Dizionari de Lenghe Furlane

sôl  sôl  [FO]

1. adi. cence la presince o vicinance di altris personis o di altris elements de stesse sorte:  al jere tornât de vuere cuntun braç sôl (Gianni Gregoricchio, Trê feminis); che al mi permeti, volarès cjacarâ za che o sin sôi (Costantino Smaniotto, Co l'amôr al cimie); jê si sintiva cussì sola là drenti e bramava tant cualchidun che la capìs (Ugo Pellis, Catinuta)
   Sin. isolât , bessôl
   
   1. cence zontis, priontis o elements ancje di altre sorte:  il frico, plat fat di formadi frit, sôl o cun altris ingredients tant che patatis, cevole (Sandri Carrozzo, Frico un plat furlan cuntun non di origjin foreste)
2. adi. unic, cun esculsion di cualsisei altri:  i puartà, malvulintîr, un pâr di zâi di Conan Doyle disint che chê e jere la sole leture che al podeve permetii (Amedeo Giacomini, Tal ospedâl); culì, la sole autoritât e je la mê: o soi jo che o rapresenti la leç (Alviero Negro, Int di masnade); la aghe e il cîl a jerin di un sôl colôr (Dino Virgili, La aghe da pît la cleve)
   Sin. unic
   Cfr. nome , dome
3. av. par pandi limitazion, esclusivitât e v.i.:  ce vûstu, chê femine cuant che o torni la sere, mi fevele sôl di afârs (Angelo Covazzi, Il fioç svilupât); Madonute Sante, […] fâs che al sei sôl un brut sium il mio (Pieri Somede dai Marcs, Mame…); Una veva vût siet creaturis e gji jerin restadis sôl dôs (Federigo Comelli, Il me paîs)
   Sin. dome , nome , juste
4. av. cun valôr aversatîf o par introdusi une ecezion, une precisazion:  al è un bon fantat, sôl un pôc sierât di caratar
   Sin. dome , nome , juste

Polirematichis e espressions idiomatichis

• biel sôl loc.adi.
• di une peraule sole loc.adi.
• vê une peraule sole loc.v.

Proverbis:

• a san plui un dotôr e un vilan che no un dotôr sôl
• al è stât un sôl galantom in chest mont e ancje chel al è muart picjât
• al è stât un sôl galantom in chest mont e lu àn metût in crôs
• al va a finîle mâl chel lôf che al à une sole tane
• chei che a duarmin sot di un bleon a son di une sole opinion
• cui che al à un sôl cjamp al fâs un ort, cui che al à un sôl fi al fâs un porc
• cui che al mangje sôl al crepe sôl
• cuntun len sôl no si fâs fûc
• cuntun sôl laç no si cjape il jeur
• cuntune man sole no si rive nancje a bati lis mans
• cuntune sole fave no si po cjapâ doi colomps
• Diu sôl nol à difiet
• fi sôl: o mat o lôf
• il jet no si lu fâs par durmî une sole sere
• il marcjadant nol sta mai sôl
• il mont al va sôl
• il savi nol è mai sôl
• l'orloi nol va sôl
• la femine e ten sù trê cjantons de cjase, l'om un sôl
• la reson e je une sole
• la tegne no i ven mai a di un sôl cjâf
• la tegne no nas mai di un sôl cjâf
• lari e avocat al è un non sôl
• lis disgraciis no van mai solis
• miôr sôi che no in triste compagnie
• miôr sôi che no mâl compagnâts
• no si cjol la ombrene par une sole ploie
• no si fâs il tet par une sole ploie
• no si taie mai l'arbul cuntun sôl colp
• nuie miôr che sôi par sei sigûrs
• si vîf une volte sole e daspò muarts no si campe une ore
• sôi no si sta ben nancje in paradîs
• tal paîs dai vuarps al è fortunât chel che al à un voli sôl
• un len sôl nol fâs fûc
• un sôl ingrât ur fâs mâl a trops pitocs
• une gjate no si sgrace mai sole
• une sole cocule no fâs sunsûr
• vuarditi di chel che al lei suntun sôl libri