crôs
crôs
[FO]
-
s.f.
stor.
tal timp dai Romans e di altris popui antîcs, suplizi e imprest di suplizi, fat di doi pâi di len incrosâts là che il condanât al jere inclaudât o picjât pes conolis:
i ribei presonîrs, dopo de disfate di Spartac dal 71 p. di C., a son stâts metûts in crôs dilunc de vie Apie jenfri Capue e Rome
Cfr. crucifission
-
s.f.
simbul dal cristianisim, ancje in rapresentazions di diviersis dimensions e materiâi:
al murì la Sierade, e cui bêçs de pension, ingrumâts, i faserin nome une crôs di piere, cul so non parsore (Riedo Pup, Dreute);
vê tor dal cuel une cjadenute cuntune crôs di aur
-
[CO, TS]
lit.
segn dal rituâl cristian che si fâs cui dêts de man drete tocjant il cerneli, il stomi, une spale e dopo chê altre, o ancje cul poleâr sul cerneli, o devant di se cu la man o di cualchi bande par timôr di Diu e par clamâ la benedizion dal Signôr:
Patris, Fili… - dissè, fasint la crôs dute sul stomi (Maria Forte, Varc di confin);
siôr Agnul al segnà une crôs, par tiere, cul stombli de scorie, propit denant dai cjavai, cuant che a stavin par partî (Maria Forte, Cjase di Dalban);
e faseve la crôs sul cit dal lat par che no le striassin (Maria Forte, La aghe dal Ariul)
-
s.f.
dolôr, pene grande:
lis crôs passadis, la miserie, chel zirâ cun ogni timp pai paîs par une bocjade, le vevin scunide, ingrispade e ridote piel e vues: (Pieri Somede dai Marcs, Caritât)
Sin. cruzi
, cruzie
, patiment
, pene1
, soference
, via crucis
, torment
-
s.f.
(fig., ancje scherç.)
persone che e cause preocupazion, pene, dolôr, fastidi e v.i.:
Lisute, invezit, e jere la sô crôs. Nassude mâl; cuntune gjambute plui curte che le disombolave e i dave une ande malegraciose (Maria Forte, La fie çuete);
ma parcè stâstu intal frêt? Ma sêstu mat? E cence scarpis? Tu ti cjapis une polmonite, tu, frut, crôs di Diu! Ven dentri, no! (Laurin Zuan Nardin, Il rucjin)
Sin. cjastì di Diu
, cruzi
, diambar
, flagjel
, tribul
, pinitince
, torment
-
femine che si è maridâts:
si voltà viers Sante, la sô crôs, e i disè: "Cuant che al rivarà copari Rico, disii che no ai podût spietâlu. Par vignî a Codroip, che al cumbini in cualchi forme e po, al po tornâ cun me" (Angelo Covazzi, Avîs pal copari);
a 'nd jere di chei che a disevin che al jere miôr cui parons in Carintie o in Baviere che no cu lis crôs e cui viei a Biliris che ur jerin saldo daprûf a fâur un cjâf come un cos e a cjoliur la pâs cul presentâur mil cefâs intal bosc e tai roncs (Meni Ucel, La "Fieste dai Roncs")
-
s.f.
segn, forme o struture fate di dôs liniis che si cjatin tal pont centrâl di almancul une des dôs, formant cuatri angui di novante grâts:
a àn dome di meti une crôs suntun modul prestampât (Sandri Carrozzo, L'Antifurlan);
cemût nus rapresentino chei siôrs che o vin sburtâts a Rome? Lu podìn domandâ, parcè che ancje noaltris o vin, scuasi ducj, fate la crosute su la schede des votazions (Josef Marchet, Rapresentants dal popul)
Cfr. braç
Polirematichis e espressions idiomatichis
Proverbis:
- a sante Crôs pan e coculis
- a sante Crôs pan e nolis
- a vê il morôs e je une crôs, a no vêlu a son dôs
- al pâr che la sô crôs a sedi la plui grande ma se si cjale chê di chei altris si torne a cjoli sù la sô
- cuant che la femine si spose, l'om al à di puartâ la crôs
- cui che al puarte la crôs nol po cjantâ messe
- il diaul co al viôt la crôs al scjampe
- il diaul nol disfe crôs
- no si po cjantâ e puartâ la crôs
- ogni cjase e à la sô crôs
- ognidun al à la sô crôs e cui che no le à se fâs bessôl
- prin di Mai sant Jacum e Filip o cjatai, tierce dì Sante Crôs e fuì, un pôc plui tart sant Gotart, e tal doman sant Florean
- se la crôs no si vûl che e pesi, si à di puartâle e no di strissinâle
- se no si à la crôs, si le fâs di bessôi
- se o lin a puartâ la nestre crôs in place, o tornìn a cjase cu la nestre
- une crôs si à di vêle
