Dizionari de Lenghe Furlane

precîs  pre|cîs  [FO]

1. adi., av. che al è individuât, delimitât, segnât, concepît, volût, pandût e v.i. cun clarece:  il president al à fat savê che al clamarà dongje cheste Conference, ancje se nol à comunicât nissune date precise (Carli Pup, Sot atac l'avignî de lenghe furlane); i paris fondadôrs di cheste regjon, Tessitori in primis, a àn fate une sielte precise tra il restâ leâts in cualchi maniere a Vignesie o a Triest (Dree Valcic, In Friûl no si rive dome vie mâr); progjets restâts te fantasie, che no vevin nancje cjapade une forme precise (Carlo Sgorlon, Il dolfin)
   Sin. clâr , concret , positîf , specific
   
   1. che al corispuint cun esatece:  Menut de losche ju menà tal puest precîs là che Toni, par lâ a racuei cuatri stelis alpinis, al veve metût il pît in fal e al jere colât jù (Roberto Ongaro, Cretevierte)
      Sin. just , esat
   2. che al va daûr di un ciert ordin:  composizions di paviments cuntune simetrie rigorose e cun liniis ben precisis (Bepi Agostinis, Storie de art in Friûl)
      Sin. ordenât , just , regolâr
   3. che al lavore o che al funzione cence erôr e cence scart:  e veve sintût a dî che i pilotis a son oms plui precîs dai computers (Riedo Pup, I voi dai pilotis)
      Sin. just
   4. calcolât cence scart, cence fal:  [Istat e Censis] a metin adun ogni robe: le valutin, le pesin, a fasin i lôr calcui precîs e calibrâts e po a butin fûr la lôr sentenzie statistiche (Riedo Pup, Une robarie ogni miezore)
   5. che si compuarte o che al lavore tal rispiet des regulis, des formis, de puntualitât, cun dai detais e v.i.:  al veve di meti a verbâl dut ce che si diseve o si tratave. Al jere precîs. Come che al jere precîs tes osservazions e fin tes cuistions (Antoni Beline, Pre Pitin); chei perfetuts jo-sai-dut sempri precîs e sigûrs dal lour fat (Stiefin Morat, Donald dal Tiliment)
   6. fat cun cure, cun atenzion ai detais:  il rindicont al è precîs e detaiât e al permet di otignî cun ordin dutis lis informazions (Linda Picco, Sandri Carrozzo, Efiets economics e ocupazionâi des leçs di tutele de lenghe furlane); a tirava four i sio libris di conts scrits minûts e precîs come che a si scriveva una volta (Novella Cantarutti, La agna Mariana); il piturâ precîs fin tal plui piçul detai di Otto D'Angelo (Cristina Noacco, Faliscjis)
   7. di un lengaç o sim., coret tal corispuindi a une idee:  bisugnarès viodi se la trascrizion greghe de peraule ebraiche e je juste e po il significât precîs di un tiermin di dificile interpretazion (Antoni Beline, Sant Jacum, là che al finìs il mont); plui precîs e plui gramaticâl di cussì no si po fevelâ (Riedo Pup, Pantianis di cjase e gjats di fûr vie)
      Sin. coret¹ , just , propri
2. adi., av. di misure juste:  la librarie e sta precise te parêt
   Sin. just , perfet
3. adi. che al è compagn o che al à une grande someance cun alc o cun cdn. altri, ancje in cumbinazion cun altris adietîfs cul stes significât:  e jere propit une biele zovine, precise spudade ae sô femine, i stes voi, la stesse bocje, il stes puartament, dome la vôs e jere diferente, ma chel particolâr nissun no lu varès notât (Fabian Ros, Un piçul particolâr); ancje culì la liende e je precise identiche: lis medaiis lis àn i gjenerâi e lis pidadis i biâts (Antoni Beline, Pre Pitin)
   Sin. compagn , spudât , identic
   
   1. av. te stesse maniere:  «Ma parcè pensâ mâl?». E al diseve precîs ancje a cui che al lave slengant la Margarite (Meni Ucel, Pensâ mâl); ce che al nas a Rome al dure eterni, precîs de citât (Riedo Pup, Dîs milions di analfabets)