Dizionari de Lenghe Furlane

int¹  int  [FO]

1. s.f.sing. il gjenar uman, in gjenerâl e cun sens indefinît:  pal ben de int, par che la int in chest mont e puedi cjatâ, intune maniere o ta chê altre, la vie di justizie, la vie de veretât, la vie de libertât, [la glesie] e à di fevelâ (Francesc Placerean, La Glesie e à di lassâ i popui come che a son e fâur di levan seont la lôr paste)
   Var. zent
   
   1. in sens gjeneric, un ciert numar di personis:  se la int e reste [a vivi in mont] - a disin in Austrie - dut al funzione: stradis, boscs, prâts, aghis (Riedo Pup, I furlans e i prâts)
   2. chei altris, lis personis che si cognossin o che si à a ce fâ cun lôr:  al veve bisugne di viodi cualchidun, di stâ cu la int (Carlo Sgorlon, Ombris tal infinît); epûr siôr Toni, la int a pensavin che al ves vût alc in zoventût, une rabie, une delusion (Alan Brusini, Come tai romançs)
2. s.f.sing. complès di personis cuntune carateristiche in comun:  int di confin, int positive che no cognòs idolatriis nazionalistichis (Josef Marchet, E se no nus dassin la autonomie); no jeri fat par lâ a viodi partidis di balon e par frecuentà int che e fevele dome di motoretis (Checo Tam, Sense); cuissà parcè che la int di citât a àn di vê simpri tante premure (Dino Virgili, La aghe da pît la cleve)
   Sin. gjernazie , mene , naie , raze²
   
   1. complès dai citadins rispiet aes istituzions o ai sorestants:  a pensâ ben, la int, aromai, ce domandie ai politics? (Riedo Pup, Il guviar si picje di bessôl)
   2. complès dai clients o des personis che a gjoldin di un ciert servizi:  par vê buteghe si à di savê fâ cu la int
      Sin. clientele
   3. complès dai spetatôrs intun spetacul:  ducj i spetatôrs a jerin persuadûts […]. La int si metè a bati lis mans in maniere tant scjassose che al pareve che al podès vignî jù il sufit dal teatri (Carlo Sgorlon, Ombris tal infinît); il festival dai coros par furlan e par sloven dai fruts des scuelis […]. Un spetacul bielissim e plen di int (Walter Tomada, Une anade buine pal Furlan)
      Sin. public
3. s.f. comunitât di personis leade di lenghe, culture e identitât, che e je sogjet politic coletîf:  il spirt nazionalistic […] al cîr di dâ di intindi a ognidun che il so paîs e la sô int a son i prins, i plui grancj, i plui brâfs dal mont (Josef Marchet, Cuintristorie dal Friûl fin sot la Italie); al jere sigûr il vecjo Mosè cuant che al vierzeve la aghe dal Mâr Ros par fâ scjampâ la sô int (Francesc Placerean, Crist resurît al colme dute la sperance dal om)
   Sin. nazion , popolazion , popul¹
   
   1. comunitât plui piçule di une nazion, ma caraterizade di leams culturâi, linguistics tipics o dal fat di vivi tal stes paîs o te stesse zone:  o ai ancjemò tai voi la mê int di Cjargne (Antoni Beline, Sant Jacum, là che al finìs il mont)
   2. grop di personis leadis di afiet, par vie de parintât o ancje de amicizie:  je vignuda pardut una granda cjaristia […]. Ma jê a era fia di int che stava ben e par chist a no à patît (Ugo Pellis, Catinuta); al è Nadâl e ducj chei che puedin a si tirin dongje la sô int (Pieri Somede dai Marcs, Gnot di Nadâl); gno pari, mê mari - Di' perdoni - un fradi, dôs sûrs, la mê Mariane benedete, trê fruts… a son ducj là [tal cimitieri] che mi spietin; e po ancje la plui part dai miei amîs, dai compagns di lavôr, che a son partîts prin di me… Chê e je la mê int, che si intindevisi e si jere simpri in cunvigne (Josef Marchet, Lis predicjis dal muini)
4. s.f. cui che al ven ricevût in cjase par un timp limitât:  une sere o vevin visitis e int a cene (Maria Gioitti del Monaco, None Menie)

Polirematichis e espressions idiomatichis

• vê int loc.v.

Proverbis:

• al fale ancje l'altâr sul predi cun dute la int plene di glesie
• biel il timp; e je la int che e je carogne
• bisugne cjoli la int come che e je
• copâ int, palâ nêf, sbroiâ morârs e spacâ coculis, al è dut timp pierdût
• cuant che si metisi a fâ cjapiei, e nas la int cence cjâf
• cul timp e la fadie si madurìs la int
• cul timp si madurìs la int
• dal bon timp e de buine int no si stufisi mai
• Diu de int nol vûl jessi adorât corint
• dulà che e je int e je confusion
• dute la int no je compagne
• fâs ce che tu âs di fâ e lis cjacaris de int no stâ abadâ
• int di confins o laris o sassins
• la int a àn plui tristerie che no timôr di Diu
• la mont a sta ferme e la int e cjamine
• ni dal bon timp ni de buine int no si stufisi
• prin di cognossi la int di cjase, bisugne mangjâ cun lôr un stâr di sâl
• se si met a fâ cjapiei, la int a nas cence cjâf
• Tarcint, biel il paîs, triste la int
• trê robis a fasin scjampâ la int di cjase: il fum, la triste muîr e la cjase discuvierte
• trê robis a fasin scjampâ la int di cjase: la cusine fumose, la femine rabiose e la cjase discuvierte