Dizionari de Lenghe Furlane

a²  a  [FO]

1. prep. preposizion, che e pues jessi semplice o articolade, che e introdûs diviers complements e che si pues cumbinâ cun altris parts dal discors, ancje cun altris preposizions, in ciertis locuzions al cjape la forme "ad"
   Cfr. in , ta
2. prep. par introdusi determinazions di spazi cun moviment intune cierte direzion:  mi cjapi la coriere e o voi a Grau (Jolanda Mazzon, Di là de rêt); barbe Meni al jere rivât ae stazion di Udin (Alan Brusini, Amîs come prime)
   Sin. in , ta , là di , li di , ca di , chi di
   
   1. par introdusi determinazions di spazi, ancje cence moviment:  jo, viodistu, o soi contente di stâ a cjase (Catarine Percude, La plui biele); a jerin al comant todesc di Udin a fevelâ cul colonel (Alan Brusini, Par stradis lungjis)
   2. cun valôr di vicinance o di lontanance:  ju veve clamâts dongje, a doi pas un dal altri (Dino Virgili, La aghe da pît la cleve)
3. prep. par introdusi determinazions di timp:  a sîs di matine e sunà la Avemarie (Angelo Covazzi, Une fiere); [la messe grande] e sarà aes dîs e la funzion aes cuatri (Josef Marchet, Lis predicjis dal muini); par vincjesiet agns i veve scrit sì e no une cartuline a Pasche e a Nadâl (Carlo Sgorlon, Prime di sere); i veve dite che no i smecave masse di deventâ viele in chê maniere e che cun lui a trente agns si faseve za une vite di viele (Agnul di Spere, Frêt)
   Sin. par , sot , di¹ , cun , in
4. prep. in corelazion cun di o da, e segne un passaç, ancje fig.:  «Ce gambiament che al à fat chel Zuan! Di cussì a cussì […]» (Maria Forte, La tiere di Lansing)
5. prep. par introdusi relazions di tiermin:  ogni tant lis sûrs a mandavin une cartuline aes amiis (Alan Brusini, Come tai romançs); no soi jo parone di volêi ben a di cui che vuei jo? (Dolfo Zorzut, La furlane); o soi rivât adore di dâti chê fuarce che gno pari mi à dât a mi (Enrico Martina, Ricuarts e inlusions)
6. prep. cun valôr strumentâl:  un sfuei scrit a machine (Roberto Ongaro, Il muc)
7. prep. cun valôr modâl:  je biele jê cui scarpins a ponte, cul cutulin curt che i sta ben sui flancs ben fats e a suste (Dolfo Zorzut, La furlane); al rideve a stupit vie (Dino Virgili, La aghe da pît la cleve); al ploveve a selis e al sglovave un aiarat ruspi (Maria Forte, Dome la cjampanute di Sant Bortul)
   
   1. par segnâ une mode, un ûs, une voghe, une forme:  fasìn un cjant a la cjargnele / che nus sintin di lontan (Popolâr, Fasìn un cjant a la cjargnele)
   2. par segnâ une maniere di fâ di mangjâ:  lui si gjoldeve il poleç a rost (Checo Tam, Un cjasâl, une vuere nucleâr)
8. prep. par segnâ une unitât di misure:  "E il lidric jal cêt a bon presit, tratantsi di trê chilos mi darà dusinte francs al chilo" (Pieri Somede dai Marcs, Cjase di fitâ)
   Sin. par
9. prep. cun valôr di fin o di cause:  il nodâr al sgurlave il cjâf pôc persuadût. "No dîs di no, siôr cont, ma chel tipo là al smicje a lis nestris tiaris." (Gianni Gregoricchio, Îr e doman)
   Sin. par , di¹
10. prep. cun valôr limitatîf:  il zovin nol veve pardabon nancje une pecje: brâf a scuele, educât cun ducj… (Franca Mainardis, Aiar di cjase)
    Sin. di¹ , par
11. prep. cun valôr distributîf:  si jerin metûts in file a doi a doi (Pieri Menis, Chei di Muraie)
12. prep. par introdusi un tiermin di paragon:  un vecjut che al someave a Mazzini, simpri in cjapiel e baston (Alviero Negro, Gno nono)
13. prep. tignint sù costruzions cul infinît, cun valôr finâl, condizionâl, causâl, temporâl e v.i.:  si smicje a vê un cuadri sociolinguistic dai paîs dal Friûl (Donato Toffoli, Il lunari mai jessût - Tellini te prime vuere mondiâl); dal rest, induvinâ lis intenzions des âfs, nol à di sei tant facil, nancje a vêlis tant a pratiche come che lis veve Min (Alviero Negro, Lis âfs di Min); a sintî chel tibidoi te strade, il caporâl che al ronceave sù par une bancje intal boczimer, vâl a dî tune cjanevate scure scure, sence ne fûc ne lûs, al salte fûr mieç insumît (Giovanni Gortani, Sot consei di vuere)
14. prep. tes costruzions causativis e pues introdusi chel che al è il subiet logjic de subordenade:  "Po, al met in pericul la sô reputazion, e i fâs fâ une figure al plevan!" (Bruno Paolo Pellarini, Amôr in canoniche)