Dizionari de Lenghe Furlane

om  /òm/  om  [FO]

1. s.m. persone di gjenar masculin e di etât adulte:  al jere un om sui cincuante; a viodilu si lu varès dit un bon pari di famee (Roberto Ongaro, Il muc); a jerin in trê, doi oms e une fantate, che e someave sûr di un (Agnul di Spere, In viaç di domenie); ta la ostarie al jere plen di int, plui che altri umigns de sô etât, che a fumavin il toscan, biel che a zuiavin di cjartis o a fevelavin di afârs (Carlo Sgorlon, Prime di sere); i umign intune stanzie, lis feminis intune altre (Arturo Feruglio, Viaç a Vignesie)
   Sin. cristian , siôr
   Var. omp , on , vuom
   
   1. individui madûr e cun altis cualitâts morâls, degn dal rispiet di ducj:  no je la scuele che e fâs l'om, al è il cûr, l'amôr di patrie, il coragjo e il sens dal dovê (Roberto Ongaro, Il muc)
   2. individui di ses masculin che al sint atrazion pes feminis:  stâ ca, viodius ogni moment e no vê dirit di tocjâus nancje cuntun dêt? Jo o soi ancjemò un om, Rita (Carlo Sgorlon, Prime di sere)
   3. persone di cualsisei gjenar, individui de raze umane:  nol esist un om vonde inicui par che Crist no lu salvi. Nol esist un om vonde disgraciât par che Crist no lu consoli (Francesc Placerean, Crodi e mût di crodi); [Gjulie:] "Ti parial che e sedi une vite la nestre! sino bestiis o umign? (Pieri Somede dai Marcs, Un pugn di moscjis)
      Sin. individui , persone , cristian
2. s.m. cun valôr coletîf, la specie umane:  l'om e il simpanzè, par esempli, a àn il 99% dai gjens in comun (Lorenzo Marcolini, Recension di La scienza non ha bisogno di Dio)
   Sin. int¹ , umanitât
3. s.m. om leât cu la femine inte relazion di matrimoni o intune relazion sentimentâl stabile:  Rico, il so om, jevât subit dopo di jê, al le a cirî tal armâr il lat che par solit la Dosche i prontave ogni dì su la taule par gulizion (Meni Ucel, La brume); e pative di pôris e no podeve durmî cuiete fin che nol tornave l'om (Maria Forte, Cjase di Dalban)
   Sin. cristian , marît , spôs , paron
   
   1. ancje in riferiment a un om muart rispiet a une vedue:  di cuant che il so om al jere muart, za doi agns, e veve scomençât a pensâ di fâ il viaç a Rome (Agnul di Spere, Te grande place)
4. s.m. individui che al fâs part di un grup, spec. di une formazion sportive, politiche, militâr, economiche e v.i.:  - Sot! Ai ripârs! - al urlà Matie ai siei oms tirant in zenoglon il ferît tune cunete (Pieri Menis, Sul agâr); il gjenerâl Nugent al veve tirât dongje sul Lusinç, a Pontebe e a Gardiscje une armade di 15-18 mil oms che e cenglave come une tanaie dut il Friûl (Giovanni Pillinini, Zuan Batiste Cavedalis - Une vite esemplâr)
5. s.m. [TS] zûcs sacume di plui dimensions e di forme che e ricuarde un om, di len, avoli, plastiche, e v.i. che al fâs di bersai in zûcs come il biliart, il bowling e v.i.
   Sin. çonc
6. s.m. [TS] sport zuiadôr de scuadre aversarie:  "Sot a chel om, o vês di incolâsi intor, o vês di scjafoiâlu, che nol viodi plui i compagns, la puarte, la bale, […]: tacâts al om!" (Stiefin Morat, Donald dal Tiliment)

Polirematichis e espressions idiomatichis

• barbe di om loc.s.f.

Proverbis:

• a ingomein i fruts che a fasin di umign, a ingomein i umign che a fasin di fruts
• a vuelin fats a fâ umign
• a vuelin siet umign a fâ une cjase, e baste une femine a strucjâle
• cuant che la femine e nas l'om al à di savê puartâ il fas
• cuant che la femine si spose, l'om al à di puartâ la crôs
• dret o stuart un om al è simpri om
• e space plui la femine cuntun grumâl a puartâ fûr che no l'om cuntun cjar a puartâ dentri
• i bêçs a son il secont sanc dal om
• i bûs si ju lee pe cjavece, i oms pe lenghe
• i grancj umign a fasin i grancj fats
• i umign a cjaminin e lis montagnis a stan fermis
• i umign a fasin la robe ma la robe no fâs i umign
• i umign a son tant che i dêts des mans
• i umign no si ju misure a cuartês
• i umign no si ju misure sul braçolâr
• i umign no son agnui
• i umign si cjapiju pe peraule, i bûs pai cuars
• il cjan al è il plui fedêl amì dal om
• il flôr tal cjamp, lu jude ogni sant; l'om tal mont, Diu lu jude ogni tant
• il miôr amì dal om al è il cjan
• il perdonâ al è dal om, il dismenteâ al è des bestiis
• il plui grant nemì dal om al è l'om stes
• il puar om nol à mai ben: se i mûr la vacje i vanze il fen, se la vacje e campe il fen i mancje
• il smuars al frene il cjaval e la prudence l' om
• in cjase dai galantoms prin lis feminis e po i oms
• l'aur al è la sepulture dal om vîf
• l'om al à fat la machine, la machine e cope l'om
• l'om al à nome doi braçs
• l'om al cjante cuant che al è plen e la bote cuant che e je vueide
• l'om al è cjaçadôr
• l'om al fâs la robe, po la robe e fâs l'om
• l'om al propon e Diu al dispon
• l'om ce che al vûl vuê, doman nol vûl
• l'om cence bêçs al è un muart che al cjamine
• l'om cence bêçs al è un om cence sanc
• l'om che al alce masse il bocâl al devente un nemâl
• l'om che nol lavore al impare a fâ mal
• l'om che si fâs piore il lôf lu mangje
• l'om franc si cuiste la stime di ognidun
• l'om la sô sorte le puarte tai comedons
• l'om laboriôs al è libar; l'om poltron al è sclâf
• l'om laboriôs nol dipent di nissun, al è libar; l'om poltron al è sogjet a ducj, al è sclâf
• l'om nol cognòs il cûr e la ment dal altri om
• l'om nol vîf nome cul pan
• l'om sdegnôs al semene difidencis, l'om pazient lis gjave
• l'om si cognòs cui fats e no cu lis cjacaris
• l'om si lu cognòs in trê robis: tal zûc, tal matrimoni, tal test
• l'om si misure dal stomi insù
• l'om si plee, il mûl al è ustinât
• l'om si scuvierç cui fats e no cu lis cjacaris
• l'om sincîr si cuiste la stime di ognidun
• la dibisugne a fâs l'om lari
• la dibisugne a fâs l'om mestri
• la dibisugne e fâs l'om inzegnôs
• la etât a fâs l'om
• la femine e fâs l'om
• la femine e fâs l'om o pûr lu disfâs
• la femine e ten sù trê cjantons de cjase, l'om un sôl
• la miserie e la necessitât a fasin l'om lari
• la necessitât e fâs l'om inzegnôs
• la necessitât e fâs l'om mestri
• la ocasion e fâs l'om lari
• la ocasion e fâs l'om mestri
• la peraule e fâs l'om
• libri sierât al fâs l'om leterât
• lis peraulis a son des feminis, i fats a son dai umign
• lis peraulis a son feminis, i fats a son umign
• lis trê contentecis dal om: lâ coscrit, copâ il purcit, murî la femine
• mai plui om il gno mus
• mat di piçul, om di grant
• mat di zovin, om di grant
• matrimoni bon, femine e om un pôc parom
• ni di om che al à vôs di femine, ni di femine che e à vôs di om no si fide il galantom
• nissun om nol cognòs il cûr dal altri om
• nissun plui nemì dal om dal om istès
• nol sarà mai om cui che nol sa comandâsi
• ogni fros la sô ombrene, ogni om il so difiet
• ogni puar om, al sa lâ pal timp bon
• om visât al è mieç armât
• perdonâ al è dal om, dismenteâ al è des bestiis
• puar chel om che si lasse gjavâ i bregons
• se e à di crepâ, e crepe la vacje dal puar om
• se e comande la femine, e je contrarie al om
• soreli di veri e aiar di fressure a menin l'om in sepulture
• te cjase dai galantoms a nasin prin lis feminis e po i oms
• trê voris a son dibant: palâ nêf, bati coculis e copâ oms
• un brâf om e un bon vassiel di vin a durin pôc
• un mus di vincj agns al è plui vecjo di un om di setante
• vuardilu ben, vuardilu dut: l'om cence bêçs tant che al è brut
• vuarditi dal om che al à la vôs di femine
• vuarditi dal om che al cjale bas e de femine che e à lunc il pas
• vuarditi de femine che e à vôs di om