Dizionari de Lenghe Furlane

daspò  das|pò  [FO]

1. av., prep., adi.inv. plui tart, tun moment, tun timp sucessîf, ancje cun riferiment a une sucession plui ideâl che cronologjiche o ancje fasint intindi un rapuart di cause e efiet:  sul imprin ti vegnin tal cjâf un grum di ideis, daspò tu ti fasis une schirie di domandis, di chês che salacor prime no ti passavin nancje pal sintiment (Fabian Ros, Il lôf); Laurinç al jere un di chei puems che daspò gustât a spietavin plui di dôs oris prin di fâ il bagn, tirant slavaris tal spieli de aghe (Agnul di Spere, Istât); pôcs dîs daspò, il 16 di Setembar, il gjornâl "La concordia" di Turin, un sfuei di tindince mazziniane e radicâl, al publicave un violent articul cuintri Cavedalis (Giovanni Pillinini, Zuan Batiste Cavedalis - Une vite esemplâr); tai agns subit daspò la indipendence irlandese (1922), in dutis lis nazions "celtichis" de Grant Bretagne a nasserin moviments politics pal autoguvier (Sergio Cecotti, Il risultât eletorâl dai partîts di identitât teritoriâl - A case study: Scottish National Party)
   Sin. dopo , daûr , po dopo , po
   Var. daspuò , dospò , dapò
   
   1. s.m. ce che al ven plui tart tal timp, dade di timp sucessive a un ciert tiermin:  il taramot, te storie furlane dal secul XX, al segne un prime e un daspò
2. av., prep., adi.inv. plui inlà tal spazi, intun lûc sucessîf:  se si ven a Udin cul tren di Cjasarse, la prime fermade e je Codroip, chê daspò e je Basilian; il bagn al è la puarte daspò de sô cjamare (Laurin Zuan Nardin, Il rucjin)
   Sin. daûr , dopo , po dopo , po
3. av., prep., adi.inv. intune posizion sucessive o secondarie intune scjale di valôrs:  prime di dut i vûl la salût, daspò dut il rest
   Sin. daûr , dopo , po dopo , po
4. av. (enf.) par segnâ il passaç a un gnûf argoment o element:  no stin daspò a fevelâ de popolazion dal Friûl Orientâl, di secui tiere imperiâl, dulà che un altri gjenerâl talian al faseve savê che la int e pandeve la sô ostilitât (Carli Pup, La seconde Irlande)
5. coniun. par introdusi aversativis:  al somee che ancje lis lenghis umanis a coventin a dividi biologjichementri i popui che lis fevelin. Al vûl dî che oms e feminis che a fevelin la stesse lenghe a fasin plui vulintîr fîs insiemi. Daspò tal particolâr al pues sucedi di dut (Franc Fari, Il cjâf dai furlans)
   Sin. dopo , po , po dopo , po daspò , par altri , ma , però , cun dut achel
6. av. in espressions enfatichis, par rimarcâ che al è za timp che une azion e je inviade:  e File: «Vignîso, / daspò che si clame! / Se us cjatin i zingars! / Se us cuche la mame!» / E ur sberle e ur insegne / e un pôc si invelegne. (Enrico Fruch, I fruts di Catine)
   Sin. dopo mai , daspò mai

Polirematichis e espressions idiomatichis

• daspò cene loc.av., loc.s.m.
• daspò che loc.coniun.
• daspò Crist loc.adi.inv.
• daspò di loc.prep.
• daspò di cene loc.av., loc.s.m.
• daspò di Crist loc.adi.inv.
• daspò di misdì loc.av., loc.adi.inv., loc.s.m.
• daspò gustât loc.av.
• po daspò loc.av.
• prime o daspò loc.av.
• prin o daspò loc.av.
• sierâ la puarte dal cjôt daspò scjampât il purcit loc.v.
• vignî daspò loc.v.

Proverbis:

• al è miôr vê pôre prin che no daspò
• bisugne pensâ prin, par no pintîsi daspò
• cuant che la vacje no mangje cuant che il bo, o che e à mangjât prin o che a mangje daspò
• cuant che si sune daspò tampiestât, al è tant che no vê sunât
• cui che nol fâs prin al fâs daspò
• denant di maridâsi al pâr che al mancji alc, daspò al mancje dut
• la Istadele di Sant Martin daspò trê dîs e po vê fin
• la nêf daspò Nadâl no fâs solâr