Dizionari de Lenghe Furlane

tant  tant  [FO]

1. adi.indef. cun nons no numerabii, che al è in grande misure, intensitât e sim.:  «O ai tant gust, e us viôt vulintîr. Comodaitsi» (Meni Ucel, Salams); so pari si viodeve che al stave daûr di ce che al jere ator di lui cun tante fadie e che nol veve masse voie di fevelâ (Agnul di Spere, I prâts des Savodagnis)
   Sin. cetant , grant
   Cfr. un mont , un grum , une vore , trop¹
   
   1. cun nons numerabii o coletîfs, che al è in grant numar:  par sintîsi ben al veve bisugne di jessi intun locâl e di vê intor tante int (Carlo Sgorlon, Prime di sere); cumò si viodin tantis cjasis, tantis «vilis» o vilutis une plui biele di chê altre (Roman Michelot, La cjase dai contents)
2. adi.indef., pron.indef., av. in corelazion cun costruzions consecutivis:  i è vignude tante pôre che si è metude a cori (Pieri Menis, Lis leiendis di Buie); Tite nol jere tant batocj di fâ restâ malapaiât un che al veve di domandâi un plasê (Roberto Ongaro, Il muc)
   Sin. cussì tant , cussì
3. adi.indef., pron.indef. in proposizions comparativis o in corelazions, par indicâ corispondence di numar o cuantitât:  Guri al cor da pît […], i va daûrji a Rosute […]. Tancj pas jê e tancj Guri (Dino Virgili, La aghe da pît la cleve)
4. adi.indef., pron.indef. cun frazions o cun espressions che a segnin un multipli, par sotintindi dute une comparative:  cuant che si duar ben, si met dongje cun mieç tant mangjâ (Riedo Pup, I furlans e i frutins); Vera tai siei [çucui] e sta dentri dôs voltis tant che no rive nancje a alçâju, ju strissine (Ivano Urli, Storie di Min); fighets citadins slacaiôs plens di bêçs! E che a pain trê voltis tant chel che e costarès la stesse robe (Stiefin Morat, Donald dal Tiliment)
5. adi.indef., pron.indef. intune cuantitât gjeneriche che no si pues o no si vûl determinâ:  cu la patrie uficiâl bisugne stâ atents: e à confins, bandieris, carabinîrs, sclopis… cartulinis; e cun dut achel ogni tancj agns, o pûr ogni tancj secui, e cambie (Riedo Pup, Filosofie padronâl); o vin viodût cemût che si stave cuinçant la mignestre a Rome, par opare dai Setante o dai Cinccent e tancj (Josef Marchet, Par intindisi)
6. adi.indef. in cuantitât grande, di mût che si pues calcolâle esagjerade:  aromai e jere ore passade che pre Aristico al ves une promozion, dopo tantis vitis (Antoni Beline, Pre Pitin); i americans si dan di maravee che in Italie, cun tancj bêçs e cun tante robe che lôr a àn mandade ca, si vebi fat cussì pôc par rimeti in sest la nazion (Josef Marchet, Amôr di patrie!)
   Cfr. dut
7. pron.indef. tal pl., grant numar di personis:  tancj a jerin lâts a fâsi la doce, par rafrescjâsi prime di lâ fûr in jessude libare (Gianfranco Pellegrini, Preiere); tancj che no crodevin come te, dopo si son cjatâts contents… (Pieri Menis, La maghe no fale)
   Sin. cetant , diviers , putrop
8. pron.indef. cun valôr neutri e sens che si lu capìs dal contest, une vore di timp, di distance, di inteligjence e v.i.:  mi visi che nol mancjave tant a Nadâl (Agnul di Spere, Visâsi di chel puint radio); o vin determinazion e energjiis par dâ tant ae cause furlane (Adrian Cescje, Memoriis di politiche linguistiche)
   Sin. une vore
   
   1. tal pl., element gjeneric o che si capìs dal contest, in grande cuantitât:  e pûr si 'nt contavin tantis di 'Sese (Lucio Perès, La strie); vô o sês zovin e se o vês timp a vivi a 'nd viodarês tantis in chest mont! (Pieri Menis, Lis leiendis di Buie)
9. pron.indef. numar o cuantitât che no si pues o che no si vûl specificâ:  a veve segnadis ancje lis ufiertis: tant par lui, tant pai capelans e tant pe glesie (Antoni Beline, Pre Pitin)
   Sin. tot
10. av. in grande cuantitât, misure, intensitât e v.i.:  jê i plaseve tant, e veve un so mût maraveôs di sei ninine, e saveve volê ben (Agnul di Spere, Chê dì che al neveà a Vignesie); sul lavôr, po, al faseve pal so cont lui, cu la sflacje, cence rompisi tant par nissun (Riedo Pup, La gjambe di Zaneto)
    Sin. un grum , un mont , une vore
    
    1. cun valôr di superlatîf:  si jere inamorât di une zovine di Cuals, tant biele e tant puare (Cristina Noacco, Faliscjis); o viodevi di jê pe memorie di chel puar so fi, che mi veve lassade vedue tant adore (Maria Forte, Dome la cjampanute di Sant Bortul)
11. av. in maniere limitative o esclusive:  il diretôr, che a prin intro al scoltave cun fâ disvoiât tant par dâi un content, a la fin dal contâ, al jere interessât pardabon (Roberto Ongaro, Il muc); il miedi al coreve mo ca, mo là, ma ce podevial fâ se nol veve nuie cun se? Cuatri garzis tant par meti un blec (Alan Brusini, I ribei)
    Sin. dome , juste , nome
12. av. cun valôr aversatîf o conclusîf:  la gnot e jere state malabiade, ma tant, aromai, mi jeri usât (Alan Brusini, Gian Paolo Linda, I forescj); al jevà prime des siet, tant nol jere nissun gust a stâ tal jet di bessôi (Carlo Sgorlon, Prime di sere)
    Sin. dut câs , in fin dai fats , in ogni câs , istès , par altri
13. s.m. grande cuantitât:  meti adun intun libri, ledrant e resentant il miôr dal tant cjatât, i fruçons de vôs dal passât (Celso Macôr, Jentrade a Sacheburache)
14. s.m. misure o cuantitât indefinide, che no si vûl o no si sa specificâ:  si puedin contâ tantis robis di chel disevot che al veve disponût un tant di patiments e un tant di cuiete par dute la famee (Maria Forte, Cjase di Dalban); al pensave di domandâi par un tant al mês che i preparàs un bocon di cene (Carlo Sgorlon, Prime di sere)
    Sin. tot

Polirematichis e espressions idiomatichis

• a dî tant loc.av.
• a un tant che loc.coniun.
• fâ tant di cjapiel loc.v.
• fâ tantis nainis loc.v.
• fâ tantis storiis loc.v.
• lâ tant pal sutîl loc.v.
• mai tant ben loc.av., loc.inter.
• ogni tant loc.av.
• ogni un tant loc.av.
• par ore tant loc.av.
• par tant che loc.coniun.
• plui che tant loc.pron., loc.av.
• plui di chel tant loc.pron., loc.av.
• plui di tant loc.pron., loc.av.
• plui di un tant loc.pron., loc.av.
• restâ cun tant di nâs loc.v.
• tant ben che mai loc.av., loc.inter.
• tant che loc.coniun., loc.prep.
• tant che ce loc.av.
• tant che mai loc.av., loc.adi.inv.
• tant che mai ce loc.av., loc.adi.inv.
• tant che si vûl loc.av.
• tant e tant loc.av., loc.coniun.
• tant par començâ loc.av., loc.inter.
• tant par dî loc.av., loc.adi.inv., loc.coniun.
• tant par dî une loc.av.
• tant par scomençâ loc.av., loc.inter.
• tant par tacâ loc.av., loc.inter.
• tant parom loc.av., loc.inter.
• tant pete che dai loc.av., loc.inter., loc.adi.inv.
• tant vâl loc.
• tirâ jù tant di cjapiel loc.v.
• un tant al sac loc.av., loc.adi.inv.
• valê tant aur che si pese loc.v.
• volêndi tantis loc.

Proverbis:

• campagne tante che si po viodi, cjase tante di stâ a sotet
• cjase tante di stâ, braide tante di coltâ, prât tant di cjalâ
• cuntune redine si va drets, cun tantis si va tal fossâl
• daspò tancj agns e tant timp la aghe a torne al so mulin
• miôr pôc che tant e trist
• Sant Pauli lusint, tante paie e tant formint
• si robe in tantis manieris
• tal grant al sta il pôc e il tant