Dizionari de Lenghe Furlane

tai  tai  [FO]

1. s.m. il taiâ e il so risultât:  [lis viciniis] a decidevin cemût sfrutâ il teritori, cemût distribuî lis tieris comunis aes fameis, il gjenar di culturis, i timps di aradure e di seseladure. A controlavin il tai dai lens (Adrian Cescje, Liniis di storie sociâl e economiche dal Friûl 1500 - 1800); un pît cuntun segn, un tai fat di piçul (Cristina Noacco, Faliscjis); la Parche cundun tai, / la mandarà a fâ tiare di bocâi (Pieri Çorut, Pronostic del 1821)
   Sin. taiade
2. s.m. toc, cuantitât o estension di robe taiade:  un tai di cjar di vidiel cuet intun pestât di cevole e, in câs, altris verduris, che dopo a vegnin passadis par fâ une salse (Sandri Carrozzo, Frico un plat furlan cuntun non di origjin foreste); Ta chel templi dal tiessût, imerzût tal cupeç e tal nulôr de bombasine e des lanis de Fuline, a jentrarin, cun sudizion, Guido e Nene. "Bundì, chei siôrs! Puedio servîju in alc?" "O varessin voie di viodi di un tai par une mude." e disè Nene (Roberto Ongaro, Cretevierte)
3. s.m. forme, figure, struture, proiezion e v.i. che si somee cu la linie lassade di une lame che e taie:  ancjemò gnot su lis cjasis: dome incà e inlà un tai di lûs jenfri i scûrs (Dino Virgili, La aghe da pît la cleve)
4. s.m. (fig.) division nete e fonde:  propit in chest moment, inte gjestion de cooperative si pant un tai net cul passât (Max Mauro, Un Friûl difarent: i 90 mhz di Onde Furlane)
5. s.m. part di alc che e taie:  tirada via da la muela la roncea […] e provant il tai cul poleiâr, cjalava come distrat traviars il balcon de la cusina (Federigo Comelli, Il me paîs)
6. s.m. part strete di alc:  mi buti in zenoglon e tiri un colp di tai cul fûr dal pît te sô gjambe (Sandri Di Suald, Ah! la provincie)
7. s.m. [TS] artes., tecn. ingjâf sul cjâf di une vît là che si ponte il menevîts
8. s.m. tecniche di taiâ i tocs di tiessût par fâ vistîts:  fin che une sô compagne de scuele di tai, in pinsîr che e fos malade, no rivà […] a viodi di jê (Gianni Gregoricchio, Trê feminis)
9. s.m. maniere che un vistît al è taiât e efiet che al fâs:  magari a saran vistîts fats in cjase, cun chel tai perfet, cun chel gust sorefin, cun chê pieçamente di prime cualitât che si po spietâsi tun Gargagnà (Josef Marchet, Lis predicjis dal muini)
   Sin. linie , stîl¹
10. s.m. forme che a son taiâts i cjavei:  mi plâs il tai di cjavei agns '30, une vore di mode a Leipzig jenfri i cultôrs dal folk apocalitic (Checo Tam, La maree nere); si meteviur sul cjâf une scudiele e i cjavei si ju tosave ator ator, daûr l'ôr de scudiele. Si diseve, di fat, che al jere un tai a scudiele (AAVV, Sul florî)
    Sin. petenadure
11. s.m. forme di alc in gjenerâl:  il tai de muse e il cuel di une sante [piturade] involuçade tun linzûl latisin (Maria Forte, I arcs); o olmavi lis piçulis grispis che i segnin il cjanton dai voi; il tai dai lavris ancjemò frescs (Gianni Gregoricchio, Trê feminis)
    Sin. fate , linie
    
    1. robe o ancje persone fate intune cierte maniere:  dopo pocjis setemanis chei tais ruspis e fuarts di montagnârs, […] che prime ducj ju vevin spreseâts, a passavin pes stradis onorâts di chê stesse int (Pieri Menis, Sul agâr); e jere un biel tai di femine, ce no! (Dino Virgili, La massarie)
       Sin. model , stamp , stampe , implant
12. s.m. (fig.) impostazion di un discors, di une opare, di un test e v.i.:  il tai che o ai dât ae mê ricercje nol permeteve di meti dentri dut chel che al è passât pes stanziis di Vie Volturno e di Plaçâl Cella dal 1980 incà (Max Mauro, Un Friûl difarent: i 90 mhz di Onde Furlane); la retoriche di pre Checo e veve un tai a ûs chê dai profetis de Biblie (Adrian Cescje, Memoriis di politiche linguistiche); poesiis di tai sociâl o esistenziâl (Marc Stolf, Visions di scoltâ. Ideis di furlan e di Friûl inte produzion musicâl contemporanie)
    Sin. ande , implant , ton¹
13. s.m. [TS] becj. ognidune des parts che si use taiâ une bestie macelade:  par fâ un bon brût si doprin, par solit, tais di cjar avonde puars (Margherita Timeus, E dopo il brût… i vanzums, une miniere di aur)
14. s.m. [TS] enol. il messedâ dôs o plui cualitâts di vin par miorâ la gradazion alcoliche
15. s.m. tace di vin:  si contentave di passâ la place e di lâ a bevisi un tai o un cafè coret (Antoni Beline, Pre Pitin); al le in ostarie a bevi un tai e a viodi a zuiâ di balis tal curtîl, poiât a un grant morâr (Carlo Sgorlon, Prime di sere)
    Sin. taiut , tace
16. s.m. eliminazion, riduzion o interuzion di alc:  i tais tal belanç decidûts dal Guvier talian pal 2006 a àn puartât a sbassâ dal 40% i bêçs pe ferovie Udin - Cividât (Redazion Radio Onde Furlane, Tais pe ferovie Udin - Cividât); cu la fusion [des bancjis] al jere di spietâsi che e vignìs fûr une ristruturazion cun tant di tais. Si lu capive cuant che a àn mandât in pension prime de ore Bergnach e Petin (Fabian Ros, La rambe)

Polirematichis e espressions idiomatichis

• arme di tai loc.s.f.