Dizionari de Lenghe Furlane

alt¹  alt  [FO]

1. adi. che al à une grande dimension verticâl:  un tor alt cuntun cjampanon de vôs tonde e çondare (Dino Virgili, La aghe da pît la cleve); chei umign a jerin daûr a scanâsi, batint, in volte [cu lis manariis], tor un peç alt fin al seren (Maria Forte, La tiere di Lansing)
   Sin. grant , lunc
   
   1. ancje riferît a alc che si disvilupe sot de superficie:  par un pôc lis machinis a rivavin a cori, ma prime o dopo si fermavin intun pantan, o intune poce di aghe masse alte (Carlo Sgorlon, Ombris tal infinît)
      Sin. font¹ , profont
2. adi. che al à une cierte dimension verticâl, in gjenar specificade di un valôr numeric:  ator des tombis dai siei a jerin cressudis lis jerbis matis dal Istât altis dôs trê cuartis (Carlo Sgorlon, Prime di sere); une fantacine alte un e sessantesiet (AAVV, Sul florî)
   
   1. ancje in riferiment a une dimension verticâl che e va sot de superficie:  une buse alte une spane (Franco Marchetta, Madalene); la aghe dal Poçut sù par Cleve e jere alte un dêt, nancje (Dino Virgili, La aghe da pît la cleve)
      Sin. font¹ , profont
3. adi. che al è a une cierte cuote sul nivel dal mâr:  lis unitâts 5 e 6 a son fatis sù intun altri puest, un fregul plui alt (13 m sul nivel dal mâr) (Alessandro Pascolini, Il disastri de centrâl nucleâr di Fukushima Dai-ichi)
4. adi. che al è in posizion plui insù rispiet al teren o ae base o a ce che al è ator:  culinis che tal prin a son altis di un nuie sul plan e che po a van alçantsi fin a insedâsi te mont (Meni Ucel, La "Fieste dai Roncs"); e lave là sù in chel cimitieri alt su la culine (Maria Forte, La cotule di none Betilde)
   Sin. elevât
   
   1. di part di teritori che al è plui adalt a confront dal rest:  il teritori al presente - semplificant une vore - trê zonis: la alte planure, la basse planure, i cuei (Enrico Peterlunger, Storie curte de vît in Friûl)
   2. di un flum, dongje de risultive:  la zone prealpine ocidentâl […] si slargje a Sud dal Alt Tiliment (Mauro Pascolini, Andrea Guaran, La mont furlane)
   3. che al è plui insù, daûr de orografie:  Ce progrès fat cun amôr! / A si viôt te alte Cjargne / la passion intal lavôr (Giovanni Delli Zotti, Pas noces di arint da Societât Eletriche da l’Alto But)
5. adi. cun valôr averbiâl, parsore, adalt:  une acuile che e svolave alte intal cîl (Cristina Noacco, Faliscjis)
6. adi. che al è a Nord o plui a Nord:  i dialets regjonâi de alte Italie (Adrian Cescje, Memoriis di politiche linguistiche)
7. adi. di part dal cuarp, o di robe che si met intor dal cuarp, che al è intune posizion plui alte de medie, o che al rive plui insù dal normâl:  il vieli al veve poiade la man su la spale alte di Guri (Dino Virgili, La aghe da pît la cleve); jeans bas in vite e maiute alte in vite che […] si viodi il boton de panze (AAVV, Sul florî); un maion cul cuel alt
8. adi. di part dal cuarp, tignût o voltât insù:  al spacave alts i braçs di spirtât (Meni Ucel, Otavari a Madone); cul cerneli alt e il stomi infûr e la braùre tai voi (Dino Virgili, La aghe da pît la cleve)
   Sin. jevât
9. adi. insù intune scjale di intensitât, grât o nivel:  lûcs dal planet a alte densitât di popolazion (Lorenzo Marcolini, Aplicazions des celis organichis nanostruturadis); la lampadine e vignive scjaldade a alte temperadure (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
10. adi. (fig.) plen di fuarce, di sperance, di positivitât:  nuie nol doveve mancjâ ai soldâts […] par tignîur alt il morâl (Pieri Somede dai Marcs, Une conference di padre Gemelli)
11. adi. di grant nivel, une vore specializât:  [une stazion topografiche] motorizade e di alte precision, buine di fâ misuris di distance fin a 2 km (Redazion il Diari, Struments topografics di ultime gjenerazion); documentaris di une alte cualitât artistiche e professionâl (Fabian Ros, Il cine groenlandês tra art e impegn politic)
    Sin. superiôr
12. adi. che al rive a un totâl di un ciert valôr, o di un grant valôr:  chei che a son rivâts in Canadà prime di lôr […] a scrivin disint che si cjatin ben e che a cjapin paiis altis (Javier Grossutti, La emigrazion dal Friûl - Vignesie Julie in Canadà); il debit di Vigji al jere alton, che nol jere mai stât cussì (Riedo Pup, Vigji Brusin)
    Sin. considerabil , grues , impuartant , notabil¹ , rimarchevul
    
    1. (fig.) caraterizât di intensitât, fuarce, impuartance:  il moment plui alt di un conflit sociâl (Carli Pup, Il Friûl de Joibe Grasse dal 1511)
13. adi. (fig.) in posizion di sorestant intune struture jerarchiche o inte societât:  la iconografie bizantine e esprimè la dignitât imperiâl tes personis dal basileus e de basilissa […] cercenâts des schiriis dai plui alts dignitaris di cort (Adrian Cescje, Viaç aes origjins dal Logos); i fîs de alte borghesie citadine (Carli Pup, Scozie: la scuele gaeliche di Glasgow tra lis miôr dal paîs); une pelicule sociologjiche e satiriche sui rapresentants de classe alte di chê nazion (Fabian Ros, La Mostre dal Cine e devente europeane)
14. adi. (fig.) nobil, elevât, di valôr grant:  si jerin za cjatâts dacuardi tal criticâ la idee che nome il romanç lunc al sedi "alte leterature" (il Crot, Sant Simon 2.0?); e je une facende, la musiche, fate pes animis plui altis (Ivano Urli, La musiche)
    Sin. ecelent , ecels , nobil , sublim
15. adi. di note, sunôr, vôs che a son acûts:  la sirene dal cantîr e veve un timbri alt e armoniôs, che al someave a chel di cierts letons di orchestre (Agnul di Spere, Int no consumade)
    Sin. acût , fuart¹ , sglinghinant , sonôr , sunorôs
    
    1. di strument musicâl, che al à une estension parele di chê dal contralt:  un sax alt
16. adi. [TS] ling., fon. di vocâl, che rispiet a altris e je produsude cu la lenghe tignude plui insù:  tai dialets dal amont e te lenghe fevelade o vin une riduzion des vocâls altis I, U (miš > məš, kruh > krəh) (Janez Erat, Gramaticute de lenghe slovene)
17. adi. di une ete storiche, plui dongje de origjin:  la storie de Alte Ete di Mieç in Friûl (Walter Tomada, Piçul ma grant di contignûts: il gnûf Museu Langobart di Romans dal Lusinç)
    Cfr. prin , antîc , arcaic
18. adi. al pues concuardâsi cul subiet che al à une des carateristichis descritis tes acezions parsore e jessi definît di un complement di limitazion:  une biele femine, alte di gjambe, salde di cjar (Dino Virgili, La aghe da pît la cleve); une biciclete alte di siele; il pazient al è un pôc alt di pression; il contrat al ufrìs tancj servizis ma al è masse alt di presit
19. s.m. la part plui insù di alc:  al alce i voi […] viers l'alt de tor (Franco Marchetta, Madalene); Vigjute e fo plui voltis viodude a fermâsi dongje chê grande crôs di agacie plantade sui alts dal paîs (Pieri Somede dai Marcs, Nardon e Vigjute di Nani)
    
    1. posizion superiôr in cuote:  e fo grande la mê sorprese cuant che la Tiere le viodei dal alt, cun dutis lis formis dai continents (Checo Tam, Sense)
    2. (fig.) posizion autorevule:  jo, dal alt de mê competence di espert, di ordenât, di contabil (Meni Ucel, Culumiis)
    3. (fig.) autoritât massime tune struture jerarchiche, tune societât:  resisti a ogni imposizion che e vegni dal alt (Josef Marchet, Moviment Autonomist Furlan pe Federazion dai Popui)
    4. il cîl o il paradîs:  e puartin la anime di chel frutut inocent e di chel vieli penitent là sù in alt, in Paradîs (Dolfo Zorzut, "A voi a cirî el Paradîs")
20. s.m. intonazion alte, note alte:  dâmi un alt; nol cjape i alts
21. s.m. massime tal pl., lûs de machine che e permet di fâ lusôr lontan:  tacâ i alts
    Sin. lûs di profonditât

Polirematichis e espressions idiomatichis

• a alte vôs loc.av., loc.adi.inv.
• a cjâf alt loc.av., loc.adi.inv.
• a flame alte loc.av.
• a fûc alt loc.av.
• a vôs alte loc.av., loc.adi.inv.
• ad alte vôs loc.av., loc.adi.inv.
• aghe alte loc.s.f.
• cul cerneli alt loc.av., loc.adi.inv.
• cul cjâf alt loc.v.
• dal alt al bas loc.av.
• dal alt in bas loc.av.
• dal alt injù loc.av.
• fâ alt e bas loc.v.
• Pasche alte loc.s.f.
• vêle alte loc.v.

Proverbis:

• cjase che si fâs in place o masse alte o masse basse
• cui che al è plui in alt nol pense che al po colà
• fumate basse, bon timp e lasse; fumate alte, al plûf cuant che i salte
• la sinceritât e à lis notis altis
• tant alt al va il scriç, tant alte e ven la nêf