Dizionari de Lenghe Furlane

sut  sut  [FO]

1. adi. no bagnât:  si cambiarin dal dut, par sintîsi intor vistîts suts e cjalts (Carlo Sgorlon, Ombris tal infinît); il modon, di grîs, al deventave zalut, sut (Dino Virgili, La aghe da pît la cleve)
   Sin. sec , suiât
2. adi. di flums, lâts, e v.i., cence aghe:  a jerin i cjamps di blave cui penacs fers te canicule, e la lavie sute dal Cuar e taiave i cjamps di sclavueç (Agnul di Spere, Vivi a Codroip)
   Sin. incandît , incantesemât , suiât
3. adi. cence umiditât o cun pocje umiditât:  [lis corints di Est e Nordest] a menin aiar sut, che al puarte biel timp, ma vie pal Invier l'aiar al pues jessi ancje une vore frêt (Stefano Micheletti, Marcellino Salvador, Notis di meteorologjie pal Friûl - Vignesie Julie); une nêf sute, farinose e veve scomençât a colâ, fisse fisse, mulinade, sburtade dal tramontan e de buere (Pieri Somede dai Marcs, Nardon e Vigjute di Nani)
   
   1. cence ploie ni fumate:  se e capite une pestadice di tampieste, se l'Istât al ven masse sut o masse bagnât, […] nol zove nuie ni vê butât ledan (Josef Marchet, Lis predicjis dal muini)
4. adi. di robe di mangjâ, soredut di prin plat, servide no in forme di mignestre, cence brût:  "Ma alore ce aio di mangjâ?" "Rîs sut, rîs in brût di verdure, patatis lessis o in purè e po da gnûf rîs, rîs e rîs" (Bruno Paolo Pellarini, L'anel striât)
5. adi. di robe di mangjâ, cence companadi, cence nuie altri dongje:  une fete di polente sute che i venive dade di culizion (Giovanni Gortani, Il viaç di Vidisson)
   Cfr. discolç , rût , arût , sôl
6. adi. di materiâl o sostance, che nol è plui licuit o viscôs:  spietâ fin che la cole no je sute
   Sin. secjât , sec
7. adi. (fig.) di cuarp o part dal cuarp, no gras:  al cjatave la Menie simpri in gjambe tes voris. Une femine alte e sute, cu la cotule simpri tirade sù in code par no poçolâsi (Maria Forte, La fie çuete)
   Sin. svelt , slançôs , smilç , snel , sclagn , magri
8. adi. (fig.) cence elements decoratîfs in plui:  la forme sute dal stîl legjislatîf (Adrian Cescje, Memoriis di politiche linguistiche)
   Sin. curt , essenziâl , net , svelt
   
   1. cun pocje espressivitât o cun espression dure:  - Ah, cussì e je? - al veve dite subit dopo cun vôs sute (Gianni Gregoricchio, Trê feminis); i rispuindei sut sut che i varès dât un voli a lis cjartis e che al spietàs il judizi de comission (Pieri Somede dai Marcs, Chel de formadiele)
9. adi. che nol à bevût, che al à bisugne di bevi, ancje alcolics:  us prei ogni ben, / paiaiso di bevi? / Soi sut come un len (Toni Broili, I trucs furlans 1847); jo fra ducj, jo sôl, puar diaul, / sut la gole, a bocje zune, / passi Autun cjalant la lune / cul mio classic canocjâl (Pieri Çorut, Lis vendemis)
10. adi. (fig.) cence bêçs, viôt a sut
11. s.m. dome sing., teren no bagnât o ambient cun pocje umiditât:  colomps e cisilis / e svolin pardut, / becolin e cirin / tal umit, tal sut, / e van a passon / par ogni cjanton (Enrico Fruch, Te cort)
    Sin. sec
    
    1. la tiere de rive, in contraposizion cu la aghe di un flum, dal mâr e v.i.:  finalmenti al è sul sut, al è in salf su la riva! (Federigo Comelli, Il me paîs)
12. s.m. timp meteorologjic cence precipitazions e cence umiditât:  il sut di l'an passât nus à fiscâts… Timp di fam… (Dino Virgili, La aghe da pît la cleve); o cetant buine chê ploie dopo tant sut (Pieri Somede dai Marcs, La ultime firme de mê podestarie)
13. s.m. puest o cundizion cence aghe, cence umiditât:  meti in sut i fusîi (Antoni Brumat, Compendi di ducj i contegnos pal soldât comun tant in guarnigjon, come in cjamp devant il nemì, cul zurament e i articui di vuera)
14. s.m. (fig.) scjarsetât o mancjance di jentradis economichis, di risorsis, di trafic comerciâl e v.i.:  a son timps di sut e jo no pues cjamâmi di un altri lavorent (Gianni Gregoricchio, Delchi)
    Cfr. miserie , crisi , cjarestie , criùre

Polirematichis e espressions idiomatichis

• a bec sut loc.av., loc.adi.inv.
• a bocje sute loc.av., loc.adi.inv.
• paste sute loc.s.f.
• polente sute loc.s.f.
• restâ a bocje sute loc.v.

Proverbis:

• cuant che al cjante il cuc, une dì ploie, une dì sut
• cuant che il poç al è sut, si sa trop che e vâl la aghe
• Diu nus vuardi dal sut tra lis dôs madonis
• Diu nus vuardi simpri dal sut
• la canicule se e cjate bagnât e lasse bagnât, se e cjate sut e lasse sut
• lune di brume mieze sute e mieze bagnade
• Març sut, Avrîl bagnât, Mai temperât, beât chel che al varà semenât
• sut di Zenâr al jemple il granâr
• ulîf bagnât, ûfs suts; ulîf sut, ûfs bagnâts