cussì
cu|ssì
[FO]
-
av.
in cheste maniere, inte maniere che si à dit, che si è li li par dî o che l'interlocutôr al pues imagjinâ:
Cun calme i ai fat capî che no soi usât a tratâ lis robis cussì, sù pai dêts, e che jo no soi bon di fâ miracui (Pieri Somede dai Marcs, Lis scuelis e la nêf);
îr e je lade cussì: l'emendament nol jere plui e al è dome un gjeneric impegn dal esecutîf (Marc Stolf, Furlan in Rai. L'ordin dal dì e il disordin di ducj i dîs);
cussì al sarà propit un biel lavôr;
lui al si è metût a ridi, ma ben jo ve, te mê cussience, o savevi parcè che o vevi rispuindût cussì (Pieri Somede dai Marcs, Lis votazions);
a jerin vignûts i amîs a viodilu in chel stât, a cjapâlu pes mans, a cjareçâi la muse, a dîi di no fâ cussì (Alan Brusini, Par stradis lungjis)
Var. acussì
, ucussì
, gussì
-
acompagnât di un mot par descrivi robis o personis:
al è alt cussì;
chest an la piergule e à fat raps par cussì
-
cuntune preposizion denant, par definî une posizion, une maniere, une dimension, une misure e v.i. che si capissin dal contest:
bisugne mudâlu di puest di cussì a cussì;
sô mari: une pôc di bon che le à cjapade sù par cussì - e chi Jacume e fasè un mot cu la man, tant che e ziràs un gurli, par meti in evidence la lizerece de femine (Roberto Ongaro, Cretevierte);
no vin nie ce pierdi. Tant plui puars di cussì no si devente (Alan Brusini, Come tai romançs)
-
te stesse maniere:
la criùre e ven cuant che i comode, e cussì la nêf e ancje la buere (Riedo Pup, I furlans e il timp)
-
par segnâ une cuantitât, une misure, ancje par comandâ a cdn. di fermâ ce che al è daûr a fâ:
"Vuelistu ancjemò polente?" "Vonde cussì, graciis"
-
tant che rispueste a di une domande, soredut su cemût che si sta, ni ben ni mâl, no tant ben:
"Cemût vadie cul lavôr gnûf?" "Mah, cussì ve"
-
av.
in maniere tâl, in misure tâl, introdusint une consecutive:
il cîl al jere net, cussì vicin che al pareve di tocjâlu cul dêt, un frêt cidin al taiave la muse (Pieri Menis, La vuere sul Freikofel);
la vitorie e fo cussì complete di stentâ a fâle crodi, tal paîs (Riedo Pup, Il moto dal 28)
-
av.
in corelazion cun "cemût che", "come", "come che" e v.i., introdusint une comparazion:
la facende linguistiche identitarie no jere cussì semplice come la domande de Universitât o de Regjon Friûl, e tocjave sensibilitâts profondis, in tancj câs disorientadis e comprometudis (Adrian Cescje, Memoriis di politiche linguistiche)
-
av.
par cressi il valôr cualitatîf di un adi., di un av., di un pron.:
no coventave dismovi une rivoluzion par cussì pôc (Riedo Pup, Il prin moto);
parcè vêso di fâ chês vitis par une robe cussì facile? (Josef Marchet, Lis predicjis dal muini);
al faseve cussì ben a scuele, chel frut (Alan Brusini, Par stradis lungjis)
Sin. tant
, cetant
, talmentri
-
adi.inv.
fat intun ciert mût, che si capìs dal contest:
un zito cussì al jere come une pôre di dî masse, e pûr une brame di dî alc, di vierzi la anime (Dino Virgili, Ombrenis sul liston);
"Ma ce mi fâstu?" mi veve domandât, o une robe cussì. Di sigûr mi visi che la sô vôs e pandeve une note di delusion che a mi mi veve sustade (Gianni Gregoricchio, Trê feminis)
Sin. di chê sorte
, di chê fate
, compagn
, pareli
, avuâl
, simil
, someant
-
adi.inv.
di une cierte fate, che no si vûl definî tant a clâr ma judicade in maniere negative:
un curtîf di zent cussì, indulà che al steva lui e indulà che a disevin che dut al era sporc, da li ponti da li animi a chês da li damindi (Novella Cantarutti, La passion di Donât Ramaç)
Sin. un pôc cussì
-
coniun.
par introdusi une conclusive:
tal doman a Cussignà i è lade sù la fiere, cussì lu àn puartât vie tal ospedâl e si è sintût a dî che i jere vignude a cjâf la tubercolosi (Ivano Urli, Storie di Min)
Sin. e cussì
, alore
, duncje
, par la cuâl
, tant che
Polirematichis e espressions idiomatichis
Proverbis:
- miôr cussì che no piês
- ogni dì no va cussì
- tilulì tilulì, ogni dì no va cussì
