, lis cuatri timporis, l'avent, la cuaresime e cualchi alc altri di fûr vie, si po dî che cuasi nol vanzave nancje il timp di mangjâ un purcitut tarcjot cence fâ pecjâts cuintri la astinence (Riedo Pup, I furlans e la pinitince)
   Sin. gjavâ , tirâ vie , gjavâ fûr

Components:

• fûr av., prep., inter., adi.inv., s.m.sing.
• tirâ v.tr., v.intr.