sot  /-ò-/  sot  [FO]

  1. prep., av., adi.inv. in posizion plui basse rispiet a alc altri che al è in contat:  sot lis scarpis si formin dôs çuculis di nêf che mi fasin lâ çuet (Alan Brusini, Gian Paolo Linda, I forescj); cjapâ il sium stant sot la plete (Ivano Urli, I spirts); là che e finìs la schene, te part fofe che e je sot, Vigjut al veve une vergule nere (Pieri Menis, Tal bosc di Kebespok)
  2. prep., av., adi.inv. te part basse di alc:  Malie, Catine e Nenute a jerin lis trê fiis dal vuardian dal cjistiel […]. A jerin a stâ sot de torate, in bande dal puarton principâl, cui gjenitôrs (Pieri Menis, Marum)
    1. intun test, te part che e ven dopo:  [la letare] ur e ai scrite par talian e par talian al jere ancje il document che o ripuarti tradusût ca sot (Adrian Cescje, Memoriis di politiche linguistiche); in sumis, par fâle curte, o trascrîf chi sot lis istruzions (Riedo Pup, Par paiâ al vûl mistîr); «Chel chi sot stampât isal il to non?» (Pieri Menis, Cemût che o soi restât caporâl)
      Sin. dopo , daspò , plui indevant , plui indenant
  3. prep., av., adi.inv. in posizion plui basse a pet di alc, cence contat:  il mâr si slungjave al infinît sot un cîl celestin (Alan Brusini, Come tai romançs); il puiûl di len al è difûr sot la linde (Dino Virgili, In scolte…)
  4. prep., av., adi.inv. in posizion plui basse a pet di alc che al cole o al ven o al fâs sintî il so efiet dal alt:  par trois e cjarandis, intant che si inmaneave un brut timp, e po vie, sot la ploie (Maria Forte, Chê massanghe plui grande)
  5. prep., av., adi.inv. a cuote, nivel o altece plui basse rispiet a alc:  i alpins dal Tumieç a tiravin sù la lôr glesie a Casere Pâl Grant, sot cuote 1700 (Pieri Menis, La glesiute dai alpins)
    Sin. da pît
    1. a Sud di alc:  [il Cuar] al nas dongje di Maian e si bute tal Stele sot Codroip (Pierluigi Visintin, Friûl e furlans te Histoire de ma vie di Giacomo Casanova)
    2. in posizion a val di alc:  al è colât il punt sot la mê vila (Novella Cantarutti, Il punt)
  6. prep., av., adi.inv. a nivel plui bas rispiet a un limit, un valôr, un numar e v.i.:  zovins autôrs sot dai trente agns (Max Mauro, Un Friûl difarent: i 90 mhz di Onde Furlane); par insumiâsi e covente ancje che la temperadure dal cuarp e sedi sot i 38° (grâts) (Franc Fari, Il cjâf dai furlans)
  7. prep., av. dongje di un moment o di une date:  une fumate ogni sere sot gnot / mi involç e mi travane fin sul vues, got a got (Ercole Carletti, Fumate); al spietave che al tornàs so pari, sot fiestis di Nadâl (Roberto Ongaro, Il muc); te locande a mangjavin sot Pasche la cuartuce cu la salate frescje e il cuarnet a bine, su tavaiis che a svuarbavin di blanc (Alan Brusini, Come tai romançs); a jerin tristis anadis chês, sot dal otante: miserie che alçave di pês (Dino Virgili, La aghe da pît la cleve)
  8. prep., av. te jurisdizion o tal timp di un guvier, di un regjim, di une autoritât e v.i.:  al veve scugnût fâ dîs agns di militâr cui "jegars" sot da la Austrie (Riedo Pup, Il prin moto); sot dal Ream di Italie, ae fin dal Votcent, la classe dirigjente furlane e scomençà a pretindi dal guvier di Rome une deleghe di autonomie (Adrian Cescje, Memoriis di politiche linguistiche); il mulin di Segat, che cumò al è sot Val, une volte al jere di Cortâl (Cristina Noacco, Faliscjis)
    1. in proprietât:  o vevi sîs solt sot di me: doi pal pagnut, doi pal tabac, doi pal vueli di meti ta lum. Ju ai za dâts vie ducj (Luigi Gortani, Meni Fari); "Il mâl el è, che sot di me no ai che mieze svanzighe!" (Bepo Marion, Il liron di siôr Bortul)
  9. prep., av. a di un nivel jerarchic plui bas:  un bon predi al veve simpri di tasê cun chei sore e di vosâur a di chei sot (Antoni Beline, Pre Pitin); un pedoli rifat, che al cambiave fituâi ogni altri an par vie che sot di lui a murivin di fam (Pieri Menis, Agne Ursule)
    1. intun rapuart di assistence, dipendence, aprendiment e v.i.:  tu tu sês stât a scuele cun me sot dal mestri Clocjat (Josef Marchet, Lis predicjis dal muini); se tu lavoris sot guvier, une pension. Se tu sês paragovernatîf, une altre. Se tu lavoris sot paron, une altre (Riedo Pup, I furlans e la pension)
  10. prep., av. par segnâ situazions o cundizions che a implichin il fat di jessi ogjet o di jessi sometût o di sintî l'efiet di alc:  [la grafie normalizade] e jere sot de menace dal ricors al Tar de Filologjiche (Adrian Cescje, Memoriis di politiche linguistiche); o çavariavi come se o fos stât sot l'efiet dal opi (Franc Fari, Il cjâf dai furlans); il comun mi à mandât sot procès dissiplinâr interni (Mario Beltramini, Jo e Graziella)
  11. av., prep. in posizion dongje di alc o di cdn.:  al jentrà e si sentà su la prime cjadree cjatade vueide sot il mûr (Pieri Menis, Doro); Luduì di Teck […] al comparì in Friûl cun cualchi miâr di mercenaris ongjarês, cjapant Manzan, Rosacis, Scluse e rivant fin sot Udin (Josef Marchet, Cuintristorie dal Friûl fin sot la Italie)
    1. rispiet ae strade, dongje des cjasis o dal ôr, no tal mieç:  cjamine sot, che a passin machinis
  12. av., adi.inv. impegnât in alc:  al à la impression che l'altri no lu scolti, come se al fos sot a cirî alc (Franco Marchetta, Madalene); al pensave ai siei, a so pari, puar om, simpri sot par mantignîlu lui che, cu la sô disgracie, pal moment nol podeve inmò fâ nuie (Roberto Ongaro, Cretevierte)
    1. in cundizion di servizi, soredut obleât o derivât di un impegn, tant che il servizi militâr, il sacerdozi o altris:  nol veve nancjemò no finide la ferme che e jere sclopade la vuere, e cussì lu vevin tignût ancjemò sot, fintremai che lu vevin mandât in Russie cui alpins (Mario De Apollonia, Il timp par ledrôs)
    2. [TS] zûcs spec. tai zûcs di fruts, intune funzion specifiche, diferente di chê di chei altris zuiadôrs, par esempli a cirî, a vê di cjapâ chei altris e v.i.:  fâ la conte par decidi cui che al steve sot (Cristina Noacco, Faliscjis); bale nere, bale blancje, / e vâl cent, e vâl cincuante, / e vâl un, doi, vot, / picot, tu sot! (Zuan Nazzi Matalon, Ottorino Burelli, Sacheburache)
  13. av., prep., adi.inv. (ancje fig.) in posizion platade, ancje cun funzion di cause:  intuî la veretât vere, che e je sot di ogni fat (Riedo Pup, La civiltât dal fum)
  14. av. (eufem.) tes parts intimis:  e çueteave e si tignive cu la man jù sot (Carlo Tolazzi, La salamandrie tal fûc)
  15. s.m.sing. part inferiôr o basse di alc:  i no sai nuia, nencja dulà che al è il sot e il parsora (Stiefin Morat, Donald dal Tiliment)
    Sin. disot , parsot
Polirematichis e espressions idiomatichis Proverbis:
  • Sante Redegonde la sape sot de gronde

Altris Imprescj

Coretôr Ortografic

Il coretôr online pai tescj furlans.

Dizionari Bilengâl
Talian-Furlan

Il plui complet dizionari dal Talian al Furlan (passe 76.000 lemis) e no dome.

Dizionari des Formis

Par cognossi la flession dai lemis furlans: la coniugazion pai verps e la declinazion pai nons e adietîfs.

Sinonims e Contraris

Par cjatâ la juste peraule.

Lenghis

La plataforme didatiche pe scuele furlane.