Dizionari de Lenghe Furlane

di¹  di  [FO]

1. prep. preposizion semplice o articolade, e introdûs diviers complements e che si pues cumbinâ cun altris parts dal discors, ancje dopo di altris preposizions:  un atestât dal municipi firmât dal Sindic (Dino Virgili, La aghe da pît la cleve); cussì i fîs dai fîs, dividûts dai curtîi, a forin, dopo, come forescj e cence parintât (Maria Forte, I arcs); Gotfrît, Volfgar e Pertolt di Andechs a forin simpri cui imperadôrs de cjase di Svevie (Josef Marchet, Cuintristorie dal Friûl fin sot la Italie); lis moraradis des stradis di campagne (Maria Forte, Cjase di Dalban)
2. prep. par introdusi un complement di specificazion:  il bonodôr de polente cuete par dutis lis andronis dai borcs e l'odôr dai biscots denant de fabriche di Delser (Riedo Pup, I furlans e la blave); il colôr dai vistîts si smamive tai sorei de canicule (Riedo Pup, I furlans e la mode)
3. prep. par introdusi un complement di cualitât:  poete di grande vene, tal 1821 al publicà il […] "Strolic Furlan", che al vignì fûr fintremai al 1862 (Roberto Iacovissi, Pieri Çorut)
4. prep. par introdusi un complement di materie:  a batin su la cjampane cuntun martiel di len (Monika Pascolo, Il sun de fieste); mi soi passût a cjalâ la grande statue, dute rivistide di aur e di arint (Antoni Beline, Sant Jacum, là che al finìs il mont)
5. prep. par introdusi un complement partitîf:  di dutrine a 'nd vevin mastiade pocje (Riedo Pup, I furlans e i pecjâts); di dutis lis organizazions sindicâls, dome la CISAL no à partecipât ae firme dal contrat (Redazion Radio Onde Furlane, Acuardi firmât pal Compart Unic regjonâl)
   Sin. fra¹ , in , tra
6. prep. par introdusi un complement di limitazion:  une fantate a la buine, dolce di cûr (Franc Fari, Il cjâf dai furlans); e tornà biele di muse, come simpri, cun chel riduçâ che i resisteve su la bocje (Maria Forte, Dome la cjampanute di Sant Bortul)
   Sin. par , in cont di
7. prep. par introdusi un complement di argoment:  a àn començât a fevelâ di tutele e di difese de lenghe e de culture furlanis ancje i partîts che no si jerin mai çugnâts (Riedo Pup, I furlans e lis tabelis)
   Sin. a rivuart di , in rivuart a , sul cont di
8. prep. par introdusi une aposizion o un complement predicatîf:  Frau di president dal Osservatori al mediave cun ducj e, se al podeve, al contentave ducj, al garantive simpri però che la mediazion e les a pro de lenghe (Adrian Cescje, Memoriis di politiche linguistiche)
   Sin. cuasi , in cualitât di , in funzion di , in lûc di , sicu
9. prep. par introdusi un complement di agjent:  cualchi speloc di nûl sgjarpît dal aiar di garbin (Riedo Pup, I furlans e il timp); in tancj a son stâts salvâts des feminis russis (Angelo Floramo, Cuintristorie dal Nûfcent 1940-1950)
   Sin. da
10. prep. par introdusi un complement di mieç:  par me se un al fâs un gol cuntun rigôr al pues tirâlu di plat, cul «cucchiaio», di ponte… baste che e vadi dentri (Christian Romanin, Dino Zoff: «O vin lidrîs buinis, o vin di tignîlis di cont»)
    Sin. a mieç di , cun , midiant , par
11. prep. par introdusi un complement di moviment, segnant la divignince:  partît di Talmassons a buinorons come il solit, al rivà in vie Zanon prin des vot (Angelo Covazzi, Il miarli)
    Sin. da
12. prep. par introdusi un complement di origjin:  ti darai une letare par un gno amì di Turin (Alviero Negro, Int di masnade)
13. prep. par introdusi un complement di cause:  o crichi di frêt e di fam (Ivano Urli, Storie di Min)
14. prep. par introdusi un complement di fin:  un pâr di scarpis di tenis; la machine di lavâ i plats; no tu puedis doprâ la ponte di len par sbusâ il mûr
    Sin. par
15. prep. par introdusi complement di mût o locuzions averbiâls modâls:  o varès un apontament une vore impuartant e o scuen lâ di corse (Fabian Ros, Eivissa mon amour); ducj chei fruts che a fasevin casin e a zuiavin di balon chi sot (Maurizio Mattiuzza, La maiute di Zidane)
16. prep. inte forme articolade, devant dal numar di un an, al pues introdusi un complement di timp determinât:  dal 1915 o crodevin di lâ a difindisi cuintri la France e cuintri la Inghiltere, parcè che nus vevin insegnât che o jerin sociâts cu la Austrie (Riedo Pup, I furlans e lis armis); Prissilian, un gnostic condanât dal imperadôr par magjie e imoralitât e fat decapitâ dal 386 (Antoni Beline, Sant Jacum, là che al finìs il mont)
    Sin. in , ta
17. prep. cun valôr temporâl par pandi il principi o la durade:  di chê volte a son passâts agns e o soi content di podê dî che Visintin al à dimostrât che no vevi reson jo e che […] e à vinçût la sô passion (Sandri Carrozzo, Note dal curadôr ae traduzion dal Infier di Dante); al è di dôs oris che o spieti
18. prep. cun valôr di timp, ancje distributîf:  al veve lavorât tai cjamps e tai boscs di dut il paîs, di Istât e di Invier (Meni Ucel, Ideis); ogni tant di domenie al leve al cine (Alan Brusini, Il mâl dal tor)
19. prep. cun valôr distributîf:  a son lis cjastinis dutis cul vier, di dîs tu salvis une
    Sin. su , fra¹ , tra , par , ogni
20. prep. in corelazion cu la prep. "a", par segnâ il limit iniziâl di une estension spaziâl, temporâl, numeriche e v.i.:  di Tarvis a Tumieç, di Mont di Crôs a Pladen, di Cjargne a Tarcint e a Cividât e a Gurize, pardut al è proibît fotografâ (Riedo Pup, I furlans e la television); al rivà de Lombardie bons. Anastasi Rossi, tant talianon di someâ fassist prin da la ore. Nancje a fâlu a pueste, i tocjà di fâ il vescul a Udin in timp di vuere, dal '15 al '18, e no si tignì par nuie indaûr tal fâ il patriot (Francesc Placerean, Cuintristorie dal Friûl dal 1866 fint in dì di vuê)
    
    1. in corelazion cun "in" par segnâ une progression:  di confidence in confidence, i ôcs a lavin pardut (Maria Forte, I ôcs di Miute)
21. prep. par introdusi il secont tiermin di comparazion:  o cjali chê cjase brute, malinconiche, basse e mâl fabricade, e pûr mi pâr plui biele di cualunche palaç parcè che dentri al è un grant tesaur (Catarine Percude, La brût)
    Sin. che¹ , che no
22. prep. par introdusi proposizions infinitivis
    
    1. subietivis:  o viodarês trop che us tocjarà di studiâ (Riedo Pup, I furlans e il timp); vie te ostarie a spietâ che al finissi di plovi (Angelo Covazzi, Colpe de aghe)
    2. obietivis:  o jeri laureât di pôc e o ai pensât di fâ un dotorât di ricercje (Sandri Carrozzo, Piçulis storiis di mafie furlane)
    3. finâls:  la terace e à il paviment inclinât, di fâ cori jù la aghe; un pâr di fuarpiis di taiâ cjarte
    4. causâls:  o sin sodisfats e braurôs di vê dât il nestri contribût (Erika Adami, La lenghe al «Friûl»)
    5. consecutivis:  la malatie ta la specie europeane (Castanea sativa Mill.) e à produsût dams tant trements di fâ pensâ a la disparizion dal cjastinâr (Romano Locci, Il cancar dal cjastinâr - une epidemie blocade cu la lote biologjiche); il vin che al spandeve pe cjanive un odôr di freule di fâ vignî la aghe in bocje (Catarine Percude, La fuiace de Madone)
    6. declarativis:  e visâsi di ce che e veve racomandât la none: di stâ lontans di chei talianots des cjartis e des campanelis (Riedo Pup, I furlans e Sante Catarine)
23. prep. devant di averbis, adietîfs, participis, sostantîfs al pues introdusi ancje subordenadis no infinitivis
    
    1. concessivis:  di cjoc che o sedi, jo no piert mai i sintiments (Riedo Pup, L'armistizi dal '16)
    2. causâls:  di sturnît che si cjate a jessi, scuasit nol sint il sivilâ des sclopetadis tor dal vagon di scorte che a copin ducj e dodis i militârs todescs (Ivano Urli, Storie di Min)