Dizionari de Lenghe Furlane

gjavâ  gja|vâ  [FO]

1. v.tr. cjapâ e fâ che alc nol stedi plui tal so puest o tal puest che al jere:  o vivevi tun cuartîr dulà che par meti un jet matrimoniâl, o varès scugnût gjavâ l'armâr, tant la cjamare e jere piçule (Alan Brusini, Gian Paolo Linda, I forescj)
   Sin. gjavâ vie , tirâ vie
   
   1. tirâ vie alc che al è dentri di alc altri o tal mieç di altris elements:  gjavâi il lamp [al pes] de bocje procurant di no sbregâi la bocje (Lucio Perès, A pescje tal suei)
   2. tirâ vie alc che al è ator o intor:  la Nene e gjave i ocjâi dal nâs par cjalâ la Fiorine tai voi, di sotsore (Meni Ucel, Tirâ sù fruts); e gjavà, ben planchin, la cotule, la gjachetine e la cotule sot (Maria Forte, Mabile la Lunghine)
   3. dislidrisâ une plante:  al pareve che a vessin cjapât gust a voltâ e a savoltâ chê tiere malandrete, a dreçâ rivâi, a jemplâ fossâi, a boscâ, a gjavâ çocjis e meti jù vîts (Pieri Menis, Agne Ursule); Toni al jere cun so barbe bande dal pin di Lauçà a gjavâ gjardon tun cjamp (Checo Tam, Puiesis)
      Sin. butâ fûr
   4. cjapâ e puartâ vie un materiâl di un jaciment:  ogni compagnie e à mandât […] i minadôrs che a àn gjavade la piere, po i scarpelins che le àn scuadrade, po i muredôrs che le àn metude in vore (Pieri Menis, La glesiute dai alpins)
   5. cjapâ in man une arme e tirâle fûr de fodre:  al gjavà la pistole cence savê nancje lui parcè. Par difindisi o par fâur capî [ai todescs] che, ancjemò, al jere un om libar? (Maria Forte, Cjase di Dalban)
2. v.tr. (fig.) fâ che alc nol vedi plui efiet, validitât, impuartance e v.i.:  dal 1736 Vignesie e gjave il dazi su la galete (Rino Gubiani, Studi da la evoluzion dal paisaç mediant i toponims)
   Sin. abolî , gjavâ vie , scancelâ
3. v.tr. (fig.) fâ che cdn. nol sedi plui intune cierte cundizion, situazion, che nol vedi plui une cierte idee e v.i.:  jê e menave il cjâf ustinade e nissun e nuie le gjavave de sô determinazion (Gianni Gregoricchio, Trê feminis)
   Sin. discjoli
4. v.tr. fâ che alc nol sedi plui tignût di cdn., nol sedi plui di cdn. o di alc, o nol sedi plui cun cdn. o cun alc:  chel altri al veve tentât di difindisi cuntun baston, ma Eliseo jal veve gjavât di man e cuntun sôl colp i veve spacât il cjâf (Carlo Sgorlon, Prime di sere); ae Provincie di Gurize i fo gjavât il Comun di Cjopris e Viscon e il Mandament di Çarvignan (Ferruccio Tassin, Autonomie tal Friûl austriac)
   Sin. puartâ vie , tirâ vie , gjavâ vie
   
   1. ancje cun obiet imateriâl, fâ che alc nol sedi plui di cdn. o di alc, o che nol vedi plui efiet:  Savorgnan al decît di passâ tal cjamp imperiâl: une decision che i gjave dal dut lis simpatiis che ancjemò al veve a Vignesie (Carli Pup, Il Friûl de Joibe Grasse dal 1511); l'alcul al gjave ogni pôre e al da slanç a un temerôs (Maria Forte, Cjase di Dalban)
      Sin. puartâ vie
   2. fâ che cdn. nol sedi plui cun cdn. altri o tun puest, tune incjarie e v.i.:  il plevan Vuarint […] al vignì gjavât di Glemone e passât cjaluni a Cividât (Riedo Pup, Gran Dio benedite l'Italia)
5. v.tr. fâ une sotrazion:  fasêt il cont… gjavait il parcent, come che si à dit (Riedo Pup, Sant Pieri e il buiat)
   Sin. gjavâ fûr , gjavâ vie , tirâ vie
6. v.tr. no considerâ un element, fâ une ecezion:  se si gjave chel pôc timp che o ai vivût a Tarvis, là che gno pari al jere diretôr didatic, o ai passade la mê infanzie a Tarcint (Miriam Comelli, Tarcint, un ricuart)
7. v.tr. otignî, spec. cuntune procedure di trasformazion:  des plantis si gjavin une vore di medisinis
   Sin. rigjavâ , otignî , gjavâ fûr , cjapâ , cjoli , tirâ fûr
8. v.tr. (fig.) vê un risultât, spec. un util, un vantaç e v.i.:  […] ciarts possidents e mi àn preât / di mandâur ploie, se no fra cualchi dì / il sorturc al è lât. / Dolç di cûr, ur ai dit subit di sì; / […] / […] / Furlans, se o vês maniere cun Çorut, / rivais a gjavâi dut (Pieri Çorut, Il Strolic furlan par l'an 1852); oms e feminis di ogni etât a puedin gjavâ vantaçs fasint ogni dì ativitât fisiche (Guglielmo Pitzalis, Metiti in moto!)
   Sin. gjavâ fûr , rigjavâ , otignî , tirâ
9. v.tr. (fig.) pensâ o calcolâ alc partint di cierts dâts, elements, ideis, resonaments e v.i.:  dai risultâts di cheste ricercje i legjislatôrs e i aministradôrs a podaran gjavâ informazions che ju podaran indreçâ tes lôr sieltis (Linda Picco, Sandri Carrozzo, Efiets economics e ocupazionâi des leçs di tutele de lenghe furlane)
   Sin. dedusi , gjavâ fûr , rigjavâ
   
   1. rivâ a savê:  nancje Dorine e jere rivade a gjavâi ce che al faseve, ce che i passave pal cjâf (Pieri Menis, Chei di Muraie)
      Sin. gjavâ fûr
10. v.tr. [TS] zûcs cjapâ un numar in zûcs a estrazion:  la int e començave a ingrumâsi su la place par «viodi a gjavâ la tombule» (Pieri Menis, Chei di Muraie)

Polirematichis e espressions idiomatichis

• gjavâ fûr loc.v.
• gjavâ il cjapiel loc.v.
• gjavâ il sium loc.v.
• gjavâ la peraule di bocje loc.v.
• gjavâ sanc dal mûr loc.v.
• gjavâ un gri de buse loc.v.
• gjavâ un gri di tane loc.v.
• gjavâ un râf di ravine loc.v.
• gjavâ un ragn de buse loc.v.
• gjavant il batisim loc.av.
• gjavant lis sacris loc.av.

Proverbis:

• a Sant Simon si gjave il râf e il raviçon
• a volê gjavâ i clauts cui dincj si reste sdenteâts
• al è miôr che si brusi la cjase pluitost di gjavâ un miluçâr
• al è miôr gjavâ il sterp che no mangjâ la nole verde
• dal poç si gjave la aghe
• gjave e no met, la fontane a va a sec
• il mat al bute il clap tal poç e il savi al scuen gjavâlu
• il mont al è fat a scarpet: cui lu gjave e cui lu met
• l'om sdegnôs al semene difidencis, l'om pazient lis gjave
• no bisugne gjavâi lis surîs di bocje ai gjats
• no meti e gjavâ, dut cuant in curt al va
• no si po gjavâ sanc dal mûr
• nuie si met, nuie si gjave
• puar chel om che si lasse gjavâ i bregons
• ravi, ravi: cui che si 'nd vûl, si 'nd gjavi; ravi, raveti: cui che si 'nd vûl, si 'nd meti
• Sant Josef al plante la cuche, Sant michêl le gjave dute
• un gjave, un met e un sù pal stec
• une gjave, une met, une picje sù pal stec
• une ridade e gjave un claut de casse