Dizionari de Lenghe Furlane

ton¹  /-ò-/  ton  [AF]

1. s.m. il sunôr causât de saete:  un timpat cun saldo ploie e tons e lamps che a scjavaçavin il cîl (Alan Brusini, Come tai romançs); il cîl al masanave tons e la aghe cu la brosate e dave il segnâl dal rogant (Maria Forte, La rive di Sant Pieri)
   Sin. tron¹
   Cfr. folc , saete¹ , fulmin
2. s.m. sunôr bas e fuart, causât in particolâr di une esplosion o di un colp fuart:  ogni tant un ton plui fuart al pandeve che cualchi cassele di munizions e veve cjapât fûc e tonât (Roberto Ongaro, Il muc); intant che a svuacaravin inte aghe a àn sintût un ton, come chel di un fûc di artifici (Cristina Noacco, Faliscjis)
   Sin. bot , tonade , tron¹ , sclop , colp , bote¹
   
   1. la esplosion o il colp stes, che a causin chel sunôr:  Alido al sameavo vîf, ma al vevo cjapât un bon ton (Fulvio ReddKaa Romanin, Geologicamente impossibile)
   2. fonosimb. ancje tant che riproduzion onomatopeiche di chel sunôr:  dut tun moment chê femine e sint a bati ae puarte: ton, ton (Pieri Menis, Lis leiendis di Buie)
3. s.m. (fig.) azion o consecuence fuarte:  l'ultin ton al rive de Coopca, la storiche cooperative cjargnele che e riscje il faliment (Dree Valcic, Cjalìn indenant viers la Europe)
   Sin. bote¹ , bot , colp
4. s.m. (fig., pop.) rapuart sessuâl:  dal mâl al malan jo un ton a la triestine jal doi (Luca Elzil, Average Furlan Guy)
   Sin. bote¹ , colp , taconade

Polirematichis e espressions idiomatichis

• dâ un ton loc.v.
• dal lamp al ton loc.av.
• vignî un ton loc.v.

Proverbis:

• cuant che a son fûr madracs e carbons, si è sigûrs di lamps e tons
• daspò dal lamp il ton
• ogni lamp al à il so ton
• prin ton a soreli jevât, cjol il sac e va a marcjât; prin ton a soreli a mont, cjol il sac e va pal mont
• Sante Barbare benedete vuardaitnus dal ton e de saete
• Sante Barbare e Sant Simon vuardaitnus dal lamp e dal ton