Dizionari de Lenghe Furlane

tart  tart  [FO]

1. av. dopo dal timp previodût o necessari, just e v.i.:  mancumâl che la int, sul lavôr, e bat la sflacje, che e à il vizi di rivâ tart e partî adore (Riedo Pup, La sflacje e merte un premi); o slungjavi il pas par no rivâ masse tart (Josef Marchet, Lis predicjis dal muini)
   Var. tarts
   
   1. di sere o di gnot, in assolût o cuant che e sarès za passade la ore di tornâ, cenâ, lâ a durmî e v.i.:  al è tart e al è scûr, e nissun dai siei no lu viôt a rivâ tal curtîl (Meni Ucel, Dolfo); «O jentri dome a saludâ la siore parcè che al è tart e no si pâr bon a disturbâ» (Maria Forte, La tiere di Lansing)
2. adi. che al è, che al fâs alc, che al sucêt e v.i. dopo di ce che al jere previodût, necessari, just e v.i.:  "No stâ dâti pinsîrs par jê, agne; e jeve simpri tarde, e je usade cussì" (Franca Mainardis, Il sium di Lissandri); "O sês rivade tarde Sante. Scometìn che, par strade, o vês cjatât il morôs?" (Maria Forte, Cjase di Dalban); sarà tarde a vignì la Primevere, / parcè che il frêt la tegnarà indaûr (Pieri Çorut, Pronostic del 1821)
   
   1. indevant inte sere o te gnot:  la strade e jere vueide e la ore une vore tarde (Carlo Sgorlon, Ombris tal infinît)
3. adi. di un moment sucessîf rispiet a altris:  i documents di ûs pratic de Ete di Mieç, de tarde Ete di Mieç, a son ancje pal Friûl lis fonts plui interessantis pal studi dal volgâr dai prins secui (Federico Vicario, Documents de Ete di Mieç pal studi dal furlan antîc)
4. adi. di cdn. che al mancje di prontece in alc, spec. inte inteligjence o tune facoltât:  al è tart di capî (Giulio Andrea Pirona, Ercole Carletti, Giovanni Battista Corgnali, Il Nuovo Pirona); Rico nol sint, tart di orele che al è (Meni Ucel, La visite dal vescul)

Polirematichis e espressions idiomatichis

• o timp o tart loc.av.
• plui tart loc.v.
• sul tart loc.av.
• timp o tart loc.av.

Proverbis:

• a buinore in pescjarie e tart in becjarie
• a paiâ denant trat, o tart o mâl fat
• adore a marcjât e tart a la vuere
• dute chê blave che si semene tart e ven cincuantìn
• il semenâ tart se al fâs bon prodot e je une sorte
• la veretât o tart o a buinore e ven in lûs
• miôr tart che no mai
• o tart o a buinore l'ostîr al va in malore
• o tart o adore la bausie tant che il vueli e ven parsore
• o timp o tart si pailis dutis
• paiâ denant trat, o tart o malfat
• par fâ lis fotis nol è mai masse tart
• prin di Mai Sant Jacum e Filip o cjatai, tierce dì Sante Crôs e fuì, un pôc plui tart Sant Gotart, e tal doman Sant Florean
• tart a dentî, tart a murî
• vegnie tarde la Pasche o a buinore, di là a durmî daspò gustât e je simpri ore