Dizionari de Lenghe Furlane

bessôl  be|ssôl  [FO]

1. adi. che al è intun ciert lûc cence la presince o vicinance o compagnie di altris:  Antoni Cossâr al jere sentât bessôl, bessôl denant di une tace di bire (Agnul di Spere, L'avignî di Antoni Cossâr); mi pareve che a fossin i pas di un om bessôl (Checo Tam, X-Reihen)
   Sin. sôl , di bessôl
   Var. belsôl , bielsôl
   
   1. ancje di une robe inanimade, che no 'nd à altris de stesse sorte dongje:  al jere, tal mieç de plane furlane, passe vincj miis a tramontane, un piçul cuel bessolin (Josef Cjargnel, Il cjistiel di Udin)
   2. di lûc, che nol à int dentri:  al tornave indaûr e si imbusave te sô cjamare bessole butantsi vistût sul jet (Alan Brusini, Par stradis lungjis); si sintivin pas misurâts che a batevin a timp come tun çondar, là difûr, te strade bessole (Maria Forte, Dome la cjampanute di Sant Bortul)
   3. che al è cuntune altre persone o cun altris personis cognossudis, ma separât o lontan o no in compagnie di altris no cognossudis:  Ugo e Michêl a jerin doi vedrans dal gno paîs che a vivevin bessôi, dividintsi i lavôrs di cjase, di stale e di campagne come brâfs omenuts (Meni Ucel, I laris)
   4. che al è l'unic a vê ciertis carateristichis:  e à non Irka cheste frute polache, femine bessole intun sierai di presonîrs politics talians (Ivano Urli, Storie di Min)
   5. cence altris robis dongje o insiemi:  mangjâ polente bessole
2. adi. cence famee e cence leams:  Ancje Dele, par altri, e jere bessole, cui siei agns di femine passâts dibant, cence une vite daûrsi, cence un stât ore presint (Dino Virgili, La massarie)
   Sin. sôl , di bessôl
   
   1. restât cence cualchidun che prime i steve dongje:  lui al è scjampât di cjase e jê e je restade bessole cul so frutin e sô madone viele (Pieri Somede dai Marcs, Par une lengate)
3. adi. che al à o al da une sensazion di solitudin, di mancjance di compagnie:  nissun diseve un chic… ognun al jere bessôl cui siei pinsîrs (Pieri Menis, La vuere sul Freikofel); dopo restât vedul […] cence fruts ni nissun, al cjaminave dilunc il troi de braide o pai remis a viodi la campagne e si sintive bessôl cun dute la sô robe (Dino Virgili, La massarie); e jere invezit une vite masse bessole… bandonade (Dino Virgili, La aghe da pît la cleve)
   Sin. sôl , di bessôl
4. adi. cu lis sôs fuarcis o daûr di un procès spontani, cence jessi judât o influençât, condizionât, comandât e v.i.:  i oms a fasevin i imprescj di lavôr bessôi, par no spindi (Riedo Pup, I furlans e la culumie); declarâ che in Italie nol è nissun conflit linguistic, che no je sostituzion, che lenghis come il furlan, il ladin, il sart e v.i. a muerin bessolis, parcè che al è il lôr destin, e je une bausie criminâl (Sandri Carrozzo, Il Friûl tra conflit invisibil e alienazion)
   Sin. sôl , di bessôl
5. adi. considerât par so cont:  te regjon de Catalogne bessole, a jerin 4.065.841 feveladôrs suntune popolazion di 6 milions (Xavier Lamuela, La grafie furlane normalizade)
   Sin. sôl
   
   1. che nol à bisugne dal supuart di altris elements:  il contest architetonic e paisagjistic […] al baste bessôl par ripuartâ chel che al visite Voleson indaûr tal timp (Eddy Bortolussi, La rievocazion storiche "Medioevo a Valvasone")

Proverbis:

• a san plui il plevan e la massarie insiemi che no il plevan bessôl
• al è miôr misurâsi di bessôi che no spietâ di sei misurâts
• beât chel che al po bussâ il Crist di bessôl
• beât chel che al po russâsi di bessôl
• benedets i bêçs che si sude di bessôi
• chê che al da il Signôr si le puarte vulintîr, chê che si fâs di bessôi e je plui pesante di puartâ
• cui che al è bessôl nol sta mai ben
• cui che al gjolt dal mâl dai altris co a vegnin lis disgraciis al vai di bessôl
• cui che i insegne al mus a butâ jù il sac e a mangjâ la farine si ridûs a dovê lâ a mulin bessôl
• cui che lu copin o che si difint o che al cîr di murî di bessôl
• il mâl che si vuelisi di bessôi nol è mai masse
• il marcjadant nol sta mai bessôl
• il prin miâr di florins al è dificil di fâ, chei altris daspò a vegnin bessôi
• l'orloi nol cor bessôl
• lis voris si comandin bessolis
• miôr patî in compagnie che no di bessôi
• ognidun al à la sô crôs e cui che no le à se fâs bessôl
• se no si à la crôs, si le fâs di bessôi
• tos e amôr si pandin di bessôi