Dizionari de Lenghe Furlane

pesant  /-à-/  pe|sant  [FO]

1. adi. che al pese tant, che al fâs sintî il so pês, che al compuarte un sfuarç par jessi tirât sù o tignût sù:  a jentrin Toni e Gjovane, puartant un baûl une vorone pesant e sigjilât (Luciano Rocco, La foghere); siore Luzie e jere curiose […], e va a dâ une man al marît. Eco, cumò insiemi a vierzin un altri scansel pesant che al vuiche (Pieri Menis, Il tesaur di done Cheche)
2. adi. di cuarp di persone, che al à intor plui cjar e gras di ce che si calcole normâl:  siore Filumene e jere une femine severe e sberlone: la figure pesante, la muse complene, i braçs a triangul sui flancs (Alan Brusini, Par stradis lungjis)
   Sin. grues , gras
3. adi. di tiessût o vistiari e v.i., che al pare dal frêt:  intor al veve un capot pesanton (Carlo Sgorlon, Il dolfin)
   
   1. ancje cun funz. di av.:  la criùre de matinade mi sgrifignave la piel ancje se mi jeri vistût ben pesant (Enrico Martina, Ricuarts e inlusions)
4. adi. che si fâs fature a digjerî:  «Il verduç» al diseve, «nome dôs tacis e lu ai dut ca» e si bateve il stomi. «Al è un vin pesant» (Alan Brusini, Par stradis lungjis)
   Sin. grivi , penç
5. adi. che al à o che al da une sensazion di pês, di pression, di malstâ costant:  mi sint il cjâf pesant (Fabian Ros, Eivissa mon amour)
   
   1. dai voi, che si sierin pe sium:  un pôc dopo i voi a tacarin a doventâi simpri plui pesants (Jolanda Mazzon, Di là de rêt)
6. adi. che nol plâs, che al da fastidi:  un scjafoiaç pesant al cjoleve il flât (Pieri Somede dai Marcs, La bissebove)
   Sin. grivi , puçon , trist , penç
7. adi. (fig.) cjamât di tension:  lis dificoltâts tai rapuarts internis a vevin creât in radio une clime pesante e la autoritât dal diretôr no jere plui ricognossude (Max Mauro, Un Friûl difarent: i 90 mhz di Onde Furlane); cuant che Jolande e finì di fevelâ, par un moment al fo un zito pesant (Carlo Sgorlon, Prime di sere)
8. adi. di cundizion di polse, profonde, che e fâs che nol sedi facil jessi sveât:  si jere indurmidît di un sium pesant, plen di fantasimis (Franca Mainardis, Aiar di cjase)
   Sin. penç
9. adi. (fig.) di stîl, masse cjariât:  une decorazion pesante; une scriture pesante
   Sin. baroc , fuart¹ , penç , cjamât
10. adi. (fig.) dât o fat cun fuarce:  jù pe strade si sintì un pas pesant che si vicinave in buride (Pieri Menis, Sul agâr)
11. adi. (fig.) che al domande fature, sei fisiche che mentâl:  mestri Nart, […] metût sot fin di frut a fâ lavôr pesant, cence vizis ni strapaçs, moderât tal mangjâ e plui tal bevi, al jere vignût sù un om grant e grues e fuart (Roberto Ongaro, Cretevierte); o sai di vê sielte une scuele superiôr tant impegnative par me. E cuntun orari tant pesant (AAVV, Sul florî)
    Sin. dûr , sfadiôs , strussiât
12. adi. dificil di sopuartâ dal pont di viste economic, fisic o psicologjic:  la vite, par Lise, e deventà plui bessole e pesante, che al jere plui ce lavorâ che respirâ là dentri (Maria Forte, Cjase di Dalban); un malincûr pesant ur colave in ogni moviment e tes peraulis e te cjaladure (Dino Virgili, La aghe da pît la cleve); un sisteme fiscâl permanent cuntune pression simpri plui pesante (Fabian Ros, La invenzion dal stât)
13. adi. (fig.) spec. cun valôr negatîf, che al à grande impuartance, une vore grâf:  al è di fat impussibil tornâ a vecjis (o gnovis) monedis cence consecuencis pesantis par ducj i citadins (Patrizia Tiberi Vipraio, Euro o no euro: isal chest il probleme?)
    Sin. di pês , fuart¹ , grant , grivi , impuartant , seri
14. adi. (fig.) ofensîf, vilipendiôs:  [Berlusconi] ta chê ocasion al à dopradis peraulis pesantis stant che al à metût in discussion la mê dignitât (Christian Romanin, Dino Zoff: «O vin lidrîs buinis, o vin di tignîlis di cont»)
    Sin. grivi , ofensîf , vilipendiôs
15. adi. (fig.) pôc rispietôs, volgâr:  di cuant che al jere li di jê chel uficiâl todesc, si jere inacuarte che nissun soldât i faseve plui compliments pesants (Roberto Ongaro, Il muc)
    Sin. volgâr , ordenari , sbocjassât
16. adi. [TS] econ. di unitât monetarie, che e à un valôr multipli o superiôr rispiet a ce che e valeve o rispiet a altris unitâts:  lis tassis […] si scugnive paiâlis cun la valude pesante, cul florin di Viene (Elio Varutti, Il Risorziment a Martignà)

Polirematichis e espressions idiomatichis

• lâ jù pesant loc.v.

Proverbis:

• chê che al da il Signôr si le puarte vulintîr, chê che si fâs di bessôi e je plui pesante di puartâ
• il prin principi al è pesant