Dizionari de Lenghe Furlane

raze²  ra|ze  [FO]

1. s.f. [FO, TS] bot., zool., zoot. grup di animâi o di plantis de stesse specie, marcâts di caratars comuns, omogjenis, tramandâts par ereditât che ju distinguin di altris grups:  i purcits che si cjolin lis cuessis di cjar a rivin di 10 regjons di Italie. A àn di jessi di razis tradizionâls talianis (Oscar Puntel, Un persut unic par un lûc unic)
   
   1. (estens., impropr.) specie:  o apartegnin a la raze umane e o vin basis in dute la Galassie (Checo Tam, Sense); o sin ducj interessâts par che la nestre raze umane no scomparissi dal planet (Francesc Placerean, Tal matrimoni l'amôr al devente virtût e sacrament dal amôr di Diu par nô)
2. s.f. [CO, TS] antrop. popolazion o complès di popolazions cuntune cierte frecuence distributive di gjens, individuade daûr di ciertis carateristichis fenotipichis:  la Ley de Inmigración y Colonización dal 1936 […] e deve la pussibilitât di imigrâ a personis di raze "blancje ariane o caucasiche, no semite" (Francesco Fait, La emigrazion furlane in Venezuela)
   
   1. (estens.) comunitât di personis cun cierts caratars in comun, ancje dome linguistics, culturâi, religjôs e v.i.:  dôs creaturis zovinis e bielis […] si cjatavin insiemi, unidis par chê grant passion par la art che rint amîs e fradis i umign ancje se son di nazion e di raze divierse (Zuan Lurinçon, La Madalene); il Friûl, la Sclavanie e la Carintie, trê regjons di raze e di lenghe diferentis che a partegnin a trê Stâts diferents (Josef Marchet, Votazions regjonâls)
3. s.f. grup di personis che a divegnin di un progjenitôr in comun:  i fîs intant a fasevin il lôr dovê, che no bastardavin la raze [no tradivin l'onôr de famee di Dalban] (Maria Forte, Cjase di Dalban)
   Sin. cjasade , cjase , çoc , çocje , gjernazie , naie , renazie , riviesse , sanc , semence , stirpe , famee
4. s.f. (spres.) cualitât, sorte:  a àn capît a colp tor ce raze di aministrazion che a jerin lâts a sbati (Riedo Pup, Par paiâ al vûl mistîr); Berto, Berto, ven a viodi ce raze di timp che al ven sù! (Franca Mainardis, Aiar di cjase)
   Sin. cualitât , gjenar , maniere , sorte , stamp , stampe , tai , fate

Proverbis:

• voli in tane, raze putane