Dizionari de Lenghe Furlane

dut  dut  [FO]

1. adi.indef. riferît a un sostantîf, ancje prime dal articul o dal dimostratîf, o a un pronon singolâr, al segne une cuantitât, estension, intensitât e v.i. interie:  dute la campagne e buiave te plombe ferme dal soreli (Dino Virgili, La massarie); [i venezians a passavin] dut il dì in cjacaris e dute la gnot in fiestis e in moroseçs (Catarine Percude, Sant Marc); al berlà cun dute la vôs che al veve (Meni Ucel, Il discors)
   
   1. se si riferìs a un numar cardinâl, te secuence, invezit dal l'articul e pues jessi la coniunzion "e":  il cîl e la aghe a son ducj i doi incjarnâts di turchin (Dino Virgili, Il cîl sot aghe); menaitju vie…! Vie…! Ducj e doi in cjadenis (Alviero Negro, Int di masnade)
2. adi.indef. daûr di "cun", cun valôr concessîf:  cun ducj i fastidis che al veve, i vignì iniment istès che al podeve judâle (Fabian Ros, Un piçul particolâr); noaltris autonomiscj di ponte, cun dutis lis dificoltâts che o viodevin e che ogni dì ancjemò o scugnìn superâ, o vin volût un sfuei te nestre lenghe da cjâf a pîts (Josef Marchet, Un element fondamentâl dal moviment autonomistic)
3. adi.indef. cuntun sostantîf plurâl o coletîf al segne la totalitât des personis o des robis consideradis:  dutis lis istituzions scolastichis - de infanzie, primariis e secondariis di prin e secont grât - a inmanein incuintris di pueste par presentâsi ai lôr potenziâi arlêfs e aes lôr fameis (Marc Stolf, Scuele vierte. Par dut, par ducj ma no pal furlan); ducj i dipendents a son stâts in casse integrazion e un gjornalist al è stât licenziât (Erika Adami, La promozion de lenghe furlane sui mass media); la roie e […] cjape la sô strade, come dutis lis aghis che a vadin a cirî il mâr (Dino Virgili, Un riul tra Venit e Friûl)
4. adi.indef. cun valôr av., in maniere assolude, complete, totâl e v.i.:  la piere dal fogolâr e je dute fruiade (Dino Virgili, La Gnot dai Sants); chel, dut sbarlufît nol saveve ce dî e al si gratave il cjâf (Pieri Somede dai Marcs, Bandiere)
   Sin. di plante fûr , fûr par fûr , in dut e par dut
5. adi.indef. cun valôr av., in maniere esclusive:  la oposizion tra furlan e talian/inglês e je dute strumentâl: cui che al dîs che il furlan al va cuintri dal aprendiment di altris lenghis al dîs une bausie (Sandri Carrozzo, Pseudopragmatisim linguistic)
   Sin. dome , nuie altri , sôl
6. pron.indef. tal sing., ogni cjosse, cualsisei robe:  un om inzegnôs, intindidôr di dut (Riedo Pup, I furlans e lis medisinis); i rispuindeve subit letaris lungjis; e i contave dut dal paîs, de stagjon, dai lavôrs (Riedo Pup, Dreute)
   
   1. in espressions che a àn valôr di superlatîf:  al sune l'alarme, al è dut un corîr e un mateç no di pôc pai sorestants dal implant (Ivano Urli, Storie di Min)
7. pron.indef. tal pl., dutis lis personis, o ducj obiets o subiets nomenâts za prime tal discors:  nus tocje metisi ducj in vore a pale e pic (Ivano Urli, Storie di Min); cuant che al passave al veve la batude pronte par ducj (Angelo Covazzi, Domandait al paron)
   Sin. ognidun
   
   1. ancje cun verp tal singolâr:  ducj sint, ducj si volte de bande de Malie, ducj reste (Meni Ucel, Il sunsûr); cuant che une fantate e puartà in taule i sorbets di limon, ducj si indalegrà (Agnul di Spere, Un sorbet di limon)
8. s.m. ce che al ven fûr de union di plui elements o di ogni element:  te teorie di Einstein "materie e cjamp a son viodûts come parts inseparabilis e interdipendentis di un dut unic" (Pauli Corelli, Recension di The Tao of Physics)
   Sin. aglomerât , aglomerazion , compuest , grup¹ , intun , messedance , misturance , trop² , totâl , sume
   
   1. ancje cun valôr di pron., ogni cjosse, dutis lis robis za ditis:  une gjostre e tancj altris zûcs, ma ancje manutenzion e sistemazion des struturis e dal vert […] Il dut cuntune spese di plui o mancul 130 mil euros (Marc Stolf, Cui 24 di Març Zûcs e novitâts alì dal Parc dal Cormôr)

Polirematichis e espressions idiomatichis

• a cost di ducj i coscj loc.av.
• a ducj i coscj loc.av., loc.adi.inv.
• a ducj i efiets loc.av., loc.adi.inv.
• a ducj i pats loc.av., loc.adi.inv.
• a dut vapôr loc.av., loc.adi.inv.
• a dute ande loc.av.
• a dute bire loc.av., loc.adi.inv.
• a dute gnot loc.av.
• a dute onde loc.av., loc.adi.inv.
• a dute vôs loc.av.
• cun dut achel loc.coniun.
• cun dut achest loc.coniun.
• cun dut chel loc.coniun.
• cun dut chest loc.coniun.
• dal dut loc.av.
• di ducj i colôrs loc.adi.inv., loc.pron.inv.
• dî jù di dut loc.v.
• dî sù di dut loc.v.
• dîle dute loc.v.
• dopo dut loc.av.
• dut a bot loc.av.
• dut al contrari loc.av., loc.coniun.
• dut al plui loc.av.
• dut câs loc.coniun., loc.av.
• dute la mari dal dì loc.av., loc.s.f.
• dute la mari de gnot loc.av., loc.s.f.
• dute la sante mari dal dì loc.av., loc.s.f.
• fâ gloti ducj i dincj loc.v.
• in dut câs loc.coniun., loc.av.
• metije dute loc.v.
• metile dute loc.v.
• molâ sù dut loc.v.
• par dîle dute loc.av.
• par fâle curte e dîle dute loc.av.
• pierdi la lissie cun dut il savon loc.v.
• podê spietâsi di dut loc.v.
• sore di dut loc.av.
• sore il dut loc.av.
• spindiju ducj loc.v.
• vê ducj i numars loc.v.
• viodi dut colôr di rose loc.v.
• viodi dut in rose loc.v.
• viodi dut neri loc.v.
• viodi dut rose loc.v.

Proverbis:

• a 'nd volarès di macarons par stropâur la bocje a ducj
• a no vê voie, dut al pese
• a scûr dutis lis ocjis a son neris
• aghe e vidriûl si fâs vin par dut il Friûl
• al è impussibil di contentâ ducj
• al è mâl tant crodi dut che no crodi nuie
• al è miôr mangjâ dut ce che si à che no dî dut ce che si sa
• al è râr di cjatâ une frute che di cuarp e di cûr e sedi sane dute
• al vâl plui il cûr content che no dut l'aur di chest mont
• al vûl mistîr in dut e lassâur cjapâ lis surîs ai gjats
• amì di ducj, amì di nissun
• avâr al è dut il mont
• bocje e fum a consumin dut
• bogns i parincj, bogns i amîs, ma cuant che no 'nd è nuie a son ducj triscj
• ce che al fâs il Signôr al è dut ben fat
• content jo, content dut il mont
• copâ int, palâ nêf, sbroiâ morârs e spacâ coculis, al è dut timp pierdût
• crodii a ducj e no fidâsi di nissun
• cu la pazience si fâs dut
• cuant che al è ben, al è ben par ducj
• cuant che ducj à mangjât, si cjate sedons pardut
• cuant che dutis lis puartis a son sieradis, si spalanche il puarton
• cuant che e je la buine volontât di lavorâ, al è dut
• cuant che la nêf e je su la mont Pinêt, par dut il mont al è frêt
• cuant che no si rive a dî: "glorie di Diu!" al è finît dut
• cuant che si à dut no si à nuie
• cuant che si à fam, dut al è bon
• cuant che si è cjocs, ducj a dan di bevi
• cuant che si è muarts, al è finît dut
• cuant che si mûr si lasse dut
• cuant che un al è disfortunât, al è di ducj bandonât
• cui bêçs dut no si compre
• cui che al à bêçs al à dut
• cui che al à biele muîr, no je dute sô
• cui che al ame ducj nol ame nissun
• cui che al dîs dut ce che al sa, al piert dut ce che al à
• cui che al va a durmî cence cene dute la gnot si remene
• cui che al va a durmî cence cene dute la gnot si remene e cuant che si è ben remenât nol à ni durmît ni cenât
• cui che al vûl cjapâ ducj i uciei che a passin no 'nt cjape nissun
• cui che al vûl stâ ben une dì, che al mangji ben; un mês, che si maridi; un an, che al maci il purcit; dute la vite, che al ledi predi
• cui che dut al vûl di rabie al mûr
• cui che i da il dêt al mat, al vûl il dêt cun dut il braç
• cui che nol cene, dute la gnot si remene
• cui che nol cene, dute la gnot si tarmene
• cul timp al mûr il mus cun dut il peçotâr
• cul timp dut si po superâ
• cul timp si fâs dut: ancje il mont al è fat un pôc par volte
• dai colps si vuarìs di ducj, fûr che dal prin
• dal ben ducj a àn ben, dal mâl ducj a àn mâl
• daspò muarts ducj a son galantsumign
• daspò viodût ducj a son mestris
• daspò viodût ducj sa conseâ
• daûr vint ducj sa navigâ
• de robe dai altris ducj a son gjenerôs
• denant di maridâsi al pâr che al mancji alc, daspò al mancje dut
• di gnot ducj i gjats a son grîs
• di gnot dutis lis pioris a parin neris
• di gnûf dut al è biel
• di ogni dì al ven Nadâl e di martars Carnevâl, di joibe a ven la Sense: a son ducj mats cui che le pense
• di rive jù ducj i sants a judin
• di robis a 'nd è une gucje par ducj, par ben che e ledi
• Diu al è un bon infant, al viôt e nol pant, al paie ducj e no si sa cuant
• Diu al po dut
• ducj a àn coraç cuant che il lôf al scjampe
• ducj a àn i lôr difiets
• ducj a àn il cuart di ore dal mone
• ducj a àn lis sôs
• ducj a fevelin ben dal lôr mistîr
• ducj à gust di viodi mats in place ma no dai siei
• ducj à la mare dongje dal fiât
• ducj a lavorin par vivi
• ducj a messe in côr no si po lâ
• ducj a vuelin dî la sô
• ducj i agârs no son pes cuaiis
• ducj i dêts no son compagns
• ducj i grops a vegnin al pietin
• ducj i guscj a son guscj
• ducj i guscj a son guscj, al diseve il gjat che si lecave il cûl
• ducj i guscj a son guscj, e diseve la gjate di Aquilee
• ducj i mês no son di trente dîs
• ducj i nâs si somein e no 'nd è nissun compagn
• ducj i principis a son debii
• ducj i pulçs a àn la tos
• ducj i salms a van a finîle in glorie
• ducj i sants a son sants ma sant Filip e Facum, uhiu
• ducj i sants no fasin miracui
• ducj i studis no stan intune crepe
• ducj misure sul so braçolâr
• ducj si à la sô pecje
• ducj sint cu lis orelis
• ducj tire la aghe al so mulin
• ducj use e ducj met la buse
• dut a timp e lûc
• dut al à un fin
• dut al passe fûr che il mani dal furducjin
• dut al sta tal metisi
• dut ce che al è di plui al vanze
• dut chel che di gjat al nas surîs al cjape
• dut il mont al è paîs
• dut si comede fûr che il grop dal cuel
• dut si comede fûr che il vues dal cuel
• dut si fâs pe fabriche dal pitic
• dut si juste fûr che il grop dal cuel
• dut si juste fûr che il vues dal cuel
• dut si mangje ma no il mistîr
• dut si po justâ fûr che la muart
• dut si po onzi fûr che il Signôr
• dute chê blave che si semene tart e ven cincuantìn
• dute la int no je compagne
• dutis lis bocjis a son sûrs
• dutis lis cuaiis no van par un agâr
• dutis lis flôrs a son buinis fûr che chês dal vin
• dutis lis letaris no van a la pueste, dutis lis peraulis no mertin rispueste
• dutis lis malatiis a son malsanis
• dutis lis maraveis a durin trê dîs
• dutis lis moscjis i dan aduès al cjaval magri
• dutis lis rosis a van in fen
• dutis lis sepis no stan intune cavoce
• dutis lis stradis a menin a Rome
• dutis no puedin lâ ben
• fâ e disfâ al è dut un lavorâ
• fâ e disfâ e je dute vore
• falade la prime buse si lis fale dutis
• Fevrarut: piês di dut
• fidâsi di ducj e di nissun
• fiditi di pôcs e vuarditi di ducj
• i bogns bocons ur plasin a ducj
• i câs a son come i nâs: ducj si somein e no 'nd è nissun compagn
• i pintûts e i scuintiâts a van ducj par une strade
• i siei carantans a plasin plui di ducj
• il biel e il bon ur plâs a ducj
• il biel ur plâs a ducj
• il bon al crôt ducj bogns, il trist al crôt ducj compagns di lui
• il brût de pite al va par dute la vite
• il cîl al è dut a lane, la ploie no je lontane
• il franc ur sta tal cjâf a ducj
• il maridâsi nol è di ducj
• il maridâsi nol è par ducj
• il mont al è dut une manovre
• il Signôr al à aghe par bagnâ ducj
• il Signôr al à dut in man: se nol paie vuê al paie doman
• il Signôr ind à di dânt a ducj
• il Signôr no i vûl mai mâl a ducj
• il soreli al jeve par ducj
• il soreli al scjalde par ducj
• il timp al consume dut
• il timp al juste dut
• il timp al spieghe dut
• il timp che al cor a Sant Suan al cor dut l'an
• il timp che si fâs di gnot nol dure trop, chel che si fâs a misdì al dure dut il dì
• il timp fat di misdì al dure dut il dì; il timp fat di gnot al dure tant che un cjaval di trot
• il tradiment al è dut velen
• il tuart nol è mai dut di une bande
• in chest mont a son ducj utii, nissun nol è necessari
• in chest mont al è dut un intivâsi
• in chest mont dut al jude
• in dut la temperance e à di vê la sô stanzie
• in dutis lis robis une robe di mieç
• l'om laboriôs nol dipent di nissun, al è libar; l'om poltron al è sogjet a ducj, al è sclâf
• l'ozi al è il pari di ducj i vizis
• l'ultin mâl al è il piês di ducj
• la aghe a lave dut
• la bocje le vin ducj par traviers
• la etât e costume ducj
• la farine dal diaul a va dute in cinise
• la farine dal diaul a va dute in semule
• la femine di mâl fâ, al è dut dibant di fâle vuardâ
• la muart e fâs ducj compagns
• la robe dal comun e je di ducj e di nissun
• la robe di chest mont e à di fâur lis spesis a ducj
• la vendete no sane dutis lis plaiis
• lagrimuçs di femine, sudôr di cjaval e vaî di plevan nol è di crodi, che al è dut ingjan
• lis botis no colin mai dutis intune volte
• lis cicimbelis no son dutis cu la buse
• lis cjavris là che e va une a van dutis
• lis clâfs di aur a vierzin dutis lis puartis
• lis feminis che a nassin in an bisest a son dutis cence sest
• maridâ nol è par ducj
• miôr patafâ la bocje che no mangjâ dute la robe
• muart jo, muart dut il mont
• nancje i dêts no son ducj compagns
• nancje il mont nol è stât fat dut intune dì
• no bisugne cjapâ dutis lis moscjis che a svolin
• no si pense mai a dutis lis peraulis che si dîs
• no si vent dutis lis pioris che a van a marcjât
• no spindi dut ce che si à ni dî dut ce che si sa
• no stâ vendi co ducj a vendin, no stâ comprâ co ducj a comprin
• no van mai dutis pes pensadis
• nol è aur dut ce che al lûs
• nol è dut aur ce che al lûs
• nol è dut rost ce che al fume
• nol è rost dut ce che al fume
• o ducj di diu o ducj dal diaul
• o sin ducj abii a falâ
• o sin ducj di cjar
• o timp o tart si pailis dutis
• o vin ducj dibisugne un dal altri
• o vin ducj dirit di vivi
• o vin ducj il sanc ros
• ognidun par se e Diu par ducj
• ognidun sa di se e Diu sa di ducj
• pan di une dì, ûf di une ore, lat di un minût e vin dut l'an
• pan e gaban a stan ben dut l'an
• pan e Signôr a 'nd è par ducj
• par dut Avrîl no jessî dal covîl
• par no lavorâ, i poltrons a profitin di dutis lis ocasions
• pes vuedis ducj i poleçs a son compagns
• ploie di misdì, ploie dut il dì
• pluitost di fâ savê dut ce che si sa, al è miôr mangjâ dut ce che si à
• pomâr masse cjamât nol ten sù dutis lis pomis
• riscjâ un pôc par no pierdi dut
• robe robade e va dute in fum
• Sant Blâs e sante blasiole che a preservin il cuel cun dute la gole
• Sant Josef al plante la cuche, Sant michêl le gjave dute
• Sant Matie cu la manariute se al cjate glace le fruce dute
• Sant Valantin al inglace la roie cun dut il mulin
• se a 'nt fossin, se a 'nd vignissin, se a 'nd vessin, a son trê sants che a durin dut l'an
• se a Sant Bartolomiu al è bon timp, al è bon timp dute la vendeme
• se al è ars vinars sant, al è ars dut l'an
• se al è bon timp il prin martars di lune, al è bon timp dute la lune
• se al tone il dì di Sant Zorç, dutis lis coculis a van te cort
• se dutis lis vacjis a puartassin il sampogn
• se si podès filâ ducj i fîi, si tirarès dongje ancje lis telis di ragn
• se tu amis a son ducj bogns, se tu odeis a son ducj triscj
• se tu ur crodis a ducj tu restis burlât
• si po comedâ dut fûr che la muart
• sintî ducj e po fâ a so mût
• soreli a mont tal sac, di ploie dut un slavuac
• studât il lusôr a àn ducj chel savôr
• su la Val di Josafat si salde ducj i conts
• tai paîs dai laris ducj a son galantoms
• tal cjalt dut fûr che la glace
• un vuarp che al mene un altri vuarp a colin ducj i doi te buse
• une man e lave chê altre e dutis dôs a lavin la muse
• une robe daspò vendude ducj volarès comprâle
• une tace di vin ros di vinars sant, al va dut in sanc
• une vacje daspò vendude ducj volarès comprâle
• une vacje scuintiade e sporcje dut l'armentâr
• une volte parom si scuen fâle ducj
• une volte si je fâs a ducj, dôs a cualchidun, trê a dinissun
• vuardilu ben, vuardilu dut: l'om cence bêçs tant che al è brut