Dizionari de Lenghe Furlane

paron  /-òn/  pa|ron  [FO]

1. s.m. cui che al à la proprietât di alc:  o soi Manfred Snaidar, fi dal paron di cheste cjase (Checo Tam, X-Reihen); chê pipe e à une storie che il so paron le à contade par dut e a ducj (Roberto Ongaro, Cretevierte)
   Sin. proprietari
   
   1. spec. te societât di une volte, cui che al veve la proprietât di cjasis e tiare intun o plui paîs, dadis cun diviers contrats a fituâi, metadiaris, sotans e v.i.:  in chê dì [a Sant Martin] i parons a tiravin il fit, o che a sotetavin tes lôr cantinis la mieze racolte (Riedo Pup, I furlans e Sant Martin); o ai simpri amât i lûcs misteriôs, fin di cuant che o jeri frut: a Selvucis o esploravi il palaç dal paron cui miei amîs (Checo Tam, La maree nere)
2. s.m. cui che al ten di cont di une bestie:  i cjans, che a stan cui oms, a somein vê disvilupât une capacitât minime di capî ce che a pensin i lôr parons (Franc Fari, La evoluzion dal çurviel e de cussience tai vertebrâts)
3. s.m. cui che al à proprietât di un stabiliment, di une imprese e v.i. e che al ten int a vore:  si jere sfrancjât e dispatussât ben sui segrets di une fornâs e il fûc lu veve in confidence. Er Millar, il paron todesc, a voltis, al tratave diret cun lui (Maria Forte, La tiere di Lansing); al contave di jessi un industriâl di Milan, paron di une fabriche di tiessidure (Pieri Menis, Chei di Muraie); te lôr vite a vevin fat putrops lavôrs e mudât diviers mistîrs e parons (Roberto Ongaro, Cretevierte)
4. s.m. cui che al à il control su di un teritori, sore di un popul e v.i.:  i imperiâi a podevin dreçâ dute la artiliarie cuintri la Citât, stant che no vevin plui nissun disturp te Tiereferme e che a jerin parons de cueste dongje l'inizi dal puint (Giovanni Pillinini, Zuan Batiste Cavedalis - Une vite esemplâr); e sarès ben biele e ridicule che chei di Cjaurêt - che te lôr vite a àn cambiât trê parons: i austriacs, i talians, i slovens - a vessin cambiât trê patriis! (Riedo Pup, I furlans e lis Falkland)
   
   1. adi. che al à o che al pretint di vê une posizion di domini, di superioritât:  pai francês la France e je il braç di Diu: Gesta Dei per Francos; pai todescs il gjermanic al è l'Herrenvolk, il popul paron dal mont; pai talians e je veretât santissime il «Primato morale e civile degli italiani» (Josef Marchet, Cuintristorie dal Friûl fin sot la Italie)
   2. cui che al comande, che al à il podê politic, economic, militâr:  la politiche taliane, e un pôc ancje chê da la Austrie, e predicjave, e intiziave, e comandave di odeâsi e dispreseâsi: dopo che i parons di ca e di là a vevin discjadenadis dôs vueris tra chescj popui (Josef Marchet, Lis scjalis dal cjiscjel)
      Sin. sorestant
   3. (fig.) ancje cun subiet inanimât, astrat e v.i., ce che al à il domini, che al fâs sintî il so podê, il so efiet e v.i. su alc o su cdn.:  o sin bielzà in Avrîl e l'Invier al è paron de campagne come in Zenâr! (Franca Mainardis, Un bosc cence colôrs); l'alcul al jere deventât il so paron (Roberto Ongaro, Cretevierte)
5. s.m. tant che titul di rispiet, ancje par un lavoradôr o per un om di classe sociâl basse:  sintît mo, paron, o vês di fâmi un plasê: se us domandaran alc vô no savês nuie (Pieri Menis, Un macet di sanmartinis); "E ce bevêso? E ce bevêso, paron?" / "O blanc o neri, baste che al sedi bon" (Popolâr, Sul puint di Braulins)
   Cfr. siôr , mestri
6. s.m. (fam.) om maridât:  agns indaûr jo e Zenco o sin lâts a cjatâ la mê puare agne Fauste. «E alore, gnagne, cemût?» «Graciant Idiu mancul mâl» «E il paron?» «Mancul mâl ancje lui. E voaltris?» «Ben». (Meni Ucel, Salams)
   Sin. om , marît , cristian
   Cfr. femine , muîr , cristiane , parone
7. s.m. in costruzions adietivâls, par pandi che si à domini, libertât, capacitât di se, di une part dal cuarp, di fâ alc, di sielzi e v.i.:  lis personis intai insiums a pierdin la pussibilitât di agjî cun cussience, ven a stâi che la persone no je plui parone, cun cussience e intenzion, des sôs azions (Anastasia Fabbro, Franc Fari, Sui insiums di Aelius Aristides: une analisi neuropsicologjiche); la gjambe, dal dit al fat, si secjà, e si scurtà un tocut, e i pendolave cence comant che nol jere paron di jê (Riedo Pup, I zimuluts dal Çuet); ma no soi jo parone di volêi ben a di cui che vuei jo? (Dolfo Zorzut, La furlane)
   
   1. (enf.) cui che al à libertât e facoltât di fâ alc:  "Se o cjatais da ridi par cussì pôc, paronis! Par chel che mi impuarte a mi!" (Jolanda Mazzon, Fûr di timp)
8. adi. [BF] che al à capacitât di fâ alc:  culì no si è parons di cjatâ un omp che al vegni a fâ une zornade, vie pal Unviar, par comedâ la stradele des Cumugnis, che si ribaltin i cjars par colpe des busis che e à (Josef Marchet, Lis predicjis dal muini)
   Sin. bon , siôr

Polirematichis e espressions idiomatichis

• biel, bon e bon paron loc.adi., loc.s.m.
• bon paron loc.s.m., loc.adi.
• sot paron loc.av., loc.adi.inv.

Proverbis:

• ai mats e ai parons nissun no ur comande
• al è miôr paron di siessule che no famei di nâf
• al è muart il paron: aial di restâ il famei?
• al vûl rispietât il cjan dal paron
• beât il paron se il contadin al puarte il cjapiel in bande
• bisugne peâ il mus là che il paron comande
• cuant che a 'nd è masse parons, si po fâ ce che si vûl
• cuant che al cjante il ciuçau, il famei al mande il paron al diaul
• cuant che il cjan al baie, il paron al à baiât
• cuant che il paron al distude il lusôr, al fâs par dâje tal nâs al servidôr
• cui che al è paron nol è famei
• cui che al è servidôr nol è paron
• cui che al onore i abits, i abits a onorin il paron
• cui che al servìs Diu al à un bon paron
• cui che al servìs doi parons nol servìs nissun
• cui che si lasse cridâ al è paron dal so cûr
• cui che si lasse vuidâ al è paron dal so cûr
• cul domandâ paron si va a Rome
• cul domandâ paron si va pardut, fûr che te lune
• cul tignî cont si devente parons di mieç mont
• i dîs il cuviert al paron: se no tu vegnis sù tu, o ven jù jo
• il cjamp plen di jerbaç e il prât grintôs a palesin il paron oziôs
• il cjamp plen di jerbatis e il prât grintôs a palesin il paron oziôs
• il cjan di doi parons al mûr di fam
• il famei nol à di scrusignâ i segrets dal paron
• il fûc fin che al è sclâf al è biel e bon, ma vuai a lassâlu deventâ paron
• il pan dai parons al à siet crostis
• il plui bon mus al cope il paron
• il servidôr al à di fâ ce che il paron al comande
• il voli dal paron al ingrasse il cjaval
• mats, feminis, paron, timp e cûl fâs ce che al vûl
• miôr famei a cjase sô che no paron a cjase dai altris
• miôr parons di une cjase che no servidôrs intun cjistiel
• miôr sei parons intune siessule che no fameis intun bastiment
• nissun nol po servî doi parons
• no si po dâi al paron? une clapade al cjan
• no si po servî doi parons
• ognidun al è paron a cjase sô
• pan di paron al à siet crostis e un croston
• pari e paron a àn simpri reson
• paron paie, paron comande
• peâ il mus là che il paron comande
• Sant Simon i da la clâf al so paron
• se intor al svolete un avon: o letare o paron
• se tu fasis debits tu cuistis parons, se tu fasis credits tu pierdis amîs
• si lee il mus là che il paron comande
• tes ideis si à di sei parons e no fameis
• vin, aghe e fûc a son bogns, se no si ju lasse deventâ parons