Dizionari de Lenghe Furlane

e²  e  [FO]

1. coniun. cun funzion copulative e coordene elements cuntun stes valôr gramaticâl intune proposizion o in proposizions che a àn un valôr sintatic compagn tal periodi:  une robe di ogni dì e di ogni an (Riedo Pup, I furlans e il timp); e leve vie impicotide gjoldintse tra piel e vues (Catarine Percude, L'ucielut de Mont Cjanine)
   
   1. cuant che a son plui di doi elements coordenâts, pues meti dome prime dal ultin element o tra ducj i elements tacant tra il prin e il secont:  si tratave pal plui di pacifiscj, socialiscj e predis (Carli Pup, La seconde Irlande); e saveve pursì lei e scrivi e contâ (Dino Virgili, Emme come mamma); dut indafarât a mantignî çus, a parecjâ vergons e viscjadis e filainis (Catarine Percude, L'oseladôr); pocje voie di pierdi timp cu la prole, di dâsi pinsîr da la educazion che e domande cjâf e cûr e pazience e atenzion e sapience e fature e cussience (Josef Marchet, Lis predicjis dal muini)
2. coniun. cun funzion aversative e antitetiche:  i ai telefonât e no lu ai cjatât
   Sin. ma , però , e però
3. coniun. ancje in principi di frase, par tornâ a tacâsi a une frase di prime, o ancje dome cun funzion enfatiche o esortative:  E di grande ce vuelistu fâ, ninine? (Fabian Ros, Il lôf); E alore - dissal Ermis - ce ti someial? (Riedo Pup, Beâts i viei); E finìssile, no, di rompi!
   
   1. plui enfatic, o sedi enfatic che copulatîf, ancje in altris posizions:  al è stât disgraciât: prime il tifo, po la colerine, e glaçâts i pîts, e la spagnole, e pantan e pedoi po, simpri, tancj (Riedo Pup, Viliacco)
4. coniun. [BF] prime di ducj i elements coordenâts, ancje dal prin, cun funzion disiuntive corelative:  e Gdbtf e Gdlf a son e a varessin di sei struments fondamentâi di formazion linguistiche (Adrian Cescje, Memoriis di politiche linguistiche)
   Sin. sedi
5. coniun. cun funzion di prep. intune adizion:  doi e doi a son cuatri
   Sin. plui
   
   1. cun funzion adizionâl, ancje par indicâ pês, misuris, presits e sim.:  "A son a pene lis vot e mieze" al rispuindè laconic Zac (Franco Marchetta, Light my Fire); al jere [alt] dibot un e novante (Carlo Sgorlon, Prime di sere); tredis di Mai dal mil votcent e cuarante (Alviero Negro, Int di masnade)