Dizionari de Lenghe Furlane

tirâ vie    [AF]

1. loc.v. tirâ alc o cdn. par che al vegni vie:  il cjan al nasà, e su dute la rie dai zeis al spergotà pissin. Jacum al vosà: "Che e tiri vie il cjan e che lu puarti indulà che a son arbui!" (Angelo Covazzi, Jacum dal judiç)
   Sin. gjavâ vie , gjavâ
   Cfr. parâ vie , puartâ vie
   
   1. fâ che alc o cdn. nol stedi plui tal so puest o tal puest che al jere:  a freavin lis cjamaris, a lavavin la cusine, a tiravin vie lis telis di ragn sui cjantons e sul sofit (Pieri Menis, Il pignarûl); al vignì dentri un siôr sui cuarante, vistût a la buine, cu lis scarpis dutis pantanosis. Al tirà vie il capot e lu poià parsore une cjadree (Carlo Sgorlon, Prime di sere)
2. loc.v. fâ che alc nol esisti plui o che nol vedi plui efiet, validitât, impuartance e v.i.:  tal 1923, la Provincie di Gurize e fo tirade vie (Ferruccio Tassin, Autonomie tal Friûl austriac); al sunave la trombe, e eco alore che al è passât par "Vigji Trombe" e nissun al è plui rivât a tirâi vie chel sorenon (AAVV, Sul florî)
   Sin. taiâ , eliminâ , gjavâ , gjavâ vie , scancelâ
3. loc.v. fâ che cdn. nol sedi plui intune cierte cundizion, situazion e v.i.:  une biele zornade mi àn tirât vie dal ufizi [de bancje], indulà che o fasevi somis dut el dì, e metût al sportel (Arturo Feruglio, El sardelon)
   Sin. gjavâ vie , gjavâ
   Cfr. mandâ vie , parâ vie
4. loc.v. fâ une sotrazion o gjavâ un element di un cont:  par la cuâl, completant il cont bessôi, tirant vie i vecjos spossents e i militârs […], i predis […], i contadins che a scuegnin fermâsi a molzi ancje il dì di Pasche, e la int che no po molâ il lavôr nancje a fiestis, ognun al à podût constatâ che ducj i talians, nissun falât, a son partîts pal prin esodo (Riedo Pup, I talians in esodo)
   Sin. gjavâ , gjavâ vie
5. loc.v. movisi indevant o slontanâsi:  il cont al saludave dulintor cuntun moto lizêr de man, tant che un vescul, e al tirave vie (Gianni Gregoricchio, Îr e doman)
   Sin. lâ indenant , lâ indevant , lâ vie dret , lâ dret , lâ dilunc , tirâ dilunc
6. loc.v. continuâ intune azion:  cussì, inviât une volte il discors, Menaç l'à tirât vie a leiur la vite ai feudataris di Laipà, cun grant divertiment de glemonasse (Giovanni Gortani, Lant jù pe Tresemane)
   Sin. lâ indevant , lâ dilunc , parâ indevant , parâ indenant , continuâ , tirâ dilunc , tirâ indevant , tirâ indenant
   
   1. durâ, restâ, mantignîsi:  e no son novitâts; al tire vie… / un timp nulât e di malinconie (Pieri Çorut, Il Strolic furlan par l'an 1851)
7. loc.v. dâ cun fuarce:  al rivave un cjan, raze cuze, a fâ 'sisin intor dai zeis. La sô parone e faseve fente di no viodilu, e Jacum une biele dì i tirà vie une pidadone (Angelo Covazzi, I dincj)
   Sin. molâ , slungjâ

Components:

• tirâ v.tr., v.intr.
• vie s.f., av., inter., s.m.sing., prep.