Dizionari de Lenghe Furlane

grant  grant  [FO]

1. adi. che al passe la misure usuâl:  vicin de glesie di Ursinins Grant a Buie, dulà che cumò e je une biele cjase grande e blancje, une volte e jere une cjasute puare (Pieri Menis, Lis leiendis di Buie); tal zardin a jerin arbui grancj che a fasevin ombrene ancje suntun toc dal cuviert (Agnul di Spere, Spietant)
   Sin. bocon , grues ipon. , larc ipon. , alt¹ ipon. , vast ipon.
2. adi. di une cierte misure, estension, dimension:  teren al jere grant come trê cjamps (Carlo Sgorlon, Ombris tal infinît); la sacristie e je grande trê metros par cuatri (Josef Marchet, Lis predicjis dal muini)
   Sin. ampli¹ , bocon , larc , spaziôs , vast
3. adi. di altece parsore de medie:  al jere un frut pluitost grant pe sô etât (Carlo Sgorlon, Prime di sere)
   Sin. alt¹ , lunc
4. adi. di letare, scrite e v.i., scrite in dimension no piçule o cun caratar maiuscul:  a àn let nome un grant titul sul gjornâl (Riedo Pup, La civiltât dal fum); i nons dai dîs de setemane, a van cu la letare piçule, i mês cu la letare grande (Daria Miani, Maman)
   
   1. av. cun dimension che si rive a viodi ben o cun caratar maiuscul:  scrîf grant, che si à di rivâ a lei di lontan
5. adi. che al à plui agns, avonde agns o che al è di maiôr etât:  Gjovane e veve za fîs grancj, maridâts (Carlo Sgorlon, Prime di sere); tal doman al jere Sant Josef, il non dal puar nono e dal frut plui grant (Pieri Somede dai Marcs, Fieste in famee)
   Sin. cressût
   
   1. s.m. cui che al è te etât adulte, massime rispiet ai fruts:  sint, Catinuta, tu âs scrit tant pai grancj, scrîf ancja alc pai fruts e pa frutis (Ugo Pellis, Catinuta)
6. adi. che al è in cuantitât bondante:  al è interès di ogni guvier contentâ il plui grant numar pussibil dai siei sogjets, se al vûl durâ (Josef Marchet, La scrassigne); passaran grancj uciei, / ma par colpe de buere / i oseladôrs varan la anime nere (Pieri Çorut, Il Strolic furlan par l'an 1851)
   Sin. bondant , considerabil , consistent , impuartant , notabil¹ , notevul , prominent , rilevant
7. adi. che al è di cualitât alte:  grancj vins furlans e un mobil di len plen di sgnapis nostranis (Natascia Gargano, Luca Manfè e il frico che al à concuistade la Americhe)
   Sin. grues , solen , sontuôs
8. adi. di intensitât fuarte:  un claput al petave intun barcon sierât da la ostarie: in chel cidin de gnot al pareve un grant bot, che al rimbombàs di ogni bande (Dino Virgili, La aghe da pît la cleve)
   Sin. font¹ , fuart¹ , intens , profont , vîf
9. adi. di cdn. che al à une posizion sociâl o economiche plui alte dal ordenari:  aes gnocis al fo presint un grant siôr a dâ lustri al fat (Maria Forte, Cjase di Dalban)
   Sin. in grant
   
   1. s.m. cui che al è une vore siôr o une vore potent:  il gleseam al varès di vê un misurin diferent, midiant che al varès di ispirâsi al vanzeli, che al puarte i piçui a preference dai grancj (Antoni Beline, Pre Pitin); la puare int […] e pense a la vite, a la famee, al lavôr. I grancj, invezit, a pensin a la storie e a la glorie (Riedo Pup, Vitoriis e batostis)
10. adi. che al è impuartant, preseât, cognossût e v.i. par une cierte cualitât:  je la vôs di un on che tu no tu cognossis, ma che al doventarà to grant amì come un to fradi (Ugo Pellis, Catinuta); o voi e mi presenti al comendatôr Castellani furlan e grant galantom (Pieri Somede dai Marcs, A è lade cussì…); o vin mantignût par no sai trop un grant imbroion (Marco Maria Tosolini, Paolo Antonio Simioni, Giorgio Mainerio, un misteri furlan)
    
    1. adi., s.m. che, cui che al è une vore brâf o considerât intune cierte ativitât:  Pierluigi Cappello, un dai plui grancj poetis contemporanis furlans e talians (Erika Adami, "Amôrs" in musiche)
11. adi. denant di un adi., cun funzion di superlatîf:  une grant biele femine, ai siei timps, Sunte Marçarie (Dino Virgili, Come tornâ fruts)
    Sin. tant
12. adi. ancje cun iniz. maiusc., daûr dal non di cualchi personaç storic, par mostrâ la sô glorie:  Aistolf e Desideri si urtarin cui papis e chescj a clamarin in jutori il re dai Francs, Carli il Grant (Josef Marchet, Cuintristorie dal Friûl fin sot la Italie); Alessandri il Grant si jere sintût impiâ de brame di concuistâ la Persie (Carlo Sgorlon, Il dolfin)

Polirematichis e espressions idiomatichis

• a grant stente loc.av.
• aghe grande loc.s.f.
• cjar grant loc.s.m.
• di là da la aghe grande loc.av.
• fradi grant loc.s.m.
• grande part loc.s.f.
• grant part loc.s.f.
• menâle grande loc.v.
• vignî grant loc.v.

Proverbis:

• a fasin simpri il mâl plui grant di ce che al è
• a volê trai il ves plui grant de buse o che il ves nol passe o che la buse si sprece
• al pâr che la sô crôs a sedi la plui grande ma se si cjale chê di chei altris si torne a cjoli sù la sô
• al vâl plui il baston di un pastôr che no la medisine di un grant dotôr
• amôr al à un grant savôr
• bisugne inneâsi tal mâr grant, no je nancje braùre a inneâsi intune tace di aghe
• brut di piçul, biel di grant; biel di piçul, brut di grant
• ce che il piçul al ripet, i grancj lu àn biel det
• cjolimi di grant e tornimi di piçul
• cuant che al cjante il cuc, al è ce fâ pardut, cuant che al lasse di cjantâ, in chê volte il grant dafâ
• cuant che i fruts a fevelin, i grancj a àn za biel fevelât
• cuant che i piçui a fevelin, i grancj e àn fevelât
• cuant che il gjal piçul al cjante, il grant al à za cjantât
• cuant che lis cjampanis piçulis a sunin, lis grandis a àn sunât
• cui che al è grant amì al è grant nemì
• cui che al fâs lis robis cun amôr al è un grant dotôr
• cui che al salve la sô piel al salve un grant cjistiel
• cui che al ten cont de sô piel al ten cont di un grant cjistiel
• cui che al vinç se stes al fâs une grant vitorie
• cui che al vuarde la sô vite al vuarde un grant cjistiel
• cui che nol à mistîr e al va a spas, si invie al ospedâl a grancj pas
• cui che nol comede la piçule buse al comede la grande
• cui che nol ripare il mâl piçul al à di justâ il mâl grant
• da la plui grant montagne al ûf de ruie, ce che tal mont al è fat, nol è par nuie
• dal dit al fat al passe un grant trat
• daspò di une grande ligrie e ven une grande malinconie
• di une lusigne al nas un grant fûc
• e je une grant fadie a fâ il siôr e cence vê nie
• e plui grande la pôre dal mâl che il mâl stes
• feminis e passaris un grant scjalâr di cjacaris
• fin che a son piçui, rosis e flôrs cuant che a son grancj, spins e dolôrs
• fîs piçui, fastidis piçui; fis grancj, fastidis grancj
• grancj amîs, grancj nemîs
• grant il fûs, grant il plomp
• grant il porton, grant ancje il batel
• grant mancjadôr, trist bevidôr
• grant sant che al è sant jude, pecjât che in chest mont si lasse viodi di râr
• i afârs in grant a son simpri contrastâts
• i grancj umign a fasin i grancj fats
• i laris piçui si picjiju, i grancj si lassiju cori
• i plui grancj fai a vegnin dai plui grancj sapients
• i siums de gnot, al dî di un grant poete, a son imagjins dal dì ladis in scuete
• il diaul al caghe simpri tal grum grant
• il diaul al cjie simpri sul grum plui grant
• il grant vuadagn al sfonde la borse
• il mâl nol è mai tant grant che si lu fâs
• il miedi e il speziâr a puedin fâ grant mâl
• il miedi e il speziâr di inzen a puedin fâ gran ben
• il misteri de Santissime Trinitât al è plui grant dal puint maiôr
• il mulin al è un bon cjamp e la glesie une grande famee
• il pes grant al mangje il piçul
• il pitic al è une grande salse
• il plui grant ben e je la salût e la buine volontât parie
• il plui grant nemì dal om al è l'om stes
• il Signôr al è un grant infant: al paie no si sa cuant
• il timp al è un grant rimiedi
• il timp al scuvierç grant cjossis
• il trist che si fenç bon al è un grant baron
• la esperience e je la grant mestre
• la esperience e je une grande scuele
• la fam e je un grant condiment
• la mignestre e fâs deventâ grancj
• la miserie e je une grant scuele
• la pazience e je une grant virtût
• la plui grande fadie e je di fâje intindi a cui che nol vûl capîle
• la providence e je grande
• la usance e je une grande sclavitût
• lari piçul no stâ robâ che il lari grant ti fâs picjâ
• lari piçul no stâ robâ che il lari grant ti picjarà
• lis robis grandis a fâlis ben trop timp al conven
• mat di piçul, om di grant
• mat di zovin, om di grant
• neâsi simpri ta la aghe grande
• no bisugne tirâ il pêt plui grant de buse
• no si da al mont un vuarp plui grant di chel che nol vûl viodi
• no vûl grant fadie a fâ il coion
• ogni grant maravee e dure trê dîs
• ogni sant, piçul e grant
• par grande che e sedi la çocje a fuarce di fâ setiç si consume
• par grande che e sedi la fertaie cuant che si è in putrops a dividile, la fete e tocje piçule
• piçulis o grandis, lis patatis no àn vues
• plui adalt si va, plui grant bot si cjape
• San Vicenç, grant criùre; Sant Laurinç, grant cjaldure: la une e la altre pôc e dure
• Sant Scugnî al è un grant sant
• se si à di inneâsi, inneâsi ta la aghe grande
• se si à di inneâsi, lâ simpri ta la aghe grande; no je nancje braùre a inneâsi intune tace di aghe
• se si lavore tal carnevâl piçul, si viôt madracs piçui; se si lavore tal carnevâl grant, si viôt madracs grancj
• srarissimi di piçul e ledrimi di grant
• tal grant al sta il pôc e il tant
• tant savê al è un grant merit, tant cjacarâ al è un grant difiet
• tu âs plui grancj i voi che no la bocje
• une gote di fêl e fâs amâr un grant pitêr di mîl