Dizionari de Lenghe Furlane

fuart¹  /-à-/  fuart  [FO]

1. adi. bon di sopuartâ un sfuarç fisic grant, di tignî ae fadie:  un zovin boscadôr che nol veve inmò la barbe, ma al jere za ben tressât e fuart tant che un rôl (Roberto Ongaro, Cretevierte); un biel zovin, fuart e grues, come un leon (Dolfo Zorzut, No je plui vive); alt e dret che si stuarzeve come un venc, legri e fuart che no i faseve pôre nissune fadie (Pieri Menis, Sul agâr)
   Sin. drugul , gaiart , gnervorût , gnervût , possent , robust , vivarôs
   
   1. in stât di tignî bot a strussiis e malatiis:  al zovave plui il fisic fuart dal malât che no lis medisinis (Roberto Ongaro, Cretevierte)
2. adi. di une part dal cuarp, robust, muscolôs:  braçs fuarts chei che le acolzerin e le cjaparin sù tant che e fos stade une pipine (Roberto Ongaro, Cretevierte)
   Sin. drugul , gaiart , gnervorût , gnervût , muscolôs , possent , robust , vivarôs
   
   1. di cdn., che al à une part dal cuarp robuste:  i nadadôrs a son fuarts di spalis
3. adi. di une part dal cuarp o di une part di alc, grande, bondante:  alt e di spalis largjis, une ponte di barbe bionde sot la bocje fuarte e blancje di dincj al veve une zoventût che e incjantave (Maria Forte, Cjase di Dalban)
   Sin. bocon , bondant , gjenerôs , grant , grues
   
   1. di cdn. o di alc, che al à une part grande, bondante e v.i.:  jessi fuarte di pet; jessi fuart di panze
4. adi. che al fâs alc cun fuarce, intensitât, insistence, costance e v.i.:  un fumadôr fuart; e dispecolave cun impegn une lungje sfilze di de profundis e di jaculatoriis par ducj i siei vons e ancje par se; che jê e jere fuarte di glesie (Maria Forte, Cjase di Dalban)
   Sin. acanît , fis , fissât , grant , grues
5. adi. che al compuarte l'ûs de fuarce, de violence, de prepotence:  la polizie, cirint di mandâ vie dai zovins che si jerin sentâts sul pedrât e dopre lis manieris fuartis cun cjariis e dant jù manganeladis (Fabian Ros, Il fotogram mancjant. Un Friûl cence memorie storiche audiovisive)
   Sin. brusc¹ , decîs , dûr , garp , trist , violent , prepotent
   
   1. che al sucêt in maniere viamente, violente:  siôr Tite al jere tornât dal ospedâl e al stave mancumâl. Si capìs che i dincj denant no jai vevin metûts e il nâs i jere restât fracaiât, ma in complès al jere miôr di ce che si pensave che i fos tocjât. Lis botis a jerin stadis tantis e fuartis (Roberto Ongaro, Il muc)
   2. che al pant agressivitât verbâl, pôc rivuart, pôc rispiet, pocje creance e v.i.:  di chel pôc che mi à restât intal ricuart, ju ai simpri viodûts in armonie: mai une sfesadure, mai une peraule plui fuarte (Gianni Gregoricchio, Trê feminis)
6. adi. che al à un podê, une posizion di domini, di favôr e v.i.:  un guvier fuart; metisi cuintri dai podês fuarts
7. adi. che al fâs stât su di une cundizion, cualitât, poie e v.i.:  fuarts di une storie che e viodè i nestris vins agradîts in dutis lis corts de Europe, i produtôrs di Oslavie e di Lucinîs a son la ponte di diamant pe riscuvierte e pe valorizazion da la enogastronomie gurizane (Aministrazion Publiche, www3.comune.gorizia.it/turismo/fn/il-vin)
8. adi., s.m. che, cui che al è bon di sopuartâ dificoltâts, dotât di volontât e fuarce morâl:  si sa che la calme e la trancuilitât a son lis virtûts dai fuarts (Riedo Pup, Balon: crodi, ubidî e paiâ); sot di chê parence lizere, si platave un caratar, sì dolç e zentîl, ma fuart (Gianni Gregoricchio, Trê feminis)
   Sin. determinât , salt² , dûr , energjic , fer , robust
9. adi. di alc, che al ten bot ai sfuarçs mecanics, al ûs, che nol mole e no si romp:  il len di agacie al è une vore fuart; vistîts di tiessût fuart
   Sin. dûr , fis , robust , salt²
10. adi. di alc di materiâl o imateriâl, che al à tante intensitât intune des sôs carateristichis, e in particolâr inte sô carateristiche principâl:  [il formadi di mont al] à un gust fuartut, che al tint al amâr (Oscar Puntel, Il formadi di mont); colôrs scûrs e segns fuarts, come chei di Caravaggio (Cristina Noacco, Faliscjis); ogni tant un ton plui fuart al pandeve che cualchi cassele di munizions e veve cjapât fûc e tonât (Roberto Ongaro, Il muc); une Adler dodis cilindris e sîs puescj che, une volte in moto, e tremave tai veris celestins, cun dentri un fuart odôr di bachelite (Alan Brusini, Come tai romançs)
    Sin. penç , pesant , possent , potent , violent
    
    1. di medisine o altre sostance, che e à tant efiet:  cjapâ un antibiotic fuart
    2. di vin, bire, licôr e v.i., che al à tant alcul:  cumò al veve dome voie di parâ jù alc di fuart e po di mangjâ (Amedeo Giacomini, Tal ospedâl)
    3. di cafè, te, cjocolate e v.i. che al à tant savôr e alt nivel di sostance ecitante:  mi doi une lavade e voi in cusine a bevi il cafè. Une vore fuart, une vore bon (Sandri Di Suald, Ah! la provincie)
    4. di tabac, cun alt nivel di nicotine:  il locâl al è plen di fum di tabac fuart (Alan Brusini, Gian Paolo Linda, I forescj)
11. adi., s.m. di odôr, che al da fastidi, che al è trist, in particolâr di robe fermentade, di garp e v.i.:  il levan al à lavorât masse e il pan al sa di fuart; il vin al à cjapât di fuart
12. adi. che al à grande cuantitât, dimension, impuartance e v.i.:  il so om al veve cjatade juste la division parcè che al veve za vût sumis fuartis dal pari (Maria Forte, Mabile la Lunghine); organisims finanziaris autogjestîts e cun fuarte partecipazion popolâr (Buteghe dal Mont, Luche Nazzi, Guide par un consum just e solidâl)
    Sin. alt¹ , grant , impuartant , rilevant
13. adi. di alc, che al vâl, che al à un efiet, une cualitât positive:  al covente meti in rêt dutis lis esperiencis fatis, individuâ i erôrs e i ponts fuarts e corezi lis liniis gjenerâls e i plans detaiâts (Sandri Carrozzo, Planificazion linguistiche tal mont de sanitât)
    Sin. bon , salt² , san
14. adi. di cdn., che al à capacitâts, cognossincis, competencis e v.i. intun ciert setôr:  jessi fuart in matematiche; jessi fuart tai sports
15. adi. (coloc.) che al fâs impression par une cualitât o capacitât, o ancje par simpatie:  ce fuarte che e je Catine! e fâs murì di ridi!
    Sin. famôs , bulo , babio
16. adi. [TS] gram. di categorie gramaticâl, che te flession e pues cambiâ ancje la lidrîs
    
    1. viôt tonic
17. av. cun fuarce, intensitât, bondance e v.i.:  il barbe Tite che al strenzeve fuart la scorie e lis brenis par tignî fer il cjaval che al sgriave la tiere (Maria Forte, Cjase di Dalban); la ploie e bat fuart tai veris, l'aiar al sivile pes fressuris (Pieri Somede dai Marcs, Un pugn di moscjis)
18. s.m. dome sing., ce che si rive a fâ miôr:  no che no lessin dacuardi, dome che la comunicazion verbâl no jere il nestri fuart (Igor Londero, Un blanc e un neri)
    Sin. cantin , pont fuart
19. s.m. dome sing., moment, fase di alc cun plui fuarce, intensitât e v.i.:  l'è sul fuart de la etât, e par stature / al è un bocon di diaul che al fâs paùre (Pieri Çorut, Ai furlans); i lens sa i taia sul vecju di luna; sul fuart [di lune] a no i art parcè che a i buta la aga (AAVV, Un compit par furlan)
    Sin. colm , plen

Polirematichis e espressions idiomatichis

• a fuart loc.av.
• cûr fuart loc.s.m., loc.inter.
• dâ man fuarte loc.v.
• fâsi cûr fuart loc.v.
• fâsi il cûr fuart loc.v.

Proverbis:

• al zighe plui fuart cui che al à tuart
• arc di Sant Marc o bontimp o ploie fuart
• cui che al à tuart al zighe plui fuart
• fuart cui che no si lasse vinci dal pudôr, plui fuart cui che no si lasse vinci de necessitât
• se tu vûs vê reson, zighe fuart