Dizionari de Lenghe Furlane

bot  /-ò-/  bot  [FO]

1. s.m. azion e efiet dal bati alc cun fuarce:  un rogant al veve scjavaçade la crôs […]cul bot de colade il len de crôs, za frait, al jere lât in flichignis (Pieri Menis, Il Signôr sul mûr de braide); lavâ in presse - un bot e un striç (Maria Forte, La aghe dal Ariul)
   Sin. colp , ton¹ , tonade , trus , trussade , bote¹
2. s.m. il rumôr fat di un colp:  o sint il bot de puarte che si siere (Alan Brusini, Gian Paolo Linda, I forescj); i rivà il cjant di un cucuc da cjâf dal mont, po il bot di une manarie di cuissà indulà (Maria Forte, La tiere di Lansing)
   Sin. bote¹ , crac¹ , çocade , ton¹ , scroc , tonade , colp , trus , trussade
3. s.m. sun de cjampane:  i cjampanârs in cubie, ben plantâts sul paviment cui braçs che si tindin di lunc la cuarde par grampâsi plui in alt pussibil a un segn di vôs a tachin a sunâ; si sint il bot de piçule, po chel de mezane e infin chel de grande (Pieri Somede dai Marcs, L'ultin cordo)
   Sin. glon
   
   1. sing., cun articul definît, sun de cjampane che al clame a messe:  a rivavin lis agnis a dînus, plui perentoriis de none: «Sù svelts, che al da il bot, sflacjonats!». E invezit il bot nol dave inmò no, tant al è vêr che al sunave co o jerin za abàs a lavâsi (Meni Ucel, Messe a straoris)
   2. sun di cjampane o di orloi che al segne la ore, e la ore segnade di chel sun:  la cjampane grande de Plêf e disgotave jù dal ferâl dal tor i bots lancurôs da la ore di gnot (Dino Virgili, La aghe da pît la cleve); intor doi bots, justa inta la ora che al usava sentâsi a paussâ sot il puarti (Novella Cantarutti, I voi di Miriscja)
   3. sing., la une, dopo misdì o dopo miezegnot:  ta chê gnot al jere un grant cjalt e nissun dai fantats al durmì voli. Laurinç al jevà ator di un bot e al le a sentâsi sul murut che al zirave ator de glesie, blancje tal lusôr di lune (Agnul di Spere, Istât); a lerin indenant a fevelâ fin mieç bot (Agnul di Spere, Un de maiorance)
4. s.m. [FÛ] timp, moment:  un bot plui incà l'intope fer in mieç de strade e cu lis mans in galon un zovenot (Giovanni Gortani, Lis istoriis di Palladio)
   
   1. [FÛ] volte:  sentii un bot, disint ad un mê ume / cu si scotave i piçs cu la polente / sofle coion cuant che tu viôts che a fume (Ermes di Colorêt, I, 39)
5. s.m. ritmi, ande, velocitât:  [il tren] al sflade denant cul so bot sui trente, cuarante chilometris la ore di une stazion ae altre (Ivano Urli, Storie di Min); i bûs a lavin indenant simpri cun chel bot (Maria Forte, L'avôt)
6. s.m. sun di une esplosion:  un bot di canon (Alan Brusini, L'odôr de fiere)
   Sin. ton¹ , sclop , esplosion
   
   1. (ancje fig.) manifestazion imburide, plene di scjas:  la vite glotude e gjoldude intun bot di ligrie, sul convinciment che dut al varès di sei lizêr, disimpegnât, cuasi un zûc dome di ridi e po vonde (Angelo Floramo, Cuintristorie dal Nûfcent 1980-1990)
7. s.m. fûc artificiâl:  a fin dal an si fasin i bots (Sandri Carrozzo, Nadâl)
   Sin. fûc , falconet ipon. , mortalet ipon. , scaracaval ipon.
8. s.m. [TS] zûcs cocule plui gruesse che si bute smicjant altris coculis o nolis tal zûc di coculis
   Sin. mai³
9. s.m. [FÛ] robe che si fâs a dispiet des dificoltâts, des previsions o di chei altris:  no sês plui a timp, fradi: jê e varà za fat il bot. Cjalaitle po che e ven. (Ermes di Colorêt, II, 143)
   Sin. colp , tîr

Polirematichis e espressions idiomatichis

• a bot loc.av.
• a bot a bot loc.av.
• a bot e sclop loc.av.
• a bot plen loc.av.
• a plen bot loc.av.
• bot e sclop loc.av.
• cjapâ bot loc.v.
• di bot loc.av.
• di bot e sclop loc.av.
• dut a bot loc.av.
• fâ bot loc.v.
• sul bot loc.av.
• tignî bon bot loc.v.
• tignî bot loc.v.

Proverbis:

• plui adalt si va, plui grant bot si cjape