Dizionari de Lenghe Furlane

vignî indenant    [AF]

1. loc.v. movisi in direzion frontâl, in mût di svicinâsi a cui che al fevele o a un pont di riferiment o ancje cence un riferiment clâr:  ogni sabide par chê stradele ret la risultive al comparìs un cjan blanc, e di lontan su la strade gnove si sint a cori une caroce che mai no ven indenant (Catarine Percude, Il cjan blanc di Alturis); la int e calcolave che la burascje e fos passade, invezit tor dai ultins di Lui dal '66 al fo dât l'alarme: i Talians a vignivin indenant cuintri di Martignà! (Riedo Pup, La invasion); te gnot al veve neveât e o crodevi che nissun nol vignìs indenant; invezit eco che aes dîs in pont al rive in otomobil il proveditôr… (Pieri Somede dai Marcs, Lis scuelis e la nêf)
   Sin. fâsi indevant , vignî indevant , fâsi indenant
   Cfr. vignî dongje , vignî incà
   
   1. ancje in formulis di benvignût, par dî di jentrâ a cui che al rive o che al domande cun permès:  "Riverît siôr dotôr, vin bisugne di lui…" "Vignît, vignît indenant, di dulà sêso?" (Pieri Somede dai Marcs, L'avocat e la luianie); a pene jentrât lui, a vevin tasût a colp. «Ma jo o disturbi» dissal Eliseo. «Nancje par insium. Vignît indenant» dissal l'om di Jolande (Carlo Sgorlon, Prime di sere)
   2. ancje di un event, di une situazion e v.i. svicinâsi:  Vera e sa ce che e sa de vuere e dal montafin che al ven indenant (Ivano Urli, Storie di Vera)
2. loc.v. vê une evoluzion, sucedi, capitâ:  cul vignî indenant dal Istât, lui al cjapà sù la usance di sentâsi difûr, su la piere dal puarton, sore sere (Gianni Gregoricchio, Trê feminis); la storie no torne mai indaûr par dontri che je vignude indenant (Josef Marchet, Fûr cui che i tocje); ma nissune novitât e vignive indenant [no spietave un frut] e sô madone, cul timp a le cjalave cuntun altri voli (Pieri Somede dai Marcs, A jerin lagrimis)
   Sin. vignî indevant
3. loc.v. vignî a fevelâ, a fâ propuestis, a vê pretesis e v.i.:  "[…] cuant che tu vegnis indenant cun mil mignognulis al vûl dî che tu âs bisugne di bêçs" (Pieri Somede dai Marcs, La buteghe dal barbîr)
   Sin. fâsi indevant , vignî indevant , fâsi indenant , vignî dongje , vignî incà

Components:

• indenant av., adi.inv., s.m.inv.
• vignî v.intr., v.aus.