volte
/-ó-/
vol|te
[FO]
-
s.f.
moment che i tocje a cdn. di fâ alc:
e jentrà svelte te cjase di Cosset un pôc malcuiete di pôre di cjatâ une code di int, ma dome dôs feminis a spietavin la lôr volte (Maria Forte, La tiere di Lansing);
cuant che, duncje, e rivà la sô volte [di firmâ l'at di sucession], Mante al firmà, e subit dopo al cirì la puarte par lâ vie (Pieri Menis, Destins)
Sin. moment
, turni
, viaç
Var. vuolte
, vote
-
s.f.
moment che al sucêt un fat determinât:
no si visave, anzit, pensant ben… no le veve mai cognossude prime di chê volte (Checo Tam, Il dì celest);
no jere la prime volte che nol cjatave nissun disponût a scoltâlu (Franca Mainardis, Aiar di cjase)
Sin. ocasion
, viaç
Cfr. pache
, colp
-
moment che al è pussibil, probabil o facil o just che al sucedi alc:
cundut il rispiet pes sacris che o ai simpri vût, usgnot mi è capitade la volte di bati i pugns sul taulin (Josef Marchet, Lis predicjis dal muini);
e je vignude la volte di viodi, se ancje i puars a son tal câs di comandâ (Alviero Negro, Int di masnade)
-
ancje in indicazions gjenerichis:
al jere une volte un fari che si clamave Meni, e Fari di sorenon (Luigi Gortani, Meni Fari);
e jere une volte une strie che e veve une bielissime fie e le tignive sierade parsore di une toresse che no veve puartis par jentrâ (Popolâr - Andreina Nicoloso Cicerii, Blancje come la nêf - Racconti popolari friulani I);
"Zanut benedet, jo devi lassâti, ti racomandi dome di jessi simpri bon; tu sâs che si cjatarìn une volte in Paradîs" (Dolfo Zorzut, A voi a cirî el Paradîs)
-
s.f.
cun denant un numar o une determinazion di cuantitât, par pandi il tornâ a jessi di un fat:
e je la tierce volte che e scuen operâsi in cinc agns (Carlo Sgorlon, Prime di sere);
le ai sigurade mil voltis che no à di vê nissun pinsîr (Gianni Gregoricchio, Trê feminis)
Sin. viaç
-
cun valôr distributîf:
a jentravin dentri in doi a la volte (Riedo Pup, I furlans e Sante Catarine);
al sarà miôr sclarî un pont par volte (Sandri Carrozzo, Il miluç de magne)
-
cun valôr moltiplicatîf, ancje insiemi cun averbis:
sigûr che in curt al sarès deventât dîs voltis plui siôr (Pierluigi Visintin, Friûl e furlans te Histoire de ma vie di Giacomo Casanova);
cheste sodisfazion par me e je tant grande e tant biele che mi paie cent voltis di dut il servizi che o ai fat culì dentri in tancj agns (Josef Marchet, Lis predicjis dal muini);
va a fâ il tressiet cun Pre Vitorio che al è miôr, mil voltis miôr (Costantino Smaniotto, Co l'amôr al cimie);
a àn cressût il presit trê voltis tant (Pieri Somede dai Marcs, Un pugn di moscjis)
Var. viaç
, dopli
-
tal pl., cun valôr di prep., par segnâ la operazion aritmetiche de moltiplicazion:
dôs voltis vot, sedis (Zuan Nazzi Matalon, Marilenghe gramatiche furlane)
Sin. par
Cfr. vie
-
s.f.
moviment che al va daûr di une traietorie circolâr o curve o che al previôt une rotazion:
il soreli al fâs la volte / e la lune e fâs splendôr (Popolâr, Il soreli al fâs la volte);
tu darâs une volte di clâf a la puarte (Giuseppe Ferdinando del Torre, Il contadinel. Lunari par l'an bisest 1892)
Sin. zîr
, voltade
, volt1
, svolt1
, rotazion
-
s.f.
mudament di direzion, pont li che une strade, un flum o un cualsisei element lunc al cambie di direzion:
su la volte de strade, insom la rive, e comparì une pinie di vert parsore l'arc di une puarte e Gasthaus scrit di sù (Dino Virgili, La aghe da pît la cleve);
lu lampà a pene che e ve fate la volte e par pôc no colà de biciclete (Gianni Gregoricchio, Trê feminis)
Sin. volt1
, voltade
, svolt1
-
s.f.
viaç fat par tornâ o ancje sedi par lâ che par tornâ:
i mandava […] una letara, che i la consegnava al cjaradour che al faseva la volta tra la vila e Triest (Novella Cantarutti, Li Anzuliti)
-
s.f.
[TS]
tipogr.
façade dal sfuei stampade par seconde:
e vin za stampât blancje e volte (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
Sin. ledrôs
-
s.f.
[TS]
enol.
alterazion dal vin, massime chel cun gradazion alcoliche basse, causade di bacii e micrococs di plui speciis, che e puarte il vin a pierdi limpidece, a cjapâ un brut odôr e un savôr trist e a svilupâ anidride carboniche
Polirematichis e espressions idiomatichis
Proverbis:
- a fâ il cont cence l'ostîr, si fasilu dôs voltis
- a pensâ mâl, tropis voltis si induvine
- ancje il just si inçopede siet voltis in dì
- centesim sparagnât, dôs voltis vuadagnât
- cuant che al cjante il cuc, al è ce fâ pardut, cuant che al lasse di cjantâ, in chê volte il grant dafâ
- cui che al da daurman al da dôs voltis
- cui che al done al ingrât al piert dôs voltis
- cui che al è trê voltis bon, al è mincjon
- cui che al fâs il cont denant l'ostîr lu fâs dôs voltis
- cui che i done al ingrât, al piert dôs voltis
- cuntun solt pocjis voltis si paie un debit
- daspò cjapât sù trê voltis il fûs a une fantate, si sclape la fave
- di un disordin cualchi volte al nas un ordin
- din don, une volte parom
- dulà che si crôt di insegnâsi tropis voltis si svuarbisi
- i ocuts a menin cualchi volte a bevi i ocats
- il mus che al è colât une volte nol cole plui
- la prime volte si perdone, la seconde si tontone e la tierce si bastone
- la prime volte si po fâje al pari eterni
- lis botis no colin mai dutis intune volte
- miôr misurâ dôs voltis che no falâ une
- misurâ trê voltis prin di taiâ une
- Nadâl al ven dome une volte ad an
- novantenûf voltis il jeur e une il cjan
- par une volte si fasije ancje a so pari
- par une volte si po fâje ancje al pari eterni
- se no passe, metii un stec a la volte
- si dîs dôs voltis dongje da la aghe e trê tal mulin
- si dîs dôs voltis tal mulin
- si vîf une volte sole e daspò muarts no si campe une ore
- trê voltis bon, al vûl dî coion
- une volte ad an e ven pasche
- une volte al cor il cjan e une volte al cor il jeur
- une volte carnevâl, une volte cuaresime
- une volte parom si scuen fâle ducj
- une volte parom, al dîs il colomp
- une volte plui valeve cui che lungje le saveve, cumò al vâl ogni cretin che al à plen il so tacuin
- une volte si je fâs a ducj, dôs a cualchidun, trê a dinissun
