Dizionari de Lenghe Furlane

femine  /fè-/  fe|mi|ne  [FO]

1. s.f. persone adulte di ses feminin:  a saltarin fûr ducj, oms e feminis, fruts e vecjos (Pieri Menis, A uciei cu lis archetis); la osteoporosi e je une malatie che e fâs deventâ i vues plui debii; e colpìs soredut lis feminis, dopo de menopause (Guglielmo Pitzalis, Ocjo ai vues!); la plui part dai visitadôrs a jerin feminis, fiis o gnecis o brûts che a regalavin un ratai di timp a maris, paris, barbis o agnis (Franca Mainardis, Aiar di cjase); Elsa Laula Renberg si è impegnade inte bataie pai dirits dai sami […] e par chei des feminis (Carli Pup, Teritoris - Oms di Libertât)
   Sin. siore
2. s.f. persone di ses feminin rispiet a cui che e je unide in matrimoni o intune relazion sentimentâl:  Dree al pensave a Rose, che e jere deventade la sô femine e i veve dâts doi fruts, un par sorte (Gianfranco Pellegrini, Cidulis); Jo no vuei meti la pecete tra om e femine! (Luciano Rocco, La foghere); al veve la femine a Berne, che e lavorave a fâ la netisie tun ospedâl, e al lave a cjatâle. Al jere stuf di vivi cence la femine, e so fi al jere stuf di stâ cence sô mari (Agnul di Spere, In viaç di domenie); cualchi volte si viodeve capitâ sô brût, femine dal ultin fi (Franca Mainardis, Aiar di cjase)
   Sin. cristiane , muîr , parone , spose ipon. , nuvice ipon. , crôs , compagne

Polirematichis e espressions idiomatichis

• carnevâl des feminis loc.s.m.
• taiâsi i coions par fâi dispiet a la femine loc.v.

Proverbis:

• a balâ cu la sô femine, sopis ta la aghe
• a lis cjacaris des feminis no si abade
• a lusôr di cjandele, ni femine ni tele
• a mangjâ fertaie e polente, al è come balâ cu la sô femine
• a vuelin siet umign a fâ une cjase, e baste une femine a strucjâle
• al è miôr vivi tal bosc che no cu la femine ledrose
• al marît prudence, a la femine pazience
• an bisest, lis feminis ni cjâf ni sest
• cjaval, cjan, femine e sclope no si imprestiju mai
• cuant che la femine e nas l'om al à di savê puartâ il fas
• cuant che la femine si spose, l'om al à di puartâ la crôs
• cuant che lis feminis si picjin, il diaul si petene la code
• cuant che si ingrumin lis feminis, si mude il timp
• cui che al ame i gjats al ame ancje lis feminis
• cui che al bastone la femine, al bastone la borse
• cui che di lunis nol fâs tant che di domenie nol è nassût di buine femine
• dâi une femine zovine a un vieli al è tant che dâi une cocule a un frut
• dije a la femine e lassii fâ al diaul
• dôs feminis e une ocje a fasin un marcjât
• dulà che no je femine il puar al patìs
• e space plui la femine cuntun grumâl a puartâ fûr che no l'om cuntun cjar a puartâ dentri
• femine cence gracie pôc e vâl tant che la mignestre cence sâl
• femine e bo plui dongje che si po
• femine pelose o mate o virtuose
• femine zovine, vin vieri
• feminis a 'nd è trê al carantan, e il carantan indaûr
• feminis a 'nd è trê al solt, e il solt indaûr
• feminis e passaris un grant scjalâr di cjacaris
• feminis sprofumadis, feminis indemoniadis
• feminis, lambretis e orlois a son trê imbrois
• in cjase dai galantoms prin lis feminis e po i oms
• Jugn, lui, avost, femine no cognòs
• la barbe il ben di un dì, la femine il ben di un mês, il purcit il ben di un an
• la buine dote le da il pari, la buine femine il Signôr
• la buine femine a fâs la cjase, la triste le disfâs
• la buine femine e à di vê: braç di açâl, panze di furmie e lenghe scjampe vie
• la cjase di une femine oneste e je come une glesie
• la dote des feminis e sta tai comedons
• la femine che e ubidìs e comande
• la femine cjitine il diaul le bêf par medisine
• la femine daben e fâs la cjase, la femine mate le disfe
• la femine dal lari no rît simpri
• la femine dal mulinâr e ten simpri un biel gjalinâr
• la femine di mâl fâ, al è dut dibant di fâle vuardâ
• la femine e à di vê braçs di açâl, panze di furmie e lenghe scjampe vie
• la femine e à il cjâf di gjat
• la femine e à il cûr a fetis e, se lis da, no son mai netis
• la femine e fâs l'om
• la femine e fâs l'om o pûr lu disfâs
• la femine e je il paradîs dal cuarp, il purgatori de borse, l'infier da la anime
• la femine e ten sù trê cjantons de cjase, l'om un sôl
• la femine savie e drece la cjase e la mate le strucje
• la lenghe de femine a je lungje tant che la Tresemane
• la lenghe des feminis e je come lis fuarpiis: o che a taie o che e sbuse
• la lenghe e je la arme des feminis
• la lenghe e je la spade des feminis
• lagrime di femine, fontane di malizie
• lagrime di femine, sudôr di cjaval
• lagrimuçs di femine, sudôr di cjaval e vaî di plevan nol è di crodi, che al è dut ingjan
• lasse lis feminis che a fasin pan, fruts e lissie
• lei libris vieris, bevi vin neri, lâ cun feminis che no son zovinis
• lis feminis a àn la lune cun lôr
• lis feminis a àn lis lagrimis in sachete
• lis feminis a àn putrops cjavei e pôc cjâf
• lis feminis a àn siet vitis e un vitin
• lis feminis a contin vincjenûf e un sessante
• lis feminis a fasin la code di cjaval par no someâ vacjis
• lis feminis a son il paradîs dal cuarp, il purgatori de borse e l'infier da la anime
• lis feminis a son tant che i gjats che se no sbatin il nâs no muerin
• lis feminis che a nassin in an bisest a son dutis cence sest
• lis feminis dai laris des voltis a ridin, des voltis a vain
• lis feminis ind san un pont plui dal diaul
• lis feminis ogni an a deventin plui zovinis
• lis feminis si leilis pe peraule, lis vacjis pe cjadene
• lis peraulis a son des feminis, i fats a son dai umign
• lis peraulis a son feminis, i fats a son umign
• lis trê contentecis dal om: lâ coscrit, copâ il purcit, murî la femine
• matrimoni bon, femine e om un pôc parom
• mats, feminis, paron, timp e cûl fâs ce che al vûl
• miôr une buine femine che no une biele cjase
• miôr vivi tal bosc che no cu la femine rabiose
• miôr vivi tal bosc che no cu la femine stiçose
• ni di om che al à vôs di femine, ni di femine che e à vôs di om no si fide il galantom
• ni femine ni tele al clâr di cjandele
• ni sabide cence sflandôr ni femine cence amôr
• no je rabie parsore di chê des feminis
• no podint muardi, lis feminis a vain
• no si po vê la femine cjoche e il caratel plen
• no stâ lassâti meti i bregons de femine
• ogni cjan al laude la sô code, ogni femine il so frut
• ombrene, femine e orloi no si impreste a dinissun
• orlois, gorletis, feminis e bicicletis a son imprescj di no imprestâ
• par vê la pâs in chest mont a vuelin trê robis: une femine par cjase, une passare par vile, une cocule par sac
• plui piçul al è il cûr des feminis, plui lungje la lenghe
• pluitost che cu lis feminis al è miôr impaçâsi cul diaul
• puare chê femine che i fâs ogni gnot il jet a so marît
• se e comande la femine, e je contrarie al om
• seren di gnot, conseis di feminis
• spice di cûl, murie di feminis
• te cjase dai galantoms a nasin prin lis feminis e po i oms
• trê feminis a puedin dâi un pont al diaul
• trê feminis par cjase: une vive, une muarte, une picjade daûr de puarte
• trê robis a fasin scjampâ la int di cjase: la cusine fumose, la femine rabiose e la cjase discuvierte
• trê robis impussibilis: fâ stâ fers i fruts, fâ cori i viei, fâ tasê lis feminis
• une femine cence grumâl a je tant che une vacje cence code
• une femine cjitine, il diaul le bêf par medisine
• une femine e à vierte la sepulture par cuarante dîs daspò dal part
• une femine par cjase, un gjal par gjalinâr
• une femine par cjase, une passare par vile, une cocule par sac
• une femine ur fâs gloti clauts ai oms
• vin, femine e morons a van gjoldûts te lôr stagjon
• vuarditi dal om che al à la vôs di femine
• vuarditi dal om che al cjale bas e de femine che e à lunc il pas
• vuarditi de colure des feminis e dai predis
• vuarditi de femine che e à vôs di om
• vûstu vê pâs in famee, cusii la lenghe a la femine