Dizionari de Lenghe Furlane

compagn  /-àgn/  com|pagn  [FO]

1. s.m. persone che e sta cun cdn. altri, te stesse situazion, fasint la stesse ativitât e v.i.:  lis frutatis a jerin su la plaçute che a fevelavin cu lis compagnis dal borc (Pieri Menis, Chei di Muraie); a diestre e a çampe di Pauli, no tancj metris lontans di lui, a jerin siei compagns, in vuaite ancje lôr, armâts di metraiutis (Agnul di Spere, Cjalant la rive); i compagns di scuele i disevin "Artistico" e lui si inrabiave al ultin fin (Antoni Beline, Pre Pitin)
   Sin. amì , camarade² , coleghe , compliç , copari
2. s.m. persone che si è leâts in sens sentimentâl, spirituâl o morâl:  Sedi cemût che e sedi, il gno ricuart al è dolç. I soi agrât a di chel gno compagn, parcè che mi à donade tante tenarece (Gianni Gregoricchio, Trê feminis); jê, e scriveve inmò, e varès preât par lui, par che al cjatàs une compagne buine e sane e che i volès ben e lu preave di dismenteâle, parcè che par jê la vite e jere aromai segnade (Roberto Ongaro, Il muc)
   Sin. amant , morôs , cristian , om ipon. , femine ipon.
   
   1. persone che si vîf intune cence jessi sposâts:  jê e il so compagn a àn decidût di maridâsi
      Sin. om ipon. , femine ipon.
   2. ancje riferît ai animâi:  al somee la ultime vôs dal ortolan cuant che tal vert al si lamente de sô compagne (Catarine Percude, L'ucielut de Mont Cjanine)
      Sin. mascli ipon. , mascjo ipon. , mascje¹ ipon.
3. s.m. maniere di clamâsi un cul altri dai socialiscj e comuniscj:  il plui des gnots mi fermavi a Udin: in cjase di cualchi compagne o inte cjamare che il moviment al veve fitât pai compagns di passaç (Gianni Gregoricchio, Trê feminis)
4. adi. che al à chês stessis carateristichis di cdn. o di alc altri:  la lôr volontât e je compagne identiche di chê dai fassiscj di îr, e i mieçs che a intindin doprâ e son chei istès (Josef Marchet, Ce che a vuelin); fâ indenant ideis compagnis di democrazie e di colaborazion, fondadis sul ricognossiment, sul rispiet e su la paritât (Marc Stolf, Un Pat cuintri dal 'Partito della nazione', un Pat a pro dal Friûl); la aree gjeografiche cjapade in considerazion e jere compagne di chê de ricercje dal 1978 (Linda Picco, Ricercje su la condizion sociolenghistiche dal furlan)
   Sin. avuâl , identic , pâr² , precîs , spudât , pareli
   
   1. s.m. ce o cui che al à chês stessis carateristichis o carateristichis dal stes nivel di alc altri o di cdn. altri:  al ere un marcjât di maravee, un marcjât numer un, che da un pieç no si viodeve il so compagn (Luigi Gortani, Al marcjât di Vile); il model di Alessandri si jere za pierdût daûr lis mês spalis. Mi pareve un individui masse grant, mai plui sintût a dî, mostruôs e cence il so compagn (Carlo Sgorlon, Il dolfin)
5. adi. che al à simpri chês stessis carateristichis rispiet a un altri moment o une altre situazion:  ma ancje cu lis medisinis dut [un malstâ che i faseve sintî come un sunsûr tal cjâf] al jere restât compagn, … che, a voltis, al passave la man tai cjavei come par sgarfâ vie alc (Maria Forte, La tiere di Lansing); Meni Sentenzie al jere di opinion che nol coventàs proclamâ e publicizâ che la justizie e je compagne par ducj; parcè che ducj a puedin viodi e constatâ di bessôi se e je vere (Riedo Pup, Un om indaûr)
   Sin. costant , fis , incontaminât , intîr , perfet , salt² , stes
6. adi. cence diferencis che a vedin impuartance:  Plovial, svintial, brusial… par lui al è compagn: il mont nol esist par lui (Dino Virgili, La aghe da pît la cleve); o un o l'altri par nô al è compagn (Riedo Pup, I furlans e lis Falkland)
   Sin. stes , istès , indiferent¹
7. av. inte stesse misure o maniere:  o vevi madressude la convinzion che une o chê altre e sarès lade ben compagn (Adrian Cescje, Memoriis di politiche linguistiche); vivi ducj come tun furmiâr, ducj di un stes colôr, ducj vistûts compagn (Tarcisio Venuti, La cjase di Toni); no i jerial tocjât cussì a so pari durant la vuere? No i jerial tocjât compagn a lui cuant che al jere tornât a cjase di soldât? (Pieri Menis, Sul agâr)
   Sin. istès

Proverbis:

• a son tancj i mus in montagne che a àn la code compagne
• ducj i dêts no son compagns
• ducj i nâs si somein e no 'nd è nissun compagn
• i câs a son come i nâs: ducj si somein e no 'nd è nissun compagn
• il bon al crôt ducj bogns, il trist al crôt ducj compagns di lui
• il jeur al vîf a jerbe, la bolp a gjalinis, e a son grues compagns
• il mâl al è un trist compagn
• la muart e fâs ducj compagns
• nancje i dêts no son ducj compagns
• pes vuedis ducj i poleçs a son compagns
• un ûf e un pît tal cjâf al è compagn