Dizionari de Lenghe Furlane

svelt  /-è-/  svelt  [FO]

1. adi. che si môf cun velocitât:  trop svelte corie une machine? Cent? Cent e cincuante? Dusinte? (Stiefin Morat, Donald dal Tiliment)
   
   1. che al fâs alc in pôc timp:  tes oris di vore e insegnave cu la biele maniere a sei svelts tal lavôr (Alan Brusini, Come tai romançs); a dopravin saldo il feret, cun chês mans sveltis e industriadis (Maria Forte, Cjase di Dalban)
   2. che al fâs daurman, ancje tant che esortazion:  Gjovanin, va svelt a clamâ tiei fradis (Pieri Somede dai Marcs, Il prossim); «Svelt, svelt! Salte fûr, poltron, messediti. Tal jet no si cumbine nuie. Si sta li nome cuant che si è malâts!» (Carlo Sgorlon, Il dolfin); «Dorine… Dorine… Cui aial sierât il puarton… Dami la clâf svelte, Dorine… La clâf… la clâf…» (Pieri Menis, Chei di Muraie)
   3. che al sucêt in pôc timp:  al jere stât dut masse svelt, masse brut, masse tragjic e trement par che il lôr cjâf al ves podût seguî cun clarece i fats (Roberto Ongaro, Il muc)
2. adi. di alc, fat in curt, in pôc timp:  o fasevin une gulizion svelte cun polente rustide sul spolert, o pan vecjo, lat e cafè cul vuardi (AAVV, Lis scuelis di Buie)
   Sin. bugât , imburît , inviât , lest , rapit , sburît , sclet , sfilât³ , spedît
3. adi. di cuarp, cence gras, di formis elegantis:  le viodeve a cressi biele, cun chei voi di un turchin di cjicare, […] la figure svelte e i cjavei imbocolâts (Maria Forte, La tiere di Lansing); a veva gnervadura suta e vita svelta (Novella Cantarutti, Paron Salvadi)
   Sin. sclagn , slançôs , sut
   
   1. ancje di struture o robe no animade, che e je plui lungje o alte che no gruesse, che intes liniis e pant verticalitât
4. adi. (fig.) che al à prontece di comprension e di azion:  un fantat svelt, che al lavore pulît e che al sa l'inglês (Stiefin Morat, Donald dal Tiliment); un omenut di chei che ur plâs di stâ in buinis cun ducj - cui drets e cui stuarts, cui svelts e cui gnognos (Josef Marchet, Lis predicjis dal muini)
   Sin. sveât
5. adi., s.m. (fig.) facil di capî, di lei, di viodi, di doprâ e v.i.:  un dizionari ortografic sempliç e svelt (Sandri Carrozzo, Jentrade dal DOF); il notiziari […] "Friûl 7" […] al è un prodot svelt e curât intai detais (Max Mauro, Un Friûl difarent: i 90 mhz di Onde Furlane)
   Sin. slis
6. adi. di sume di bêçs, fate di monedis e di bêçs di cjarte:  cirî un sportel [di bancje] e vê bêçs svelts (Barbara Cinausero, Buteghîrs e ristoradôrs a daran fûr bêçs licuits)
   Sin. contant , licuit

Polirematichis e espressions idiomatichis

• a la svelte loc.av.
• a svelt loc.av., loc.adi.inv.
• ae svelte loc.av.

Proverbis:

• miôr passâ par stupits che par masse svelts
• nol è mai un svelt che nol sedi un plui svelt