Dizionari de Lenghe Furlane

tant che    [FO]

1. loc.coniun. in comparazions, par pandi someance o par introdusi une esemplificazion:  dut ros, tant che un gjambar (Romeo Battistig (?), Ai Piombi); se si vûl viodi il Cjanâl biel tant che un sium di fruts, al baste passâlu fûr cuant che la nêf frescje lu vistìs di blanc (Josef Marchet, Il cjanâl vistût di blanc)
   Sin. come¹ , sicu
   
   1. ancje par introdusi comparativis ipotetichis:  al dave une grant soflade ae cjandele tant che al ves vût di studâ un pignarûl (Meni Ucel, Messe a straoris)
      Sin. come se , nancje se , nancje che , come che , tant che se
2. loc.prep. par introdusi un predicatîf o une aposizion:  ma o savìn ancje che cheste imprevidence e sarà presentade tant che un esempli luminôs di gjenerositât eroiche (Josef Marchet, Trombis e tambûrs); a rivarin tun puest che i parons dal lûc a dopravin tant che legnere (Roberto Ongaro, Il muc); inte conference a àn fevelât, tant che puartevôs des associazions furlanis, il vice-president de Societât Filologjiche Furlane, Pier Carlo Begotti, e il rapresentant de Cooperative di Informazion Furlane - Radio Onde Furlane, Carli Pup (Redazion Lenghe.net, 482, nassût il comitât)
   Sin. come¹ , sicu , di¹
3. loc.coniun. par introdusi une proposizion consecutive:  persut, socol, lenghe salmastrade, mortadele, salam, ulivis e saradelis nus confuartin, in compagnie a dôs pagnochis di pan cul chimel. Une delizie; tant che si scugne tornâ a mangjâ ancjimò mieze purizion (Arturo Feruglio, Viaç a Vignesie)
   Sin. cussì che , cussì tant che , e cussì
4. loc.coniun. par introdusi une conclusive:  juste su lis oris piçulis si è bonât un fregul, tant che o ai podût fâ un pisul (Josef Marchet, Lis predicjis dal muini)
   Sin. cussì , e cussì
5. loc.coniun. par introdusi une temporâl, par segnâ contemporaneitât o par segnâ une azion che e dure e che e finìs:  "Sentaitsi un fregul sun chel scagnut alì, tant che o vadi a sierà la farie, e dopo soi a vuestre disposizion!" (Luigi Gortani, Meni Fari); "Vô savês dut chest, pari; e se volês fâmi une grazie, sarès chê di permetimi di fermâ il mio lavôr tant che dure la visite di chei forescj" (Zuan Lurinçon, La Madalene)
   Sin. intant che , fintant che , che¹ , fin che
6. loc.coniun. par introdusi une finâl, ancje intun contest li che si capìs che il mieç par rivâ al fin al è piçul o al baste a pene:  "Cjalait, compari lôf, ce biel formadi che al è là dentri. Us prei lait a cjolilu, tant che i mangji un fregul […]" (Luigi Gortani, La bolp e il lôf); "Sì signôr, aio di scrivi sot forme di verbâl?" […] "No covente, met jù alc tant che mi ricuardi, tu sâs, come il solit" (Pieri Somede dai Marcs, L'avocat e la luianie)
   Cfr. dome che , nome che , juste che

Components:

• che¹ coniun.
• tant adi.indef., pron.indef., av., s.m.