Dizionari de Lenghe Furlane

font¹  /-ò-/  font  [FO]

1. adi. che al à une cierte dimension lant injù o indentri o ancje lontan:  ta chel puest il flum al jere masse font par podê cjaminâ (Roberto Ongaro, Il muc); [la aghe] uì a faseva il gorc pi font, po a slargjava il branc che al rivava viert come un grant specju sot il punt (Novella Cantarutti, Malincunia dal lagu); al saltave te nêf fonde une gjambe (Alan Brusini, Par stradis lungjis)
   Sin. alt¹ , profont
   
   1. che al à une grande estension lant injù o indentri o ancje lontan:  la busoche e jere lungje lungje e fonde fonde (Checo Tam, Sense); si meterin a cori, pai prâts, prin e po par une stradele cu lis cjaradoriis fondis (Roberto Ongaro, Il muc)
   2. che al va insot, indentri:  un arbul che nol à lidrîs fondis, nol podarà mai slungjâsi viers il cîl (Maria Chiara Visintin, Lis lenghis di Guriza in mostra a Cjasa Ascoli)
2. adi. (fig.) che al somee lâ injù o indentri in alc, che al è scûr o che al à intensitât:  il colôr dal cîl al jere gnûf par jê, plui font (Agnul di Spere, Te grande place); lis seris de Sierade, neris e fondis come poçs, di no viodi a un pas (Alan Brusini, Par stradis lungjis)
3. adi. (fig.) di sunôr, bas:  une vôs fonde
   Sin. baritonâl , bas , grivi , torgul
4. adi. (fig.) di gnot, che e je tal colm, tal mieç:  doi sbârs di revolvar par aiar a forarin la gnot fonde (Dino Virgili, La aghe da pît la cleve)
   Sin. plen , dut
5. adi. (fig.) che al tocje la sostance des robis, cun fuarce, intensitât, impuartance e v.i.:  dâ un sens plui font e plui unitari a la nestre vite dongje chê di chei altris oms (Franc Fari, Il cjâf dai furlans); creâ lis cundizions par une pastorâl serie, fonde e, o torni a ripeti chê peraule di prin parcè che mi plâs, gjenuine (Francesc Placerean, Pe unitât di glesie in Friûl)
   Sin. seri , profont
6. adi. (fig.) chel al è indentri tal cûr, ta la anime e v.i.:  un amour inradisât fin ta li cumissuri pi fondi dal gno jessi (Novella Cantarutti, Li Clausini)
   Sin. profont