Dizionari de Lenghe Furlane

cun  cun  [FO]

1. prep. par indicâ un rapuart di compagnie, union, possès:  e vignive di un comun de basse Italie, là che e viveve cun so fi (Roberto Ongaro, Il muc); te stale, su la bree, une rie di pladinis cul lat di trê dîs a piâsi (Dino Virgili, La aghe da pît la cleve); une dì che mi veve cjatât cul so cuader dai conts in man, mi à dite di no tocjâlu plui (Pieri Menis, Il cuader de none)
   Sin. dutun cun , parie cun
2. prep. par introdusi un complement di mieç:  al leve spes a Udin par afârs. Al partive o cul motorinat Garelli, o cu la coriere o ancje, se al jere in forme, cu la biciclete. Des voltis lu menavi ancje jo cu la machine (Checo Tam, Un carantan); int che e resone ancjemò cul so cjâf (Riedo Pup, La civiltât dal fum)
   Sin. a mieç di , in graciis , midiant , par mieç di , a² , in
   
   1. denant di infinît sostantivât, cun valôr strumentâl:  cul fâ si fale, cul falâ si impare (Cristina Noacco, Faliscjis)
      Sin. a² , a fuarce di , a sun di
3. prep. par indicâ un rapuart jenfri o viers robis e personis:  Graziella cualchi volte si rabiave cun me parcè che mi diseve, impie il fûc, met lis taulis, lis cjadreis, però par fortune che al jere Gjani a judânus cussì le calmave parcè che si fidave plui di Gjani che di me (Mario Beltramini, Jo e Graziella); al jere bon cun so pari, ubidient, ma da un an incà al fevelave pôc (Pieri Somede dai Marcs, Co une vôs e clame)
4. prep. cun valôr modâl:  Laurinç si invià a planc, cjalant la int e fermantsi cu la calme a lei i titui dai sfueis tes ediculis montadis sui cjaruts (Agnul di Spere, In viaç di domenie)
5. prep. par introdusi un complement di cualitât:  in chel al rivà Primo Taboghe - un toc di cjassili, cun spalis par ca, come breis di lavâ (Maria Forte, Varc di confin)
6. prep. par introdusi il tiermin di someance, di confront e v.i.:  si somein cu la gubane la putiza e il presniz (Sandri Carrozzo, Une regjon di cerçâ)
   Sin. e²
7. prep. cun valôr causâl:  facil suponi che, cun dute la confusion che o vevin jevade sù intor de cuistion de tutele des minorancis, de seconde metât dai agns 70 indenant cualchi sbrendul di vôs e fos rivade ancje in cjase socialiste (Adrian Cescje, Memoriis di politiche linguistiche); al rivà il cjalt, e cun chel e cu la ploie la campagne e deventà in pôc timp un splendôr (Carlo Sgorlon, Prime di sere)
8. prep. par indicâ lis cundizions leadis cul timp, sedi cronologjic che meteorologjic:  cul timp ogni segn di amôr si jere scancelât tra di lôr (Alan Brusini, Par stradis lungjis); ancje lis plantis, i arbui, i sterps no savevin cemût compuartâsi cun chel timp cussì balort (Franca Mainardis, Un bosc cence colôrs)
9. prep. cun valôr finâl:  un om che al strussiave, al furigave te vite cuntun fin, par un so sium, par un doman che nol jere nome par lui (Roberto Ongaro, Il muc)
10. prep. cun valôr concessîf:  cun ce che o vin fat par lui, nol à dite nancje graciis; dopo dut, cun dut ce che nus è sucedût chest an, no vin aumentadis lis blestemis, ancje se forsit o varessin vude un pocje di reson (Francesc Placerean, Nadâl nus fâs capî che la storie e je plui profonde e biele di chel che e somee)
    Sin. a dispiet di , no cate , cundut di
11. prep. par introdusi un complement di limitazion:  lant sù cui agns si confrontave a so pari (Alan Brusini, Par stradis lungjis)