Dizionari de Lenghe Furlane

lâ indenant    [FO]

1. loc.v. (ancje fig.) procedi, vê un moviment intune cierte direzion, ancje cun sens di continuitât:  il nono al veve un pocje di pôre, al è vêr, ma al leve indenant istès. Al leve jù pe rive (Pieri Menis, Gno nono); i bûs a lavin indenant simpri cun chel bot (Maria Forte, L'avôt)
   Sin. lâ dilunc , lâ indevant , tirâ dilunc , tirâ indevant , tirâ indenant
   
   1. tacâ un moviment, slontanâsi di un puest o di une compagnie:  Aulo al ero rivât. "Bon, anìn indenant". I ero montâts sù pe macheno di Sabrina, par tornâ sù a cjaso (Fulvio ReddKaa Romanin, Geologicamente impossibile)
      Sin. lâ , lâ vie , lâ dilunc , lâ indevant
   2. partî prime di cdn. altri:  "Lait indenant un moment, voaltris!… Us cjapi par strade, jo!…" (Arturo Feruglio, In cîl e je une stele!…)
   3. vê une estension o prosecuzion intune cierte direzion:  la strade e va indenant fin li che al tache il bosc, dopo no je plui strade, al è troi
      Sin. lâ indevant , lâ dilunc
2. loc.v. svicinâsi a une fin, a un obietîf, a un risultât e v.i.:  "Ce fasêso culì, simpri cjacarâ, simpri tabaiâ, e intant i lavôrs no van indenant" (Pieri Somede dai Marcs, Ursule)
   
   1. vê une evoluzion, une cressite:  cuant che un popul al va indenant, il so fevelâ si svilupe, si distire, si articole, si perfezione (Josef Marchet, Un element fondamentâl dal moviment autonomistic)
3. loc.v. rivâ a vivi, a frontâ problemis, spesis e v.i.:  "[…] mi va dut in spesis, in famee sin masse in pôcs, no sai cemût che si larà indenant…" (Pieri Somede dai Marcs, Vilie di Nadâl (teatri))
   Sin. tirâ indenant , tirâ indevant , lâ indevant
4. loc.v. vê une durade intal timp:  il discors al le indenant par un biel pôc (Roberto Ongaro, Cretevierte); po dopo si à metût sù: il "M.A.F.". Ancje chel al è lât indenant un pôc e po si à fermât (Redazion La Patrie dal Friûl, Il motôr e il penâl)
   Sin. lâ indevant , lâ dilunc , slungjâsi , continuâ , durâ , tirâ dilunc , tirâ indevant , tirâ indenant
   
   1. dal timp, passâ:  cul lâ indenant dai mês, par altri, l'om si jere come rindût (Gianni Gregoricchio, Îr e doman)
      Sin. passâ , lâ vie , lâ indevant , lâ dilunc
   2. vê une cierte forme di jessi, di sucedi, di fâ e v.i. che e dure intal timp:  Signôr benedet, ce batiment di cûr, garantide che se va indenant cussì o finirai cul malâmi" (Pieri Somede dai Marcs, Cjase di fitâ)
      Sin. lâ indevant , lâ dilunc
5. loc.v. procedi intune azion za tacade, fâ une azion in maniere continuade o ripetude, che e pues jessi ancje sotintindude:  a lerin indenant a fevelâ fin mieç bot (Agnul di Spere, Un de maiorance); "[…] cence un model, jo no podarai lâ indenant cul mio lavôr" (Costantino Smaniotto, Co l'amôr al cimie); «Mame, no stâ a distudâ il ferâl, che o ai pôre.» «Pree e tâs, i fruts bogns no àn mai pôre.» Po e leve indenant: «Signôr, dait la pâs ai vîfs e la recuie ai puars muarts» (Pieri Menis, Cjasute dai ricuarts)
   Sin. lâ indevant , lâ dilunc , parâ indevant , parâ indenant , continuâ , tirâ dilunc , tirâ indevant , tirâ indenant , tirâ vie

Components:

• indenant av., adi.inv., s.m.inv.
• lâ v.intr., s.m.sing.

Proverbis:

• cui che nol va indenant al torne indaûr
• lâ indenant dì par dì tant che i uciei