Dizionari de Lenghe Furlane

colp  /-ò-/  colp  [FO]

1. s.m. azion e efiet dal bati alc cun fuarce o dal lâ a sbati:  inte farie, Pauli al lavorave gobit tal sun net dal incuin; come simpri. Un colp daûr chel altri, e ogni tant une fermade par cjalâ la batude sul imprest (Maria Forte, Cjase di Dalban); une lungje procession di colps, e la manarie simpri plui indentri te feride, a coni, blancje e precise (Maria Forte, La tiere di Lansing); si romp l'eternit, jo o coli sot, o cjapi un colp tal cjâf, mi svei tal ospedâl dopo jessi stât operât (Mario Beltramini, Jo e Graziella); al jere tornât a Cjassà, cence pensâ a nuie, dome al svindic, e lu veve maçât cuntun colp di forcje (Carlo Sgorlon, Prime di sere)
   Sin. ceve , copete , crac¹ , crufule , çocade , çonderade , fotecje , pache , poc¹ , proietil , repeton , ruf , sburt , sburton , scroc¹ , sdramassade , slepe , slocje , stocade , stos , stossade , tamburade , toful , ton¹ , tonade , trus , trussade , vene² , vuadule , vueche , fritule , bote¹
2. s.m. rumôr fat de azion di bati:  fûr dai colps secs dal so massanc, dut il mont ator di lui al taseve, e al pareve indurmidît e inmagât (Franca Mainardis, La liende dal riûl); lis cjampanis a lassavin colâ ancjemò i lôr colps secs come clapadadis (Pieri Menis, Sflameadis); doi colps su la puarte: al si svee, al impie il lampion e il ferâl e cloteant al va a vierzi: sul scjalin de puarte, te spere di lûs dal ferâl, al viôt une musute intabarade (Pieri Somede dai Marcs, Nadâl)
   Sin. bote¹ , crac¹ , çocade , sclop , scroc¹ , tamburade , tonade , bot
3. s.m. sbâr di une arme di fûc:  un colp di canon; un colp di pistole
   
   1. rumôr fat di un sbâr di une arme di fûc che e trai:  il paîs al si involuçave tal scûr e in bas tal cjanâl plen di misteri si sintivin i colps di metraie: si copavin partigjans e todescs (Pieri Somede dai Marcs, La letare de mame)
      Sin. sbâr , sclop , ton¹ , tonade
   2. proietil di arme di fûc:  un revolvar cun sîs colps; i canons, intant, su lis monts dulintor, a tiravin colp daûr colp, cence soste, cirint di centrâ dipuesits e stradis (Pieri Menis, Cemût che o soi restât caporâl)
      Sin. proietil , bale , cartatucje , fissete
4. s.m. moviment svelt fat cuntune part dal cuarp:  al ste minûts intîrs a cjalâ i lôr zîrs a larc [di doi falcuçs], parsore boscs e crets, cence dâ un colp di ale (Carlo Sgorlon, Il dolfin)
5. s.m. sport tai sports di contat o intun combatiment, ancje no sportîf, moviment par cirî di tocjâ, cun plui o mancul fuarce, l'aversari:  un colp di karate; rivâ a parâ i colps dal aversari
   
   1. tal balon, tîr:  mi soi fermât su la place a dâi un colp al balon cui miei compagns (Pieri Somede dai Marcs, Il prossim)
      Sin. tîr , bote¹
6. s.m. il pandisi imburît di une emozion, di un sintiment e v.i.:  al veve lassât di scombati. Dopo la fiere di chel colp di rabie si sintive scomât (Maria Forte, Mabile la Lunghine); si dreçà intun colp di amôr propri, declarant cu lis lagrimis intal cuel che e varès frontât il pari di bessole (Gianni Gregoricchio, Trê feminis); il re si è spaventât e, intun colp di pôre e di zelosie, i à fat çoncjâ il cjâf (Antoni Beline, Sant Jacum, là che al finìs il mont)
   Sin. sclop , sbroc
7. s.m. azion svelte fate cun cualsisei imprest:  Eliseo al le prime dal marangon par dâi un colp di smerilio [ae manarie], e po dopo te cantine di cjase sô, par uçâle cu la muele (Carlo Sgorlon, Prime di sere); al podarès dâ il vueli di lin ai sieraments; dâur un colp di sponzarole là che al covente, onzi i cancars (Roberto Ongaro, Cretevierte)
8. s.m. azion svelte par rivâ a un obietîf, cun furbetât o ancje in maniere violente e ilegâl o iregolâr:  la organizazion dai partesans e jere fate di oms che a jerin in montagne e che pal plui a fasevin i colps grues e plui impuartants e di oms che a vivevin in paîs (Roberto Ongaro, Il muc); bessôi e sfladâts: intant che a Rome si rumie un colpat çamp che par une trate al tornarà a cjolinus il flât (Josef Marchet, Legnadis e pidadis)
   Sin. assalt , ladrarie , ladroneç , rambe , rapine , robarie , svalisade
9. s.m. lavorazion dade a une paste jevade par che e pierdi gas e dopo e torni a jevâ cun plui fuarce:  par vie de mangjative, mi àn metût intune intimele: un fiasc di ramandul, mieç chilo di polente cuinçade, une poleçute rustide, un pâr di slepis di formadi bausâr, un chilo bondant di pomacis, sîs fetonis di panzete e un pan di siet colps cu la ue calabrie (Arturo Feruglio, Viaç a Vignesie)
10. s.m. (volg.) rapuart sessuâl:  no je une maravee, ma un colp jal darès
    Sin. bote¹ , spente , uçade
11. s.m. (coloc.) manifestazion imburide e dispès fulminante di un mâl, massime tal cerviel o tal cûr:  une volte si murive di un colp, di un gastric, di une ponte (Alan Brusini, La fantasie de muart); la vilie de sagre di Vile Disore, e mancjà di un colp la mari dal ostîr: e restà secje tal jet - che e jere za malade - cence podê dî nancje un Jesus (Pieri Menis, Disore e disot); daspò un colp (ictus) tal cerviel, cui malâts bilengâi bisugne viodi cemût che a van dutis dôs lis lenghis (furlan e talian) (Franc Fari, Il cjâf dai furlans)
    Sin. acident , ton¹
    
    1. (fam., iperb.) in espressions che a pandin sorprese, pôre e v.i.:  po ben, là dentri di une di chês [cjasis sieradis], une dì, barbe Gjovanin, no ti viodial sô gnece Betine? Negozi che i vegni un colp (Pieri Menis, Destins)
    2. (coloc.) in imprecazions, plui o mancul lizeris, che a pandin maravee, rabie, determinazion e v.i.:  cheste me paie, che mi vignìs un colp! (Pieri Menis, Il fi de Rosse); al si cjatà denant di une muse cognossude che lu fermà cuntun: «Che ti vegni un colp, no si saludial i amîs!» (Alan Brusini, Il mâl dal tor)
12. s.m. fat negatîf o dolorôs, spec. improvîs:  cu la muart di Pierluigi Visintin, il mont de culture furlane al patìs un altri colp dûr (Redazion Radio Onde Furlane, Corot pe muart di Pierluigi Visintin)
    Sin. bote¹ , petenade , sacodade , scjassade , scjasson , scopule , sgnesule , sgorlade , sgorlon , spacade , vene²
    
    1. efiet, consecuence negative di alc che al sucêt:  al è comprensibil che, cun dut chel che al jere daûr a sucedi inte societât e inte politiche, un cuarp permeabil tant che une cooperative di informazion e ves di cjapâ cualchi colp (Max Mauro, Un Friûl difarent: i 90 mhz di Onde Furlane)
    2. sconfite, delusion:  la mê sperance di tornâ a unî la famee autonomiste e à cjapât un altri colp e si è inflapide di chel pôc (Adrian Cescje, Memoriis di politiche linguistiche)
13. s.m. moment che alc al sucêt:  la ombre nere de Incuisizion e tornave come une manarie sul paîs, ma chest colp no nome par fâ pôre (Alan Brusini, Come tai romançs); daûr dal prin frut, al jere rivât un altri, e po un altri, e infin ancje dôs frutis tun colp (Franca Mainardis, Aiar di cjase); il predi ogni colp che lu cjatave al veve saldo di dîi di mendâsi, di fâ judizi (Alan Brusini, Amîs come prime)
    Sin. volte , viaç , pache
14. s.m. (coloc.) in frasis negativis, nuie:  la maestre lu tignive come il prin de scuele ancje se lui nol saveve un colp di nie (Alan Brusini, Par stradis lungjis)
    Sin. ache , bighe¹ , clostri , ostie , osti , porco

Polirematichis e espressions idiomatichis

• a colp loc.av.
• a colp sigûr loc.av.
• a colps di loc.prep.
• a prin colp loc.av.
• di colp loc.av.
• fâ colp loc.v.
• pierdi colps loc.v.
• pierdi cualchi colp loc.v.
• vignî un colp loc.v.

Proverbis:

• al prin colp nol cole l'arbul
• cuntun colp nol cole l'arbul
• dai colps si vuarìs di ducj, fûr che dal prin
• no si taie mai l'arbul cuntun sôl colp
• par un colp nol cole il len