Dizionari de Lenghe Furlane

net  /-è-/  net  [FO]

1. adi., s.m. no sporc:  i vistîts nets e sopressâts (AAVV, Sul florî); tu podevis butâ jù la polente in place di tant net che al jere (Riedo Pup, I furlans e la Austrie); e svintulave la robe di lissie: tant che paveis grandonis. O ancje par tiere, sul nembri fresc. E puartave in cjase, dopo, un bonodôr di jerbe e di net (Dino Virgili, La aghe da pît la cleve); sul taulin metût tal cjanton dongje de stue, tune guantiere, a jerin tantis tacis netis e dongje un bocâl di vin blanc e profumât (Pieri Menis, Chei di Muraie)
   Sin. lindul , mont³ , smondeât
   
   1. che nol sporcje, che nol fâs sporcjâ:  un lavôr net, avonde ben paiât e cu la sigurazion e la buine man a Nadâl (Roberto Ongaro, Cretevierte)
   2. s.m. puest cence sporc:  a lavoravin tal net e tal cjaldin (Roberto Ongaro, Cretevierte)
2. adi. di persone, che si lave, che e sta atente di jessi curade e di rispietâ la igjiene, che e à intor robe lavade:  la int simpri ben vistude, i fruts simpri nets tant che pipins (Lucio Perès, Vilie di fieste)
   Sin. mont³
   
   1. che al sta atent tal netâ:  pes voris, no 'nd je tantis di miôr e che e va là che le clamin, par lavâ e sopressâ… Ancje a mi mi ven par cjase e o ai dome di dî ben di jê, che e je nete e puntiliose (Alviero Negro, Int di masnade)
      Sin. mont³
   2. di animâl di cjase, che nol sporcje:  un gjat une vore net
3. adi. cence nûi:  l'aiar net, fresc, daspò di une gnot di burlaçs, la matine biele (Laurin Zuan Nardin, Cjantâ pe vile); il cîl net come un voli di uciel, e lis rositis tai cjamps di ogni stagjon (Dino Virgili, La aghe da pît la cleve)
   Sin. biel , clâr , limpi , seren , trasparent
   
   1. s.m. cîl o fonts clâr:  si viodeve Morùs e il cjistiel di Susans in mostre tal net dal cîl (Alan Brusini, Par stradis lungjis)
4. adi. libar di elements che a dan fastidi:  ogni an o ai il ronc di seâ. Par vêlu net, che no vedin di vignî lis liparis (Alan Brusini, Amîs come prime); midiant de int, boscs e prâts a jerin nets e in ordin (Franca Mainardis, Il sium di Lissandri)
5. adi. no contaminât:  no jere aghe nete ta chel trat ma dome un grant lâc neri di stomeose aghe di fogne che e vignive de citât (Checo Tam, TRAGEDIA SUL TORRE:PENSIONATO SCHIACCIATO DAL SUO PICK-UP)
   
   1. che nol contamine:  un sisteme regjonâl che al vedi a disposizion la energjie che i covente, energjie nete par un futûr sostignibil (Matteo Mazzolini, Autonomie energjetiche nol vûl dî autarchie)
      Sin. vert
   2. s.m. ambient no incuinât:  i puars, chei che no àn maniis di grandece che si rassegnin a vivi tal net, fûr dai velens (Riedo Pup, La civiltât dal fum)
6. adi. di linie, figure e v.i., clâr, precîs, che si viôt ben, ancje in funz. av.:  il so cjaval blanc si intaiave net cuintri dal martueri de tiere massacrade (Dino Virgili, La aghe da pît la cleve)
   Sin. ciert , clâr , esat , sigûr , precîs
   
   1. ancje di altris robis che si puedin percepî cui sens:  co la buera a paussava, a rivavin nets i sunsûrs (Novella Cantarutti, La aga di Plan da li steli)
   2. di obietîf, bersai e v.i., centrât cun precision:  cuntune sclopetade, i ai cjapât net il chepì a un napoletan e jal ai fat svolâ par aiar (Maria Forte, Cjase di Dalban)
      Sin. plen
   3. (fig.) ancje di alc di imateriâl, spec. di alc che si pense o che si dîs, concepît e pandût cun clarece, cun sigurece:  cjapâ une posizion nete denant dai partîts (Josef Marchet, Il salon dal barbîr); la sô politiche [di Luduì di Teck], cence direzion nete, cence inteligjence, cence risoluzion, e restà in sostance leade daprûf di Sigjismont, che nol veve timp ni mieç di sostignîlu avonde (Josef Marchet, Cuintristorie dal Friûl fin sot la Italie)
      Sin. franc , clâr , sclet , sigûr
7. adi. (fig.) di risultât, confront e v.i., che nol lasse dubis:  a son rivadis gnovis positivis par esempli di Cint, dulà che al à vinçût Gianluca Falcomer, 30 agns, furlanist doc, […]. Une vitorie nete, cul 63,13% (il Cjargnel, Biel e brut tai risultâts des aministrativis)
   Sin. complet , totâl
8. adi., s.m. dal pês, cence tare:  e pese trentesiet chilos nets (Ivano Urli, Storie di Vera)
   
   1. di sume di bêçs, che e reste dopo di vê paiât tassis, contribûts, tratignudis e v.i.:  cumò i comès a son paiâts 3,5 euros sporcs ae ore e a cjapin une paie mensîl al sporc di 609 euros (442 euros nets) (Tjaša Gruden, Slovenie: la viertidure domenicâl dai esercizis comerciâi e jentre in Parlament)
9. adi., s.m. (fig.) puartât indenant cun logjiche:  un resonament net
   Sin. clâr , limpi , trasparent
10. adi. (fig.) di persone, grup di personis, maniere di fâ e v.i., che e va daûr des regulis de morâl e de leç:  a volevin aciertâ che o fos net e che la mê imprese e fos nete (Oscar Puntel, Mario Collavino: une bandiere furlane parsore il gnûf World Trade Center di New York); tu âs lavorât pardabon: ma no stâ crodi che ducj i lavôrs a sedin nets: […] a lavorin a lôr mût ancje i laris, i imbroions, i rufians (Josef Marchet, Lis predicjis dal muini); il so cûr, la sô anime a jerin nets (Pieri Somede dai Marcs, Par une lengate)
    Sin. onest
    
    1. cence colpe, cence condane:  un suspiet une vore pesant che però nol varà nissun efiet penâl: Tellini e chei altris doi a 'ndi jessin fûr nets (Donato Toffoli, Il lunari mai jessût - Tellini te prime vuere mondiâl)
11. adi., s.m. sport esibizion o percors cence erôrs, cence penalitâts
12. adi. (fig.) sempliç, elegant, essenziâl:  un stîl descritîf net
    Sin. essenziâl , sut
13. adi. (fig.) cence bêçs:  daspò de ultime spese o soi restât net

Polirematichis e espressions idiomatichis

• vê la cjamese nete loc.v.
• vê la cussience nete loc.v.
• vê lis mans netis loc.v.

Proverbis:

• il miôr cussignel e je la cussience nete
• la cussience nete e je un bon cjaveçâl
• la femine e à il cûr a fetis e, se lis da, no son mai netis
• la vacje soce e po soçâ ancje chê nete