Dizionari de Lenghe Furlane

come¹  /-ò-/  co|me  [FO]

1. coniun. in comparazions, par pandi someance o par introdusi une esemplificazion:  i voi pitinins e neris come gusielis cul pomul (Maria Forte, Il vivi al è chel rangjâsi); po, Snaidar, no jerial il gno paron di Martrent! Un om, ti dîs jo, come il bon pan (Riedo Pup, L'armistizi dal '16); [la patrie] no po ni slargjâsi ni scurtâsi: come une famee (Riedo Pup, I furlans e la patrie); jê i tignive une vore a insiorâ la sô cjase di robis vieris, antighis, come armârs, panariis, gratulis, vintulis, cassons, plats di crep piturâts o di peltri, bussui, e vie discorint (Meni Ucel, Culturis)
   Sin. tant che , sicu
   Var. como , comi , com
   
   1. cuant che il secont tiermin di paragon al è un pronon personâl, in gjenerâl si lu indiche cu la forme obietive:  o crôt che tu vedis bisugne di une biele frute, libare, si intint, cence cirî aventuris cuntune sposade come me (Fabian Ros, Eivissa mon amour); zito là, tu, che no àn di jessi lis nestris fameis judicadis di un sotan come te (Alviero Negro, Int di masnade); "Se ducj a vessin resonât come me", al zigave, "lis robis a varessin filât miôr" (Maria Forte, Cjase di Dalban)
2. coniun. in funzion di preposizion, in cualitât di:  il guvier di Manin al fo sostituît cuntun altri che al veve come president l'avocat Jacopo Castelli e ministri de vuere propit Cavedalis (Giovanni Pillinini, Zuan Batiste Cavedalis - Une vite esemplâr); cuntun mot di cjâf, come ringraciament, la femine foreste e salude Marie (Marisa Moretti, Neveade); i endocanabinoits, sedi naturâi come la anandamide e l'arachidonglicerôl, o di derivazion des plantis come il tetraidrocanabinôl (che si cjate inte cannabis sativa, cognossût come mariuane o hashish), a lavorin a nivel dal cerviel e de medole de schene, oltri che intai tiessûts, dulà che a ridusin la liberazion de istamine (Franc Fari, Neurosiencis dal dolôr); nô, come popul, o sin ancje stâts sometûts (Francesc Placerean, Cuant che a un popul i gjavin la sô lenghe in glesie, al è pront par jessi soterât)
   Sin. di¹ , tant che , sicu
   
   1. se al introdûs un pronon personâl, in gjenerâl chest al va te forme subietive:  come jo, al zonte, no ai cûr di compagnâus. O restarai culì a preâ Diu par voaltris (Pierluigi Visintin, Friûl e furlans te Histoire de ma vie di Giacomo Casanova)

Polirematichis e espressions idiomatichis

• come il fum tai voi loc.av.
• come il mus te semule loc.av.
• come la vacje tal sorc loc.av.
• come magari loc.av.
• come nuie loc.av.
• lassâsi come cjans loc.v.

Proverbis:

• lei e no capî al come trai e no maçâ