Dizionari de Lenghe Furlane

par  par  [FO]

1. prep. par introdusi un fin:  nol jere plui pai bêçs che al lavorave, che la robe, scuasit, nol olsave a gjoldile (Maria Forte, La tiere di Lansing)
   
   1. ancje cun infinitivis:  o vin decidût di fâ il caminet par scjaldâ l'ambient (Mario Beltramini, Jo e Graziella)
2. prep. cun valôr di cause:  nol stave te piel, pe voie di savê alc di plui (Roberto Ongaro, Cretevierte); dôs spalutis sclendaris che, pal frêt o pe emozion, a tremavin (Alan Brusini, Gian Paolo Linda, I forescj)
   Sin. di¹ , par vie di
   
   1. ancje cun infinitivis:  o soi avilît par vê pierdût tant timp (Tarcisio Venuti, La cjase di Toni)
3. prep. par segnâ cui o ce che al à di gjoldi di alc:  creâ un avignî miôr pai fîs (Furio Bednarz, La emigrazion dal Friûl - Vignesie Julie: destinazion Svuizare); il vignî mancul di un impegn fuart pes lenghis di chestis comunitâts al vûl dî meti in pericul la autonomie e la specialitât de Regjon (Donato Toffoli, Relazion dal Grup di lavôr "Planificazion linguistiche")
   Sin. a pro di , in pro di , a favôr di , in favôr di
4. prep. par segnâ la destinazion di un moviment:  puare zoventût partide pe Spagne, pes Africhis, pe Albanie, pe Grecie, pe Jugoslavie, pe Russie, pe France! (vueris fissis tant che fiestis dal vin!) (Alan Brusini, Chei di Cjasarse)
   
   1. par segnâ un lûc che al ven traviersât intun moviment:  la diligjence e sarès passade par Udin tal lâ e tal tornâ (Pierluigi Visintin, Friûl e furlans te Histoire de ma vie di Giacomo Casanova)
5. prep. par introdusi un complement di limitazion:  il Sudtirôl al è par raze, par lenghe, par civiltât, par culture un bocon di Austrie (Josef Marchet, La nestre muse)
6. prep. par introdusi un timp definît:  i vevin dât apontament pes cuatri e a jerin aromai lis cinc e no si viodeve nissun (Fabian Ros, Il lôf)
   Sin. a²
   
   1. par introdusi un tiermin temporâl massim:  "O soi dacordo cun Corrado e Berto di cjatâsi a trê par lâ un pôc a torzeon. Puedio?" "Ok, ma a cjase par lis cinc e mieze, capît?" (Carlo Tolazzi, La salamandrie tal fûc)
      Sin. prin di , prime di
7. prep. une vore dongje di tacâ une azion, di fâ alc che al ven specificât cuntun verp tal infinît:  "Diu Marie, che el puiûl l'è par colâ. Velu, velu! Diu, Diu!" (Dolfo Zorzut, No je plui vive); i miei dîs, mi soi nacuart, / son contâts, son par finî; / ma il ream, prime de muart, / vuei dividilu cussì… (Emilio Nardini, Chê di Peonis)
   Sin. li li par , li par , alì par , li par li par , li e li par , sul pont di , in pont di , a pont di
8. prep. par esprimi une misure, une grandece che e va indevant cuntune cierte estension, durade e v.i.:  a 'nd è ancjemò par dusinte metris; i stavin sul stomi chei bulos che a jerin passâts par mês denant dal so barcon e mai che a vessin saludât (Pieri Menis, Agne Ursule)
9. prep. al pues introdusi un complement di mieç:  al rivà ancje Alberti di Triest, visât par telefon (Gianluca Franco, Il solt di Arlunc)
10. prep. si dopre devant dal non di une lenghe o dialet, par segnâ che al è la modalitât espressive doprade:  i popui a son restâts popui diferents, che a àn crodût seont il lôr mût di capî e di viodi: i slovens par sloven, i todescs par todesc, i talians par talian e i furlans par furlan (Francesc Placerean, La Glesie e à di lassâ i popui come che a son e fâur di levan seont la lôr paste)
11. prep. cun valôr predicatîf:  o soi tant contente di podê clamâti par fie (Pieri Somede dai Marcs, Il prossim)
    Sin. tant che , di¹
12. prep. cun valôr modâl:  Cecot lu cjatai chê dì stesse, par cumbinazion, jù pe strade de Cjarbonarie a Sant Gotart, che al faseve une cjaminade di chês bandis (Adrian Cescje, Memoriis di politiche linguistiche)
13. prep. cun valôr distributîf:  [par fâ il pignarûl] a son passâts […] a cirî soreâl. Un balçûl o doi par famee, ingrumant dut sul Cuel (Pieri Menis, Il pignarûl)
    
    1. in matematiche, par indicâ la moltiplicazion:  sîs par vot cuarantevot
14. prep. par esprimi un presit, une stime, un valôr e v.i.:  al à vendût la cjase par vot mil liris, plui o mancul trente mil euros di vuê (Pierluigi Visintin, Friûl e furlans te Histoire de ma vie di Giacomo Casanova); la convenzion tra Olf e Cooperative e je stade firmade par 69 milions ai 18 di Dicembar 1997 (Adrian Cescje, Memoriis di politiche linguistiche)
15. prep. par esprimi un cambi, une sostituzion, une confusion e v.i.:  paron Bepo ju cjapâ par laris e, dispicjade la sclope, al scomençà a cori çueteant inviers di lôr (Alan Brusini, Il coragjo de sclope); capî une robe par chê altre
16. prep. [TS] med. par segnâ la maniere di dâ po cjapâ une medisine, di fâ un intervent, une terapie e v.i.:  a vevin speziarie, che di jerbis si intindevin e a cumbinavin pitimis par meti su la panze, pirulis par bocje e a curavin semencis pai fuments (Alan Brusini, Come tai romançs); dâ une medisine par endovene
17. prep. cun valôr consecutîf:  la vite e je […] masse lungje par no vê displasês (Cristina Noacco, Faliscjis)