Dizionari de Lenghe Furlane

però  pe|rò  [FO]

1. coniun. cun sens aversatîf:  architeture «spontanie», semplice e essenziâl, però in armonie cul ambient (Roman Michelot, La cjase dai contents); tai ultins agns de sô vite, aromai malât, [Afro Basaldella] al torne in Friûl. Al mûr, però, a Zurì, in Svuizare, tal 1976 (Luca De Clara, Afro Basaldella)
   Sin. juste , ma , ma ben , par altri , purpûr , ma però
   
   1. ancje cence un vêr sens aversatîf, plui par introdusi une precisazion, une zonte, e v.i.:  "La nestre imprese e à cjapât comissions inte Gnove Scozie, tal Labrador, te Terranova, simpri in Canadà. […]" - La comesse plui impuartante però e je la ultime: Mario Collavino al è il costrutôr de Freedom Tower (Oscar Puntel, Mario Collavino: une bandiere furlane parsore il gnûf World Trade Center di New York); [il diaul] si dîs pront a fâ la vore: a un pat, però, che la prime anime che e passarà sore il so puint, a vevin di sproferîje a lui (Josef Cjargnel, Il puint dal Diaul)
2. inter. par pandi maravee, amirazion o ancje dome par introdusi une afermazion cun enfasi:  "Però, o 'ndi vês di robe, culì…" [intune buteghe di souvenirs] (Alan Brusini, Gian Paolo Linda, I forescj)
   Sin. di die , eh folc , par die , po folc , ve , ve po