Dizionari de Lenghe Furlane

cuasi  /-à-/  cua|si  [FO]

1. av. par indicâ che une azion, une situazion, une afermazion e v.i. no je finide, complete, assolude e v.i. ma i mancje pôc o e je aprossimade:  al tirave fûr dal scansel il libri neri dai «Uficis»: vecjon, cui ponts grues, che lui lu saveve cuasi dut ad a ment (Riedo Pup, Zuan Gjeremie); intal 1420 la Republiche di Vignesie e rive a concuistâ il stât patriarcjâl furlan, ma par cuasi un secul la sô autoritât e reste malsigure (Carli Pup, Il Friûl de Joibe Grasse dal 1511); cuasi tal mieç dal Cjanâl di sant Pieri, parsore la vile di Çurçuvint, si viôt une montagne verde che i disin la Tencje (Catarine Percude, Lis striis di Gjermanie)
   Sin. dibot¹ , va e no va
   Var. scuasi , scuasit , scuasin , scuasint
2. av. ancje ripetût, par pandi dubi o par morestâ une afermazion:  il plevan, cu la sô teolighe, le presentave simpri tune maniere tâl che, cuasi cuasi, la int si convinceve che a 'nd jere stade parfin pocje tampieste daûr i merits dai blestemadôrs de parochie e dai pecjadats di carnevâl (Riedo Pup, I furlans e la religjon); - Ancje i Clevis a patissin! - a disevin la int, e cuasi cuasi a vevin un gust di triscj dentri dal cûr inmò (Dino Virgili, La aghe da pît la cleve)
   Sin. vadì , va e no va , dibot¹
   
   1. tant che rispueste che e pant une pussibilitât, une disponibilitât:  "Âstu voie che o lin al cine usgnot?" "Cuasi cuasi"
3. av. subite prime di un verp, par indicâ che alc al podeve jessi, ancje se nol è stât:  sâr Tite infervorât, plen di vinace / l'ingrampe il so compagn, e furiôs / i mene a braçs aviarts, cuasi lu mace (Maria Forte, Cjase di Dalban); e finìs cussì la letare che Dolfo al cjate sul dentri de puartele dal armâr, plantade tal len cuntun curtìs, che cuasi i veve batût tal cerneli, cuant che le veve vierte (Raffaele Serafini, Contis sot spirt)
   Sin. a moments , mancje pôc che , negozi che , va e no va , dibot¹
4. coniun. par introdusi une comparazion:  i va dongje cuasi a sfidâlu cuntune ufiarte (Bruno Paolo Pellarini, L'anel striât)
   Sin. come¹ , tant che , come che , come se
   Cfr. nancje che , nancje