Dizionari de Lenghe Furlane

indenant  /-à-/  in|de|nant  [FO]

1. av. de bande che si cjale o che si va, te posizion o te direzion che e je in face de persone che e fevele o de persone o robe che e costituìs il pont di riferiment:  il predi, vieli e pleât indenant, al lave sù pe androne (Pieri Menis, Il fi de Rosse); i ôcs ur zigavin di rassanâts, cul bec indenant, viert di fâ pôre (Maria Forte, I ôcs di Miute)
   Sin. indevant , devant , denant
2. av., adi.inv. in posizion di vantaç o plui alte o prime intune classifiche:  al à finît la gare indenant, tra i prins dîs de classifiche finâl
   Sin. indevant , devant , denant , adalt , sù
3. av. tal timp passât o che al ven prime di un ciert moment:  al sarès stât un delit chel di pierdile a mone vie cence un tentatîf indenant (Meni Ucel, Prioritâts); il guvier basc al à decidût di spostâ di un an indenant la jentrade in vore dal decret (Carli Pup, Paîs Basc: nuie multis pes aziendis che no rispietin i dirits linguistics)
   Sin. prin , prime¹ , devant , denant , indevant
4. av., adi.inv. tal timp futûr o che al ven dopo di un ciert moment:  i doi si inviarin cence che nissun si scomponès par lôr. Ma cualchi dì indenant, i menaus che a passavin par là a faserin une scuvierte (Josef Cjargnel, I pagans di Muine); ma a na fo na flaba un pôc di meis indenant, cuant che jê a sa lu cjatà via pai Priecs, tal mieç dai cjamps di sorc: «Adès mo i ti ai ve, santa Lussia, i ti ai e i na tu mi scjampi» (Novella Cantarutti, La passion di Donât Ramaç); si veve di meti in bande i rancûrs e di cjalâ indenant (Cristina Noacco, Faliscjis)
   Sin. dopo , daspò , daûr
5. av. in complements di lûcs o di timp, par segnâ un tiermin di inizi:  intal 2006 la Zornade Furlane dai Dirits e je stade cjapade sù ancje di Radio Onde Furlane che, di chel an indenant, e à decidût di fâ deventâ i 27 di Fevrâr une dì di fieste (Carli Pup, Zornade Furlane dai Dirits numar 5)
   Sin. indevant , inlà
6. adi.inv., av. che al è za tacât e in part passât:  nol veve vût, nancje timp, il paron todesc, di cjatâ un capuçat di mistîr, parcè che la stagjon e jere indenant (Maria Forte, La tiere di Lansing); la gnot e je indenant. Intes garetis, i Cosacs a fasin la vuardie e a tegnin bot ae sium (Ivano Urli, Storie di Min)
   Sin. plen , profont , tart , indevant
7. adi.inv., av. dongje de conclusion, de realizazion e v.i.:  al è in bal ancje un progjet, aromai une vore indenant, par fâ une postazion telescopiche (Gloria Angeli, Osservatori Astronomic di Talmassons)
   Sin. a bon pont , indevant
8. adi.inv., av. che al è o che al fâs alc in anticip:  o soi un an indenant. O ai saltade la prime elementâr (Carlo Sgorlon, Prime di sere)
   Sin. indevant , prin , prime¹
   
   1. di orloi, che al segne une ore che no je ancjemò rivade:  o ten simpri l'orloi cualchi minût indenant, cussì no voi a pericul di rivâ tart
9. adi.inv., av. che al è a un nivel alt tal disvilup sociâl, economic, tecnologjic e v.i.:  contescj - dai Paîs catalans ae Galizie, de Irlande al Paîs Basc - là che e je une normative di tutele che, almancul su la cjarte, e je une vore indenant (Marc Stolf, A Bruxelles, a Bilbao e a Udin: «O volìn une Europe pardabon unide te diversitât»)
   Sin. progredît , disvilupât , indevant , avanzât
10. adi.inv., av. (fig.) orientât aes novitâts, ae inovazion, al progrès, ae modernitât:  a sostignivin un program une vore indenant par chei timps: un salari compagn a chel dai oms, la assistence tai mês subit prin e dopo dal part, la pussibilitât di podê vê puescj di vore in cualsisei implei e no dome ta chês voris mancul cualificadis (Gotart Mitri, Une furlane cuintri la vuere e pai dirits des feminis)
    Sin. gnûf , moderni , progressist , progredît , indevant , avanzât
11. adi.inv. che al à une inteligjence svelte:  int tant indenant di jessi za rivade a capî e a judicâ lis vicendis e i fats, no dal cemût che a vegnin presentâts, ma dal significât che a àn in sostance e dal parcè che a sucedin (Riedo Pup, La civiltât dal fum)
    Sin. inteligjent , svelt , sveât , indevant
12. s.m.inv. [TS] sport intal rugby, fal che al sta intal tirâ par indenant la bale cu lis mans

Polirematichis e espressions idiomatichis

• cjapâsi indenant loc.v.
• di ca indenant loc.av.
• di chi indenant loc.av.
• di culì indenant loc.av.
• di cumò indenant loc.av.
• e vie indenant loc.
• fâ indenant loc.v.
• fâ un pas indenant loc.v.
• lâ indenant loc.v.
• mandâ indenant loc.v.
• mandâ indenant la barache loc.v.
• meti indenant loc.v.
• meti lis mans indenant loc.v.
• parâ indenant loc.v.
• parâ indenant la barache loc.v.
• puartâ indenant loc.v.
• sburtâsi indenant loc.v.
• simpri indenant loc.av., loc.adi.inv.
• tirâ indenant loc.v.
• tirâ indenant la barache loc.v.
• vignî indenant loc.v.

Proverbis:

• cuant che si crôt di là un pas indenant, si va doi indaûr
• lis tristis gnovis a van simpri indenant
• ogni pît tal cûl al pare indenant